Lomo
Polohanda Keriso hameigini Lomoni hearuhondo beba ogo gilibu wia hene.
Mbuga ogoha gilibu ngarunaga nemandi ogo
Polohanda Keriso hameigini Lomoni hearuhondo beba gilibu wia henego irane ibu ti hearia mani nenege pole manda buwa gili bini.
Polo ibuni lo manda bialu, Keriso hameigini Lomoni karu heba howa i̱na ti biamogo bialu Yasunaga bi mana lawai holebero. Ani lawai harogola tigua nde i̱ biamogo bialu dindi mini Sebenaha Bi Mana Debene lamima polebero, lo manda bini.
Polohanda Ngode Datagaliwabe Bi Mana Debene lawai henedagua Keriso hameigini Lomoni hearume bayuwa manda bilo ibu bebani gili bialu tihondo wia hene.
Ibugua lalu, Tí mitangi bialu Ngode Datagaliwabehondo tínaga bi la haruli, lalu lamini. Ani lowa Bi Mana Debenenaga teneore lamialu lalu, Ngode Datagaliwabehanda ibuhondo mini mbiraorewi karu tihondo, Í̠ mini tigabiwi ke, lagago Bi Mana Debeneme walia haga ka. Be 1.17 gilibu nga.
Polohanda bi layagonaga irane agua lowa garealo mialu Yu wali agalirubi wali agali tara tararubi Ngode Datagaliwabehanda tihondo, Í̠ mini tigabiwi ke, lelo bibahende ta nabi karume Yasu Kerisohondo mini mbiraore wulene nga. Mini mbiraore wiragome Yasu Kerisoha ho gimbu bu howa holene gahenge yu haga ka. Ani bu kagome Ngode Datagaliwabenaga mo palia holene yu howa ko bulenenaga hongomebi homolenenaga hongomebi daribaho ngaria Ngode Datagaliwabe Dinini ibugua golope haga ka.
Be 5.1–8.39 uruniha Polohanda Mana lowini ngagonaga irane langialu, Ko bulene koorene ko ngago walia hole Ngode Datagaliwabehanda Mana lowini ngago ngini, lene. Ani lowa ibugua bi mende lalu, Ngode Datagaliwabe Dinini ibunaga hongome ina Yasu Kerisoha ho gimbu bu helaga ka, lalu gilibu wini. Ani buwa Polohanda lo manda bialu Yu wali agalibi wali agali tara tarabi Ngode Datagaliwabehanda ti bibahende ta nabihondo pele mulene manda biaga ka. Yu wali agalime Yasuhondo mini mbiraore wulene hame nale hayagola Ngode Datagaliwabehanda manda biyadagua Yasu Kerisoha howa ibunaga pele mulene wali agali tara tarahondo mini. Yu wali agalime maniore Yasuhondo mini mbiraore wulebira Polohanda manda bini.
Gilibu maro bulene kaware ngelowa Keriso hameiginirume bialu holenenaga mana mitangi bialu Ngode Datagaliwabehondobi gabumane karuhondobi wali agali ta nabi karuhondobi gubalini howa bialu holene ngagonaga gilibu nga. Ani gili buwa Polohanda ibunaga nenegeruhondo turu holene bi lawia halu Ngode Datagaliwabe mini yaraga hene.
Bu̱lu̱ baga buwa kuni gilibu ngago
1.1-17
Gili binigonaga irane 1.18–3.20
Wali agali bibahendeore nakarulape kama lenego 3.21–4.25
Kerisohondo mini mbiraorewi kago mini tigabiwi ka, lenego 5.1–8.39
Kerisoha howa gahenge holene ngago 9.1–11.36
Ngode Datagaliwabehanda Isaraele wali agalihondo bule manda bu winigo 12.1–15.13
Keriso hameiginime bialu holene mana ngago 15.14–16.27
Lamaro bialu nenegeruhondo bi lawia henego
1
Polohanda abosolo biabe binigo irane ogo
1 I̱ Polo Keriso Yasunaga biabe bia haga kogo howa Ngode Datagaliwabehanda i̱ abosolo holiya dabowa ibunaga Bi Mana Debene lamuliya olo helenego kogoni.✡ Ab 9.15, 13.2, 22.21, 1 Ko 1.1, Ga 1.15 2 Bi Mana Debene ogoni bamba Ngode Datagaliwabehanda ibunaga mana latagi hagaruha howa, Ngulebero, lalu lowinigo Anduane Homogonaga mbugani gilibu winigo nga.✡ Ab 26.6, Lm 3.21, 16.25-26, Ga 3.8, Ta 1.2 3 Bi Mana Debene ogoni Ngode Datagaliwabe Igini inanaga Anduane Homogo Yasu Keriso henego kagonaga lo nga. Ibu dindi agalihayaginaga ibu Debidi aguanene hene.✡ Md 22.42, Lg 1.32, Yo 1.14, Ab 2.30, Lm 9.5, Ga 4.4, 2 Ti 2.8 4 Ibu Ngode Datagaliwabe hayaginaga walia halu ibunaga hongo gibioregome ibuni mo heya howa ibu Ngode Datagaliwabe Iginiore inanaga loma biaho helenego ka walia hene.✡ Ab 13.33, Hi 9.14 5 Wali agali dindi bibahendeni karu i̱na Keriso kagoria haru ibalu tigua ibuhondo mini mbiraore wilobi ibugua bia laradagua bilobi Ngode Datagaliwabehanda Kerisoha howa i̱ abosolo kogo howa Kerisonaga biabe ogoni bia holiya i̱hondo ngiya.✡ Ab 26.16-18, Lm 12.3, 15.18, 1 Ko 15.10, Ga 2.7-9, Eb 3.8 6 Wali agali dindi bibahendeni karu larugo Lomoni kamirunagabi laru manda bilimu. Tíbi Yasu Kerisonaga halimulo Ngode Datagaliwabehanda olene. 7 Irane ogonigo Lomoni bibahende kamiru Ngode Datagaliwabehanda tí gubalini howa ibunaga halimulo olayaru i̱na tíhondo beba ogoni gilibu wia haro.✡ Dag 6.25-26, 1 Ko 1.2-3, 2 Ko 1.1, Ga 1.3, Eb 1.2, 1 Te 4.7
Ina Aba Ngode Datagaliwabebi Anduane Homogo Yasu Kerisobi libugua tíhondo biamogo bia holenebi mo palia holenebi ngilo hamelo ko.
Polohanda Ngode Datagaliwabehondo ka̱i̱ lalu henego ogo
8 Bi mbira ala lolene manda bidogo laro. Tígua mini mbiraore wu kamigoni wali agali dindi bibahendeni karume hale halu kagonaga i̱na tí bibahende mitangi bialu Yasu Kerisoha howa Ngode Datagaliwabehondo turu halu ka̱i̱ lalu ko.✡ Pb 1.3, Kl 1.3-4, 1 Te 1.2, 1.8 9-10 Bi larogo heneneore laralo Ngode Datagaliwabe ibu manda biai ka. I̱na Ngode Datagaliwabe ogoni gubaliniore howa ibunaga biabe bia halu ibu Igini Yasu Kerisonaga Bi Mana Debene lamialu ko. I̱na Ngode Datagaliwabehondo bi lalu howa tí mitangi biaabo halu tínaga la haruligo ibu manda bu ka. Ibugua i̱ tí kamiria ibulene hame ledayagua henge ngilo ibuhondo bi lamialu ko.✡ 2 Ko 1.23, Eb 1.16, Pb 1.8, 1 Te 2.5, 2.10, 3.10, 2 Ti 1.3✡ Ab 19.21, Lm 15.23, 15.32, 1 Te 3.10, Ya 4.15 11 Tí de handalu Ngode Datagaliwabe Dinini ibugua mo bayale holene ngiaga ngaru tí heba lo manda bialu tínaga mini hongo helo langule i̱ ibua ho ko. 12 Bi larogo irane tígua mini mbiraore ngamigome i̱ biamogo bilimulobi i̱na mini mbiraore ngogome tí biamogo bialubi inane biamogo bia biamogo bia bialu hami̱yanaga laro.
13 I̱ hamene mbaliniru-o tígua mbira ogoore manda bilimulo laro. Ala i̱na tí hemiria nenege ibule lowa dewa halu manda bigi bu haabo harugo biabe bulene wiarume i̱ yani haabo haya. I̱na dindi tara tarani howa Yu wali agali ndo tara tara karume Yasuhondo mini mbiraore wilonaga biabe bialu harudagua tí kamiria íbu howa wali agali maru karume Yasuhondo mini mbiraore wilimulo biabe ogoni bule hamelo ko.✡ Yo 15.15-16, Ab 19.21, Lm 15.23, 16.7, Pb 4.17 14 Wali agali dindini holenenaga manda timbunibi karubi manda nabi karubi beba de handaga karubi de nahandaga karubi ti ta nabi bibahendehondo Bi Mana Debene nalami kogome i̱na ti baba dano ho ko. 15 Ani dano ho kogo i̱na tí Lomoni kamiruhondobi Bi Mana Debene langua ho ko.
Bi Mana Debeneha Ngode Datagaliwabenaga hongo holene ogo
16 I̱na Bi Mana Debene karulapeore ngago hondowa taga naharuligo irane Bi Mana Debene ogoninaga hongo holeneme Ngode Datagaliwabehanda wali agali bibahende ibuhondo mini mbiraore wu karu pele miaga ngagonaga taga naharuli. Mana ogoni ala Yu wali agalime hale henego áyu Yu wali agali hangu ndo tara tara karu tibi hale halu ka.✡ Iba 119.46, Mg 8.38, Ab 3.26, 13.46, 1 Ko 1.18-24, 2 Ti 1.8 17 Ngode Datagaliwabehanda ibuhondo mini mbiraorewi karu tihondo, Í̠ mini tigabiwi ke, lagago Bi Mana Debeneme walia haga ka. Mini mbiraore wu haabo kagohondo hangu laga. Ani lagago Anduane Homogonaga mbugani lo ngago ogo, Ngode Datagaliwabehanda ibuhondo mini mbiraorewi kagohondo, Í̠ mini tigabiwi ke, laga ka. Wali agali ani lene karu ti degeme holene gahenge yu holebira, lalu gilibu nga.✡ Hab 2.4, Yo 3.36, Lm 3.21-22, Ga 3.11, Hi 10.38
Wali agali bibahende ko hai hene kamago ogo
18 Wali agali Ngode Datagaliwabe erembira mialu tinaga ko biragome maru karume mana henene ngago manda bulilono hapai haabo halu karu tinaga kohondo Ngode Datagaliwabehanda dahuliya andaga howa ibunaga keba holene waliaho winigo nga.✡ Ab 17.30, Eb 5.6, Kl 3.6, 2 Te 2.12 19 Ani biragohondo pani mulene ngago irane ogo. Ngode Datagaliwabe ibuni kagonaga ibunime mo pani henego wali agalime manda bibehe panigi nga.✡ Yo 1.9, Ab 14.15-17, 17.24-28 20 Ngode Datagaliwabehanda bibahende wabiningi howa ibunaga nahandabehe winiyago ngarubi ibu hongo haabo kagobi ibuniore haabobo kagobi panigi wali agali bibahendeme handai habeheore ka. Ngode Datagaliwabehanda bibahende wabinigo wali agalime hondowa ani manda bibeheore ka. Anigo tigua, Ngode Datagaliwabe ka manda nabi harimadago, lolene henge nawi.✡ Yob 12.7-9, Iba 19.1, Ab 14.17, 17.27, Hi 11.3 21 Tigua Ngode Datagaliwabe ka manda bia bidagoyu ibunaga mini mo yaraga holene ngadagua mo yaraga nahagabi ibuhondo turu halu ka̱i̱ nalagabi ka. Tigua mbirale habane ndogo hangu mitangi biagabi tinaga mini lulu ale arumahe howa biagabi ka.✡ Yar 2.5, Eb 4.17-18 22 Tigua, Mini gigabiwi kama, lagagoyu ti miniwi ndo lulu ale howa laga ka.✡ Yar 10.14, 1 Ko 1.20 23 Tigua Ngode Datagaliwabe haabobo kago mitangi bialu ibunaga mini mo yaraga holene ngago wahowa mbirale gime wabinigo agali alebi ega alebi nogo tara tara alebi tombeme piaga tara tara alebi uruni alego mitangi bialu bi pupu wiaga ka.✡ Man 4.16-18, Iba 106.20, Yar 2.11, Ese 8.10, Ab 17.29
24 Wali agali uruni ale karume tinaga minime dimagoli hara alebi tinaga tinginime tini degedege baba mana tagabiorebi bima pelo Ngode Datagaliwabehanda ti yupe hene ka.✡ Ab 7.42, 14.16, 1 Ko 6.18, Eb 4.18, 1 Te 4.4 25 Tigua Ngode Datagaliwabenaga henene lolene ngago yu wahowa ke̱ holene ngago yu aribia haga ka. Ani buwa tigua mbirale tara tara wabiaga tene Ngode Datagaliwabe kago ibuni wahowa mbirale ibugua wabiniruhondo bi pupu wialu haga ka. Wabiaga tene Ngode Datagaliwabe kago ibunaga mini hangu mo yaraga haabobo holene ngago. Aniore bialu helo laro.✡ Ais 44.20, Yar 13.25, 16.19, Amo 2.4, Lm 9.5, 1 Te 1.9, 1 Yo 5.20
26 Tigua ko ogoni biaabo hagago miniha dimagoli holene tagabi koorene ko ngarubi bima pelo Ngode Datagaliwabehanda ti yupe haga ka. Walime agali heba howa waneigini holene mana winigo wahowa tini degedege mana ko ngubi taraore biaga beda.✡ LBM 18.22-23, Eb 5.12 27 Agalime ogonidagua dege mana winigo wahowa agali tini degedege dimagoli gibiore howa tini mana ko ngubi taraore biaga ka. Ogonidagua ko tagabiore biragonaga Ngode Datagaliwabehanda pani ngi lalu tinime dano bialu kago mulebira.✡ LBM 18.22, 20.13, 1 Ko 6.9
28 Wali agalime Ngode Datagaliwabe mana henene ngago miniha yu holene manga haragome tini mini kome bua hara ale bilo ibugua ti yupe haga ka. Anigo tigua nabulene ngaru biaga ka. 29 Ti ko tara tarame to̱laihe howa uru ale biaga ka. Miniha ko dohe hagabi dimagoli hagabi ko bule lo manda biagabi i̱ nayido agini henge lagabi homelo bagabi gungu biagabi mo hondo hagabi ko andandabi hagabi diburibu lagabi 30 tini guraga guraga biagabi Ngode Datagaliwabe handabe manga hagabi mege biagabi miniha balagala hagabi mine hagabi ko bulene hariga hai biagabi aba ai̱yalanaga bi mo wahagabi 31 ti miniha ko dege mitangi biagabi buliya lalu lo wuwa lahondo hagabi maruhondo turubini nabiagabi dara nahagabi urunidagua bialu haga ka. 32 Tigua Ngode Datagaliwabenaga mana lowini ngagome mana uruni ale bialu karu homolene nga lo ngago manda bia buwa kedange howa mana uruniore biaabo halu haga ka. Uruni hangu ndo maru karume birago hondowabi ti kulo haga ka.✡ Iba 50.18, Hos 7.3, Lm 2.2, 6.21
✡1:1: Ab 9.15, 13.2, 22.21, 1 Ko 1.1, Ga 1.15
✡1:2: Ab 26.6, Lm 3.21, 16.25-26, Ga 3.8, Ta 1.2
✡1:3: Md 22.42, Lg 1.32, Yo 1.14, Ab 2.30, Lm 9.5, Ga 4.4, 2 Ti 2.8
✡1:5: Ab 26.16-18, Lm 12.3, 15.18, 1 Ko 15.10, Ga 2.7-9, Eb 3.8
✡1:7: Dag 6.25-26, 1 Ko 1.2-3, 2 Ko 1.1, Ga 1.3, Eb 1.2, 1 Te 4.7
✡1:8: Pb 1.3, Kl 1.3-4, 1 Te 1.2, 1.8
✡1:9-10: 2 Ko 1.23, Eb 1.16, Pb 1.8, 1 Te 2.5, 2.10, 3.10, 2 Ti 1.3
✡1:9-10: Ab 19.21, Lm 15.23, 15.32, 1 Te 3.10, Ya 4.15
✡1:13: Yo 15.15-16, Ab 19.21, Lm 15.23, 16.7, Pb 4.17
✡1:16: Iba 119.46, Mg 8.38, Ab 3.26, 13.46, 1 Ko 1.18-24, 2 Ti 1.8
✡1:17: Hab 2.4, Yo 3.36, Lm 3.21-22, Ga 3.11, Hi 10.38
✡1:18: Ab 17.30, Eb 5.6, Kl 3.6, 2 Te 2.12
✡1:19: Yo 1.9, Ab 14.15-17, 17.24-28
✡1:20: Yob 12.7-9, Iba 19.1, Ab 14.17, 17.27, Hi 11.3
✡1:23: Man 4.16-18, Iba 106.20, Yar 2.11, Ese 8.10, Ab 17.29
✡1:24: Ab 7.42, 14.16, 1 Ko 6.18, Eb 4.18, 1 Te 4.4
✡1:25: Ais 44.20, Yar 13.25, 16.19, Amo 2.4, Lm 9.5, 1 Te 1.9, 1 Yo 5.20
✡1:27: LBM 18.22, 20.13, 1 Ko 6.9
✡1:32: Iba 50.18, Hos 7.3, Lm 2.2, 6.21