4
Keriso hameigini kamaru ina Kerisonaga tingini homane mbiraore kamago ogo
1 I̱ Anduane Homogonaga biabe biaga kogonaga garabaya agali kogo i̱na tíhondo hongo howa laro. Ngode Datagaliwabehanda tí olayangi howa tíhondo agua bialu holene nga layadaguaore bialu halimu.✡ Eb 3.1, Pb 1.27, Kl 1.10, 1 Te 2.12, Pm 1, 9 2 Tíni mo dindi ho ha hogorale bu ha ema nabi howa hibu la bigi bialu halimu. Tínaga gubalini holene walia halu tíni biamogo bigi bigi bialu halimu.✡ Ab 20.19, Ga 5.22-23, Kl 3.12-13 3 Mo palia holeneme tí mo bimaga ho helaga ngagoni. Mo palia holene ogonime mini mbiraore holene Ngode Datagaliwabe Dinini ibugua ngiaganego bayuwa yania ho halimu.✡ Kl 3.14-15 4 Mini dunu bia ho holene tínaga wilo Ngode Datagaliwabehanda tí olenego ogoni mbiraore ngadagua tingini homane mbiraorebi ibu Dininibi mbiraore ka.✡ Lm 12.5, 1 Ko 12.4, 12.11-12, Eb 1.18, 2.16-18 5 Anduane Homogobi mbiraore ka. Mini mbiraore wulenebi mbiraore nga baboraya bulenebi mbiraore nga.✡ Yo 10.16, 1 Ko 1.13, 2 Ko 11.4, Ga 3.27-28, Hi 6.6 6 Ngode Datagaliwabe mbiraore kago ibu wali agali bibahendenaga Aba howa ibu bibahendenaga Anduane Homogo ka. Ibugua ina bibahendeha howa biabe biaga ka.✡ Lm 11.36, 1 Ko 12.6
7 Keriso ibugua ibunaga biamogo bia holene ngadagua ina bibahende hangu hanguhondo biamogo bulene muguberu ta halu ngini.✡ Lm 12.3, 12.6, 1 Ko 12.11 8 Anduane Homogonaga mbugani lo ngadagua ogo,✡ Iba 68.18, Kl 2.15
Ibu hari daligahaore iraga halu pialu howa
ibugua garabayaru dewa haru pene.
Ibugua wali agalihondo biamogo bulene muguberu ta halu mini,
lalu gilibu nga. 9 Anigo, Ibu hari daligahaore iraga halu pialu, ledagoni irane agibe. Bi ogoninaga irane ogo. Ala ibu dindihaore dalini.✡ Yo 3.13 10 Dindihaore dalinigo ogoni ibu dege hari daligahaore dahabaneha iraga halu penego mbiraore ibu ka. Ibugua daligahabi dindihabi bibahendeoreha ibuni haame holenaga ani bini.✡ Hi 4.14, 9.24 11 Ibunioreme wali agalihondo biamogo bulene muguberu ta halu mini. Mugube uru ale mini. Maru ti abosolo helo mialu maru ti Ngode Datagaliwabe mana latagi haga helo mialu maru ti Bi Mana Debene lamima piaga helo mialu maru ti wali agali haru haga helobi lawai haga helobi mialu bini.✡ Lm 12.7, 1 Ko 12.28, 2 Ti 4.5 12 Keriso ibugua ani binigo irane ogo. Ngode Datagaliwabenaga wali agali bibahendeme ibunaga biabe bia helo mo manda manda bia howa Kerisonaga tingini mo anda halu hongo helonaga ibugua ani bini.✡ 1 Ko 12.7, Eb 1.23, 2 Ti 3.17 13 Ani biyagome ina bibahende mandagi howa ina mini mbiraore wulenebi Ngode Datagaliwabenaga Igini manda bulenebi mbiraore holeberama. Ina wali agali mini bogabi howa Keriso ibu daliga timbuniore kadagua inabi anda ho daga howa holeberama.✡ 1 Ko 14.20, Kl 1.28, 2.2 14 Ani howa waneiginime mini dewa nawi hagadaguabi puyabume iba mo yaribu bia haragola mbirale ibani ngago pulo yu puibu daibu biagadagua bialubi agali mo hondo hagane bu karume wali agali ko ngagoha pelonaga mo guya halu mana tinime wabu wini ngaru hangu lawai haga bu karubi ndo holeberema.✡ Ais 28.9, 1 Ko 14.20, 2 Ko 2.17, Hi 13.9 15 Ani ndo ina bibahendeme mana beramaligo bialu howa gubalini holenebi henene hangu lolenebi mo tene halu inanaga haguane Keriso ibuha anda ho daga holene nga.✡ Eb 1.22, 4.25, Kl 1.18, 1 Yo 3.18 16 Ibugua ina haru haragola tinginini hene dege bibahende tigatiga gimbu buwa gimbu biaga kuni kagome tingini mo mbiraore haga ka. Tinginini hene degeru hangu hangu howa tini biabe bulene ngadagua bialu kagola gubalini holeneme tingini ibuni bibahende mo anda halu hongo halu haga.✡ Kl 2.19
Kerisoha holene gahenge ngago ogo
17 Anigo i̱na Anduane Homogonaga minini howa bi mbira buleneore ngago manda bialu larogo ogo, Wali agali Ngode Datagaliwabe manda nabi karume hagadagua nahalimu. Tigua galone ndo mitangi biagabi✡ Lm 1.21, 1 Pi 1.14 18 tinaga mini arumahebi ka. Tinaga miniha manda nawibi mangahebi kago holene gahenge Ngode Datagaliwabehanda ngiaganego tihondo namini ka.✡ Ab 26.18, Ga 4.8, Eb 2.12, 1 Te 4.5 19 Ti taga holene embedahe howa tini mana ko bulene ngagohondo mialu mana ko tara tara nabuleneore ngaru biaabo halu haga ka.✡ Kl 3.5
20 Kerisonaga mana lo manda birimigo ogonibi ndo. 21 Ibunaga mana tí hale harimigoni. Tí ibunaga talima piaga howa Yasuha henene lolene ngago tigua tí lawai hayagoni. 22 Tíbi nde mini ala tawenaga biaga wiaru dege bialu harimigoni wahalimu. Mini ala tawe ogonime tíni mo hondo halu mo ko holenebi mana ko ngaru bulenaga tínaga bu miniha dimagoli holenebi ngaru wahai halimu.✡ Lm 6.6, 8.13, Eb 2.2-3, 4.17, Kl 3.9, Hi 12.1, 1 Pi 4.3 23 Tínaga gubalinibi minibi mo gahengeore holene nga.✡ Lm 12.2, Kl 3.10 24 Mini gahenge karulalimu. Ngode Datagaliwabehanda mini gahenge ibuni ale wabinigo ogonime holene heneneorebi mana tigabibi bayalebi walia haga.✡ Pig 1.26, Lm 6.4, Eb 2.10, Kl 3.10
25 Anigo ina bibahende Kerisonaga tinginiha hene dege howa homane mbiraore kamagonaga tindule wahalu tí bibahendeme tíni Keriso hameiginiruhondo henene dege laga bialu halimu.✡ Seg 8.16, Lm 12.5, Kl 3.8-9 26 Tí keba harimiyagua nde keba ogonime tí ko maru bilimulo mo bia holigo de hondo halimu. Tígua keba ho haabo ho kamiore dege ni paluani hondo halimu.✡ Iba 4.4, Ya 1.19-20 27 Dama Heyolabe anda ibilo henge mbira namilimu.✡ 2 Ko 2.10-11, Ya 4.7, 1 Pi 5.9 28 Wali agali ala pagebibi heneru ti lone page nabi ti henemane holenagabi wali agali yagibano karu biamogo bulenagabi ti yolo biabe bulene nga.✡ 1 Te 4.11, 2 Te 3.8, 3.11-12 29 Bi lalu howa mo ko holene bi nalalimu. Bi bayale biamogo bulene bibi mo hongo holene bibi tíni buru padamiru ale mo yu anda ibulene bibi bi uruni ale lalimu. Tígua bi ani laramigome wali agali hale hararu ti mo bayale holebira.✡ Eb 5.4, Kl 3.8, 3.16, 4.6, 1 Te 5.11 30 Tígua Ngode Datagaliwabe Dinini mo tandaga nahalimu. Tí Ngode Datagaliwabenaga kami lalu walia holene ibunaga Dinini íbu ka. Hamaro bulene Horo ibirangi Ngode Datagaliwabehanda tí golope heneneore holebira lalu manane ibunaga Dinini íbu kagoni.✡ Ais 63.10, Lm 8.23, Eb 1.13-14, 1 Te 5.19 31 Handabe manga ho haabo holenebi gungu abale porabu para holenebi keba holenebi wahai halimu. Bi ko dalimu lolenebi mege bialu lolenebi nalalimu. Bu habaneha lembo holene ale mbira nawilo halimu.✡ Kl 3.8, 3.18-19, Ta 3.2-3, 1 Pi 2.1 32 Ani nabi turubini dege bigi bialu bu habane gedaore howa mbiralime emene liahe mbira birago la nabi wahaga haga bialu Ngode Datagaliwabehanda Kerisonaga minini howa tínaga ko birimigo domo wahayadagua tíguabi nde la nabi wahalimu.✡ Md 6.14, 18.22-35, Mg 11.25, 2 Ko 2.10, Kl 3.13
✡4:1: Eb 3.1, Pb 1.27, Kl 1.10, 1 Te 2.12, Pm 1, 9
✡4:2: Ab 20.19, Ga 5.22-23, Kl 3.12-13
✡4:4: Lm 12.5, 1 Ko 12.4, 12.11-12, Eb 1.18, 2.16-18
✡4:5: Yo 10.16, 1 Ko 1.13, 2 Ko 11.4, Ga 3.27-28, Hi 6.6
✡4:7: Lm 12.3, 12.6, 1 Ko 12.11
✡4:11: Lm 12.7, 1 Ko 12.28, 2 Ti 4.5
✡4:12: 1 Ko 12.7, Eb 1.23, 2 Ti 3.17
✡4:13: 1 Ko 14.20, Kl 1.28, 2.2
✡4:14: Ais 28.9, 1 Ko 14.20, 2 Ko 2.17, Hi 13.9
✡4:15: Eb 1.22, 4.25, Kl 1.18, 1 Yo 3.18
✡4:18: Ab 26.18, Ga 4.8, Eb 2.12, 1 Te 4.5
✡4:22: Lm 6.6, 8.13, Eb 2.2-3, 4.17, Kl 3.9, Hi 12.1, 1 Pi 4.3
✡4:24: Pig 1.26, Lm 6.4, Eb 2.10, Kl 3.10
✡4:25: Seg 8.16, Lm 12.5, Kl 3.8-9
✡4:27: 2 Ko 2.10-11, Ya 4.7, 1 Pi 5.9
✡4:28: 1 Te 4.11, 2 Te 3.8, 3.11-12
✡4:29: Eb 5.4, Kl 3.8, 3.16, 4.6, 1 Te 5.11
✡4:30: Ais 63.10, Lm 8.23, Eb 1.13-14, 1 Te 5.19
✡4:31: Kl 3.8, 3.18-19, Ta 3.2-3, 1 Pi 2.1
✡4:32: Md 6.14, 18.22-35, Mg 11.25, 2 Ko 2.10, Kl 3.13