3
Krisi aliiŋa iŋarui lupuuŋ to nugh Sardis
1 “Aŋela tau iŋgin lupuuŋ tsiau tau tileep izi nugh Sardis na, ubood saveeŋ ila pani tauvene:
‘Ŋeer tau Maaron Avuvu liim ve ru tileep tomania, ve ikis pitum liim ve ru na, aliiŋa ilat payo ighe: * Syg 1:4, 16
‘Ŋgar ve uraat tau yo ughamgham zi na, yau nawatagh zi tisov. Tamtamon tipapait ghom tighe lepoogh tsiam to anunuun, ene iyaryaaŋ kat. Eemon yau naghita ghuruuŋ ila tsio, ene imaat wa. 2 Ugheen irao! Uburig, ve upalot ghuruuŋ ila tsio ŋgiira tau ighengheen na. Mako pale isov kat. Yau nasaav tauvene pasaa, naghit ghom naghe ŋgar ve uraat tsio, ene iduduuŋ geeg ila Tamaŋ Maaron maata soone. 3 Aazne, yo umin ŋeer tau igheen le loolo iveegh. Tauvene utoor ŋgar tsio. Saveeŋ tau muuŋ tisavia payo gha ughamu na, matam iŋgali muul ve utaghoni. Isaav ighe uburig mako, yau aat nalat napateeŋ ghom imin ŋeer to umbuuŋ. Pasaa, saawe to namuul nalam, yo uwataghi mako. * Mk 13:33; 1Tes 5:2-6; 2Pe 3:10
4 ‘Eemon yam to nugh Sardis, tamtamon tsiam siriv tiŋgin tauzi poi, ve tipatiŋtiŋai nonoghiiŋa toozi mako. Tauvene yes popoiazi irau to tinonogh zi pa nonoghiiŋa pisosooŋa, * Nonoghiiŋa pisosooŋa, ene imin ilaal pa yes tau gabuazi ve ŋgar toozi iŋgalaaŋ ve iduduuŋ mon ila Maaron maata. Ve tiparav ariaaŋ ve tiliiv tovaaŋ naol to Sadan.
ve yeŋa nilup ghei pa laghooŋ. * Syg 6:11, 7:9+
5 ‘Isaav ighe tamtamon eta iyooz ariaaŋ ve iliiv tovaaŋ, ene aat yau nagham le nonoghiiŋa pisosooŋa to inonogh ghi pani. Ve eeza tau igheen ila rau to lepoogh maata yaryaare na, irau namusu ilale mako. Pale navotia tamtamon tana eeza ila Tamaŋ Maaron tomania aŋela tooni naghozi, ve naghe i tamtamon tsiau. * Mt 10:32; Lu 10:20; Syg 19:8, 20:12, 21:27
6 ‘Tamtamon tau ighe le taliiŋa, i aat ilooŋ saveeŋ tau Maaron Avuvu isasavia pa lupuuŋ to Krisi.’
Krisi aliiŋa iŋarui lupuuŋ to nugh Piladelpia
7 “Aŋela tau iŋgin lupuuŋ tsiau tau tileep izi nugh Piladelpia na, ubood saveeŋ ila pani tauvene:
‘Ene saveeŋ to Ŋeer tau patabuyaaŋ kat ve ighamgham ŋgar onoon mon. I ta ikis ki to David. † Saveeŋ ziiri tane, ŋgara tauvene: Yesu iŋgin gabua naol isov ve ighamgham pooz pazi imin muuŋ David igham pooz pa yes Israela. Saa ŋgar tau i ighe ighamu, ene i irau ighamu. Gabua eta irau ikeeka mako.
Tauvene isaav ighe i ikaak ataman, tamtamon eta irau ipoona muul mako. Ve isaav ighe ipoon ataman, eta irau ikaako muul mako. I aliiŋa ilat payo ighe: * Syg 1:18, 19:11
8 ‘Ŋgar ve uraat tau yo ughamgham zi na, yau nawatagh zi tisov. Onoon, yo tapirim tiina mako. Eemon matam kisin saveeŋ tsiau ve utaghoni, ve upaisamun ezag mako. Ughita. Yau nakaak ataman ee ila naghom wa. Ve tamtamon eta irau ipoona mako. ‡ Saveeŋ ziiri tane, ŋgara tauvene: Krisi igham eez poia ivot pa yes Piladelpia to tigham uraat tooni. * 1Kor 16:9; 2Kor 2:12
9 Yau nawatagh: Yuda siriv tighamgham pataŋani payo. Zeran tana tigham ezazi sorok tighe yes Yuda. Eemon tigham karom. Pasaa, yes titaghon duduŋai Yuda ŋgar toozi mako. Yes tileep ila Sadan lupuuŋ tooni. Tauvene yau aat nagham zi tilat tiput aghezi ila aghem puughu, ve tipakur ghom. Leso tighilaal tighe yau lolog igheen tsio kat. * Is 60:14; Ro 2:28; Syg 2:9
10 Pasaa, yo matam kisin saveeŋ tsiau ve utaghoni, ve uyooz ariaaŋ pa badooŋ pataŋani. Tauvene yau aat napaghau ghom pa tovaaŋ tiina tau pale ivot pa tamtamon tisov to taan. 11 Malau mako pale nalat. Tauvene uyooz ariaaŋ, ve ukis ŋgar to Maaron tau igheen tsio na tuŋia. Mako pale atuya tsio tau isasaŋan ghom na, irau ughamu mako. Pa atuya tawe, ene to yes tau tiyooz ariaaŋ ve tiliiv tovaaŋ. * 2Tim 2:12; Hib 10:36+; Syg 2:25
12 ‘Isaav ighe tamtamon eta iyooz ariaaŋ ve iliiv tovaaŋ, ene yau aat naghuru imin rir paghuuna to ipabood rumei to Maaron tsiau. I pale ileep tuŋia igharau Maaron. Irau tipasu muul mako. Ve yau aat nabood ezag paaghu, tomania Tamaŋ Maaron eeza, ve Tamaŋ Maaron nugh tooni eeza paam izala tamtamon tana paavo. Nugh tawe, ene Yerusalem paaghu tau igheen to Maaron tsiau izi nugh sambam, ve izilam. * Ga 4:26+; Hib 12:22; Syg 14:1, 21:2
13 ‘Tamtamon tau ighe le taliiŋa, i aat ilooŋ saveeŋ tau Maaron Avuvu isasavia pa lupuuŋ to Krisi.’
Krisi aliiŋa iŋarui lupuuŋ to nugh Laodisia
14 “Aŋela tau iŋgin lupuuŋ tsiau tau tileep izi nugh Laodisia na, ubood saveeŋ ila pani tauvene:
‘Ene saveeŋ to ŋeer tau ighe: “Onoon” pa saveeŋ mbuaaŋ naol isov to Maaron, ve igham anoŋazi ivot ila uraat tooni. I iyooz ariaaŋ ve ipariaaŋ saveeŋ onoon toman loolo eemon. Ve i imin puughu pa gabua naol isov tau Maaron ighur zi na. Aliiŋa ilat payo ighe: * Yo 1:3+; 2Kor 1:20; Kol 1:15+
15 ‘Ŋgar ve uraat tau yo ughamgham zi na, yau nawatagh zi tisov. Yo umin yaa tau ituntun geeg mako, ve iyauŋ geeg mako. Yau naghe yo uleep ila ŋgar ru tane eta, o poi! § Nugh ee tau igharau nugh Laodisia na, lezi yaa tuntunu tau iuluul yes moroghooŋa. Ve nugh ite tau igharau zi na, lezi yaa yauŋa tau poia kat pa ghunuuŋ. Eemon nugh Laodisia lezi yaa poia eta igharau zi mako.
16 Eemon mako. Yo uleep bodbodaaŋ imin yaa tau ituntun geeg mako, ve iyauŋ geeg mako. Tauvene ugham ghau ateg inaunau, ve rigmon kanaŋ naluaar ghom uvot pa avog. 17 Pasaa, yo usavsaav ughe: “Yau tane, kuaz tauu. Nambool pa gabua eta mako. Narau gabua naol isov.” Eemon yau naghit ghom le lolog isaghatin ghom. Pasaa, yo uleep saghat, ve mbolaaŋ tiina igham ghom. Ve matam ikumkuum, ve lem nonoghiiŋa to ipoon tinim mako. Eemon lem ghilalooŋ mako. * Lu 12:21; 1Kor 4:8
18 Tauvene yau nasaav payo: Yo aat ulam tsiau, ve ughol lem gol tau yav ighani le muun ighau pani ve iŋgalaaŋ kat. Leso umin kuaz tauu to nugh sambam. Ve yo aat ughol lem nonoghiiŋa pisosooŋa, leso upoon tinim pani. Mako pale tighit ghom tinim ŋginaaŋa, ve mayam. Ve ughol lem marasin pa matam. Leso ughuru ila matam, ve igham matam poia ve ughita nugh. * Is 55:1; Mt 13:44; 1Pe 1:7; Syg 7:13+
19 ‘Tamtamon tisov tau yau lolog pazi na, nayaonyaon zi, leso napaduduuŋ zi. Tauvene naghe utoor ŋgar tsio, ve uzuari ghom le ŋgar tsio iduduuŋ kat. * 1Kor 11:32; Hib 12:5
20 Ughita. Yau nayozyooz ila ataman aavo, ve naseŋseŋ ataman. Isaav ighe tamtamon eta ilooŋ aliŋag ve ikaak ataman payau, yau aat naloŋ nala tooni, ve yeiru nivalupu ghei pa ghanghaniiŋ. * Yo 14:23
21 ‘Isaav ighe tamtamon eta iyooz ariaaŋ ve iliiv tovaaŋ, ene aat yau nayok pani to yeiru nileep ila niag to ghamuuŋ pooz, imin yau nayooz ariaaŋ ve naliiv tovaaŋ, tauta yeiru Tamaŋ nileep ila niia to ghamuuŋ pooz. * 2Tim 2:12; 1Kor 6:2
22 ‘Tamtamon tau ighe le taliiŋa, i aat ilooŋ saveeŋ tau Maaron Avuvu isasavia pa lupuuŋ to Krisi.’ ”
*3:3: Mk 13:33; 1Tes 5:2-6; 2Pe 3:10
*3:4: Nonoghiiŋa pisosooŋa, ene imin ilaal pa yes tau gabuazi ve ŋgar toozi iŋgalaaŋ ve iduduuŋ mon ila Maaron maata. Ve tiparav ariaaŋ ve tiliiv tovaaŋ naol to Sadan.
*3:4: Syg 6:11, 7:9+
*3:5: Mt 10:32; Lu 10:20; Syg 19:8, 20:12, 21:27
†3:7: Saveeŋ ziiri tane, ŋgara tauvene: Yesu iŋgin gabua naol isov ve ighamgham pooz pazi imin muuŋ David igham pooz pa yes Israela. Saa ŋgar tau i ighe ighamu, ene i irau ighamu. Gabua eta irau ikeeka mako.
*3:7: Syg 1:18, 19:11
‡3:8: Saveeŋ ziiri tane, ŋgara tauvene: Krisi igham eez poia ivot pa yes Piladelpia to tigham uraat tooni.
*3:9: Is 60:14; Ro 2:28; Syg 2:9
*3:11: 2Tim 2:12; Hib 10:36+; Syg 2:25
*3:12: Ga 4:26+; Hib 12:22; Syg 14:1, 21:2
*3:14: Yo 1:3+; 2Kor 1:20; Kol 1:15+
§3:15: Nugh ee tau igharau nugh Laodisia na, lezi yaa tuntunu tau iuluul yes moroghooŋa. Ve nugh ite tau igharau zi na, lezi yaa yauŋa tau poia kat pa ghunuuŋ. Eemon nugh Laodisia lezi yaa poia eta igharau zi mako.
*3:18: Is 55:1; Mt 13:44; 1Pe 1:7; Syg 7:13+