Rau Tau Paulus Iboode Pa Yes Tesalonika Imin Maata
1 Tesalonaika—1 Thessalonians
1
1 Yau Paulus. Yeiru Silas ve Timoti nibood rau tane ilat pa lupuuŋ to Krisi tau aleep izi nugh Tesalonika. Yam tau apaak Tamaan Maaron ve Tiina toit Yesu Krisi, ve aleep ila toozi na. * Mbaŋ 17:1-13
Poia to Maaron izaa tsiam, ve iŋgin gham aleep poia toman lolomim luuma. Onoon.
Yes Tesalonika titotoi ghuruuŋ ila toozi ivot ighazooŋ
2-3 Saawe isov, yei nipapait Tamaan Maaron pa yam asov toman lolomai poia kat, ve nighurghur gham ila suŋuuŋ tsiei, ve matamai iŋgalŋgal ŋgar popoia tau yam aghamgham zi na. Pasaa, yam aghur ila to Krisi ariaaŋ, tauta ipaburigin gham pa ghamuuŋ uraat popoia naol. Ve lolomim pa tamtamon ve aghe agham poghani zi, tauta aghamgham uraat tiina pa uleeŋ zi. Ve yam awatagh aghe Tiina toit Yesu Krisi pale imuul ilam ve igham mulin gham. Tauta ayooz ariaaŋ pa badooŋ pataŋani, ve aghurghur matamim pa muleeŋ tooni. * 1Kor 13:13; Kol 1:4+; 1Tes 4:14+
4 Yam toŋvetaz, yei niwatagh: Maaron loolo igheen tsiam kat, ve isiigh gham amin i le wa. * 2Tes 2:13
5 Pasaa, saawe tau nilam ve nivotia vaaru poia payam, ene saveeŋ mon tau ilat ne mako. Saawe tana, Maaron itotoi tauu tapiri payam, ve Avuvu Patabuyaaŋ igham uratoi gham. Ve aghilaal aghe saveeŋ tau nisavia payam na, yei nighur ila kat. Ve yam taumim awatagh: Saawe tau nileep tomani gham, yei nitotoi ŋgar to Krisi payam, leso niuul gham to ataghoni. * Ro 1:16+; 1Kor 2:4, 4:20
6 Onoon, saawe tau yam alooŋ saveeŋ tsiei ve aghur ila, tamtamon tigham pataŋani tiina payam. Eemon Avuvu Patabuyaaŋ igham gham lolomim poia le poia kat. Ve yam ataghon katin ŋgar tsiei, ve ŋgar to Tiina toit Krisi paam.
7 Tauvene yam amin totoyaaŋ poia ee pa tamtamon tisov to Masedonia ve Akaia tau tighur ila to Krisi na. * 1Tes 4:10
8 Yam amin belo tau tiseŋi gha luutu irau nugh. Pasaa, yam agham saveeŋ to Tiina toit, ve asakia ila irau taan sirivu to Masedonia ve Akaia. Ve tane mon mako. Ghuruuŋ ila tsiam tau iŋarui Maaron na, ene vaaru ilaan irau nugh tisov. Tauvene lemai saveeŋ eta to nisavia pazi muul mako. Pasaa, varumim ta tilooŋa wa. * Ro 1:8
9 Tauvene eval tiina tisasavia varumim tighe saawe tau nilat ve nileep tomani gham, yam alooŋ saveeŋ tsiei, ve aghur murimim pa maaron karomŋa, leso abees pa Maaron tauu. I Maaron tau ileep maata yaryaare irau saawe. * Mbaŋ 14:15
10 Ve tisavi gham tighe yam asasaŋan Maaron Naatu tau i ipaburigini pa mateegh na. I pale ipul sambam ve izilam to igham mulin ghiit pa aatyavyav to Maaron tau murei pale ivot. * Ro 5:9; Pil 3:20; 1Tes 5:9; Tit 2:13