4
Maaron pale igabiiz uraata tooni
1 Tauvene tamtamon irau tigham ŋgar pa yei uraata tauvene: Yei besooŋa to Krisi. I inumeer ghei, ve ighur saveeŋ tooni ilam tsiei leso niŋgini. Saveeŋ tane isavia Maaron ŋgar tooni tau muuŋ iyooŋ, ve aazne ivot ighazooŋ. * 1Kor 3:5; 2Kor 6:4
2 Besooŋa tau ighe tiina tooni inumeera ve ighur gabua ila niima to iŋgini, ene i aat iŋgin poghania gabua tana itaghon ŋgar to tiina tooni. * Lu 12:42
3 Tauvene isaav ighe yam, ma tamtamon siriv agabiiz ghau aghe yau poiag, ma saghatig, ene nagham ŋgar pa tana geeg mako. Ve irau nagabiiz taug naghe yau poiag, ma saghatig, ene paam mako. 4 Onoon, yau naghe uraat tsiau, nagham sosor eta mako. Eemon irau nanumeer sorok naghe ŋgar tsiau isov iduduuŋ ne mako. Naleep ve nasaŋan gabizooŋ to Tiina toit tau murei pale ivot, o i tauu igabiiz ghau. * Mbaŋ 23:1; 1Kor 3:13; 2Kor 10:18
5 Yam tauvene paam. Rekia agabiiz tamtamon ve aghe yes sasaghatizi, ma popoiazi sov. Aleep ve asaŋan saawe to Tiina toit Yesu imuul ilam. Pa saawe tana ighe ivot, i pale ivotia gabua tisov tau tiyooŋ ila ndoroom, tomania ŋgar isov tau igheen ŋgozaaŋ ila tamtamon lolozi na, ivot ighazooŋ. Mako Maaron tauu ipait tamtamon eŋaeŋa itaghon ŋgar toz toz. * Ro 2:16; 1Kor 3:8; 2Kor 5:10; Syg 20:12
Ŋgar tau mbaŋooŋa to Krisi titaghoni
6 Yam toŋvetaz, saveeŋ isov tane, yau nasavia izaa to yau gha Apolos, leso nauul gham ve agham ŋgar poi pa yei tau nipaduduuŋ gham pa Maaron aliiŋa ne. Yam irau agham ŋgar ilam tsiei. Leso yam tau apapait tamtamon ee pa ŋgar tooni ve matamim veleghin ite na, apul ŋgar tsiam tana ileple. Pa ighe agham tauvene, yam amalaaŋ pa Maaron aliiŋa tau tiboode pataghaaŋ na. * Ro 12:3
7 Laak, yo tau upakur taum na, sei igham ghom uliiv zetamŋa? Ve saa gabua ta yo ughamu ivot ila taum tapirim? Mako. Gabua tsio tisov tomania saa ŋgar poia tau igheen tsio, ena yo ughamu ila to Maaron. Ighe tauvene, puughu mindai ta ugham tinim ve upakur taum imin ŋgar tomania gabua tsio ivot ila to yo taum? * Yo 3:27; Yems 1:17; 1Pe 4:10
8 Aa yam Korin, arao kat! Ail saa gabua muul? Pa yam asavsaav aghe: Maaron tapiri, yam agham katini wa. Ve aghe aghazooŋ kat pa ŋgar tooni. Ve aghe yam amin kinik wa. Aleep ila tamtamon eta saamba muul mako. * Saveeŋ to Maaron isaav tauvene: Mboŋ murei, ighe Mesia ilam ve itotoi tapiri ivot ighazooŋ, ene pale yesŋa tamtamon tooni timin kinik ve tigham pooz pa gabua naol isov. Eemon tamtamon siriv to Korin ŋgar toozi ikau. Tighe yes tau tighur ila to Krisi ve tigham Maaron Avuvu tapiri na, tileep imin yes to nugh sambam gha timin kinik wa.
Eemon yei o, soone. Ve imin ta saveeŋ tsiam tana onoon, kanaŋ poia. Leso itiŋa tamin kinik ve tagham pooz. Eemon mako. * Syg 3:17+
9 Yau naghita naghe Maaron ighur yei mbaŋooŋa nileep murei geeg. Yei nimin yes tau tighe tirav zi timaat, ve tigherev zi tila pa nugh to mogheraaŋ, leso tirav zi ila eval tiina matazi. Ve yes tau timamarar ghei ne, tamtamon to taan mon mako. Yes aŋela paam. * Ro 8:36; 1Kor 15:30+; 2Kor 6:4, 11:23+
10 Yei mbaŋooŋa nizuari ghei pa taghoniiŋ Krisi, ve tamtamon tighit ghei tighe nivaghamgham imin yes kankanooŋa. Eemon yam o, aghe Krisi igham gham arau kat pa ŋgar! Yei tapirimai imbool, ve lemai ezamai mako. Eemon yam, o aghe tapirimim tintiina ve ezamim tintiina. Yam arao kat! * Mbaŋ 26:24; 1Kor 2:3; 2Kor 13:9
11 Muuŋ ve ilam, pitool ghei ve murun ghei. Ve nonoghiiŋa tsiei perekperekia. Tamtamon tighamgham saghatin ghei, ve taumai lemai ruum to lepoogh mako. * Mt 8:20; 2Kor 11:27
12 Yei nighamgham uraat ariaaŋ pa nimamai, leso niuul taumai. Ighe tamtamon tisik saveeŋ saghati payei, yei nighason Maaron to ighur poia tooni izaa toozi. Tamtamon tighurghur pataŋani payei pasaa, nitaghon Krisi, eemon niyooz ariaaŋ ve nibaado. † Grika ve Roma tivelegh yes tau tighamgham uraat pa nimazi. Ve isaav ighe tamtamon tigham ŋgar saghati pa ŋeer eta, ve i iyatu mako, ene paam Grika ve Roma tiveleghi tighe i iroi ve le tapiri mako. Tauvene ŋgar tau Paulus ve mbaŋooŋa siriv titaghoni, ene igham Grika ve Roma siriv tivelegh zi kat. * Mt 5:44; Mbaŋ 18:3+
13 Tamtamon tiŋgalŋgal saveeŋ payei, eemon yei niyol saveeŋ toozi pa saveeŋ poia. Tauta muuŋ ve ilam, tamtamon tivelegh ghei kat ve tighit ghei tighe yei sasaghatmai imin pen ve buzbuz to taan. * 1Pe 3:9
Paulus ipalot yes Korin ighe titaghoni pa ŋgar tooni
14 Saveeŋ tane, yau naboode payam to napamayaŋin gham mako. Yau lolog igheen tsiam, ve naghit gham naghe yau natugŋa yam. Tauta naghe napaduduuŋ gham. * 1Tes 2:11
15 Pa ighe yam lemim tamtamon ndiŋndiŋ ndiŋndiŋ (10,000) tau tiŋgin gham ve tipaghazoŋai gham pa eez to Krisi, ene poia. Eemon tamamimŋa naol mako. Tamamim eemon ta yau. Pasaa, saawe tau navotia vaaru poia payam, ve aghur ila to Yesu Krisi, yau namin tamamim. * Mbaŋ 18:11; 1Kor 3:5+
16 Tauta naghe napalot gham, leso ataghon ŋgar tsiau. * 1Kor 11:1; Pil 3:17, 4:9; 2Tes 3:9
17 Puughu tane ta nambaaŋ Timoti ilat. I, yau nanumeera ve lolog igheen tooni kat. Yau naghita imin natug duduuŋ. I ighur ila to Tiina toit ariaaŋ, ve igham uraat itaghon Krisi ŋgar tooni. I pale ipei ŋgar tsiam muul pa eez tau yau naleep tuŋia ila to Krisi ve nataghon ŋgar tooni. Eez tane, yau napaduduuŋ lupuuŋ to Krisi pani irau nugh nugh. * Mbaŋ 19:22; Pil 2:19+
18 Yau nawatagh: Tsiam siriv matazi iŋgal tighe yau irau nalat naghit gham muul mako. Tauta tipakur tauzi ve tizorzoor saveeŋ. 19 Eemon malau mako pale nalat peria tsiam, isaav ighe Tiina toit loolo tauvene. Pa naghe naghita yes tau tipapakur tauzi ve tizorzoor saveeŋ na, leso nawatagh: Tisavsaav sorok, ma tigham uraat toman Maaron tapiri? 20 Pasaa, pooz to Maaron, ene saveeŋ mon mako. Ene Maaron tauu tapiri to izaa to tamtamon. * 1Kor 2:4+; 1Tes 1:5
21 Mindai? Yam aghe nagham saa ŋgar payam? Aghe nalat tomania toon ve nalos gham, ma nalat tomania ŋgar marowa ve ŋgar to loloon pa tauun? * 2Kor 13:10
*4:4: Mbaŋ 23:1; 1Kor 3:13; 2Kor 10:18
*4:5: Ro 2:16; 1Kor 3:8; 2Kor 5:10; Syg 20:12
*4:7: Yo 3:27; Yems 1:17; 1Pe 4:10
*4:8: Saveeŋ to Maaron isaav tauvene: Mboŋ murei, ighe Mesia ilam ve itotoi tapiri ivot ighazooŋ, ene pale yesŋa tamtamon tooni timin kinik ve tigham pooz pa gabua naol isov. Eemon tamtamon siriv to Korin ŋgar toozi ikau. Tighe yes tau tighur ila to Krisi ve tigham Maaron Avuvu tapiri na, tileep imin yes to nugh sambam gha timin kinik wa.
*4:9: Ro 8:36; 1Kor 15:30+; 2Kor 6:4, 11:23+
*4:10: Mbaŋ 26:24; 1Kor 2:3; 2Kor 13:9
†4:12: Grika ve Roma tivelegh yes tau tighamgham uraat pa nimazi. Ve isaav ighe tamtamon tigham ŋgar saghati pa ŋeer eta, ve i iyatu mako, ene paam Grika ve Roma tiveleghi tighe i iroi ve le tapiri mako. Tauvene ŋgar tau Paulus ve mbaŋooŋa siriv titaghoni, ene igham Grika ve Roma siriv tivelegh zi kat.
*4:16: 1Kor 11:1; Pil 3:17, 4:9; 2Tes 3:9