45
Aisaia 45:1-7
Anututä guŋ äbot kubä täŋo intäjukun äma u piä man iwetkuk
1 Yawetä Sairus intäjukun äma itkaŋ ämikken äma äbori äbori täŋo kehäromi yäpmäŋ äpäkta iwoyäŋkuk. Täŋkaŋ intäjukun äma ätu täŋo wäpi biŋam awähutta Sairus iniŋ kireŋpäŋ yotpärare kubäkubä täŋo yämabam dät imik täyak. Unita Yawetä Sairus ŋode iwetak;
2 Näk intäjukun kuŋkaŋ kädet api täwit gamet. Näk pom däpmäŋ kokoyäŋpäŋ täŋdudumtak täŋtäŋ kuŋira kädet api pärek. Täŋkaŋ yämabam täŋkehärom takta ain kehäromipäŋ meham täk täkaŋ u api däpmäŋ äreyäŋ täŋpa kuneŋ. 3 Ude täŋkaŋ iwan äma unitäŋo moneŋ tuŋum täga ämatä nämo yäpnaŋiken käbop pewani u yäpmäŋpäŋ api gamet. Täŋira api nadäwen; Näkägän Yawe. Isrel täŋo Anutu wäpka yäŋpäŋ gämagutkuro ubayäŋ.
4 Nadätan? Piä ämana Isrel, näkŋata biŋam iwoyäŋkuro u täŋkentäkta gäk iwoyäŋpäŋ yäŋ-gämagutkut. Gäk näka nämo nadäk täyan upäŋ näkŋa-tägän iwoyäŋpäŋ wäp biŋam taŋi gamiŋkut. 5 Bureni, näk kubä-tägän Yawe. Anutu kubä nämo itak. Gäk näka nämo nadäk täyan upäŋ näkägän kehäromi gamik täyat.
6 Ude täŋ gamik täyat uwä mebäri ŋodeta; Ämawebe edap dapuri äbani käda ba äpmoŋpani käda ba kukŋi kukŋi u kuduptä ŋode nadäneŋta; Anutu kubä nämo itak. Yawe Anutu näk kubägän. 7 Näkägän yäŋira peŋyäŋek ba bipmäŋ urani ahäk täkamän. Ba näkägän kadäni täga ba kadäni waki u yäŋira ahäk täyak. Yawe näkägän imaka u kudup täŋpewa ahäk täkaŋ.
...
Aisaia 45:20-25
Ämawebe kuduptagän Ekäni gämoriken api itneŋ
20 Yawetä ŋode yäyak; Ämawebe äbori äbori ämik gänaŋ nämo kumbani in kudup näkŋo man piäken äbä irut. In anutu jopi päya kujatpäŋ paiwani yäpmäŋ kuŋat täkaŋ. Täŋkaŋ anutu täga nämo täŋkentäŋ taminaŋi uken yäŋapik täkaŋ. Inä guŋ bureni-inik! 21 Unita äbäŋkaŋ injin kubäkubä mebärijin iŋamnaken kwawak yäŋahäwut. Täŋkaŋ injin-tägän näwetgäwet täŋpäŋ kawut; Anutu jidewanitä imaka apiŋo ahäkaŋ unita bian ude api ahäwek yäŋ yäŋkuk? Uwä Yawe näkägän yäŋahäŋkut. Näk ämawebenaye waki keriken nanik bureni yämagurani Anutu siwoŋi ubayäŋ.
22 * Nam 21:8-9; Jon 3:13-16, 6:40; Hib 12:2 Unita komen ämawebe kuduptagän in näkken äbäŋ moreŋirä yäpätägak piä täŋ tama! Nadäkaŋ? Näkägän Anutu bureni. Näk udewani kubä nämo itak. 23 * Rom 14:11; Plp 2:10-11 Näkŋa wäpna terak mena kudupi siwoŋitä yäŋkehäromtak man yäŋkuro u nämoinik api awähuret. Näk ŋode yäŋkut; Komen ämawebe kudup näkkengän äbäŋpäŋ gukut imäpmok api täŋ namineŋ. Näkagän nadäŋ namiŋpäŋ kuŋatta api yäŋkehärom täneŋ. 24 * 1Ko 1:30 Täŋkaŋ uwä näka ŋode api yäneŋ; Yawe-tägän täŋkentäŋ nimiŋpäŋ kehäromi nimiŋirän iwan täŋo kehäromi yäpmäŋ äpäk täkamäŋ. Upäŋkaŋ ämawebe näka gaŋani nadäk täkaŋ uwä mäyäk taŋi api yäpneŋ.
25 Täŋpäkaŋ Jekop täŋo äboriye uwä Yaweken irit täga kaŋ-ahäŋpäŋ yäŋ-iniŋ oretoret api täneŋ.