1 Da One In Charge tell Moses 2 fo talk to da Israel peopo one mo time an tell: “Me, Da One In Charge, I yoa God. 3 You guys, no make jalike da peopo do ova dea Egypt side, da place you guys live befo time. An you guys no make jalike da peopo do Canaan side, da place I goin bring you guys. No do tings like dem. 4 You guys gotta do wat my rules tell you fo do, an make shua fo live da way I tell you gotta do. Me, Da One In Charge, I yoa God. 5  ✡ 18:5: Neh 9:29; Ezek 18:9; 20:11-13; Luke 10:28; Rome 10:5; Gal 3:12Make shua you live da way I tell you gotta live, an do wat my rules tell you fo do. Anybody dat do wat my rules tell, dey goin stay alive an get life cuz dey do um. Me, Da One In Charge, da God dass fo real kine.

6 “Nobody suppose to go nea one close relative fo make sex wit dem. Me, Da One In Charge, da God dass fo real kine.

7 “You betta not make sex wit yoa muddah. Az yoa muddah. No make shame fo yoa faddah lidat.

8  ✡ 18:8: Pries 20:11; Rules2 22:30; 27:20“You betta not make sex wit yoa faddah odda wifes, cuz dat make shame fo yoa faddah too.

9  ✡ 18:9: Pries 20:17; Rules2 27:22“You betta not make sex wit yoa sistah, no matta her yoa faddah girl o yoa muddah girl, no matta she grow up da same house wit you, o anodda place.

10 “You betta not make sex wit yoa grandaughta. Dat goin make big shame fo you.

11 “No make sex wit yoa faddah odda wife girl, cuz yoa faddah her faddah too. She yoa sistah.

12  ✡ 18:12: Pries 20:19-20“No make sex wit yoa faddah sistah. She yoa faddah close relative.

13 “No make sex wit yoa muddah sistah. She yoa muddah close relative.

14 “No go nea yoa faddah braddah wife fo make sex wit her. No make shame fo yoa faddah braddah lidat. She yoa auntie.

15  ✡ 18:15: Pries 20:12“No make sex wit yoa daughtah-in-law. She yoa boy wife. No make sex wit her.

16  ✡ 18:16: Pries 20:21“No make sex wit yoa braddah wife. No make shame fo yoa braddah lidat.

17  ✡ 18:17: Pries 20:14; Rules2 27:23“If you make sex wit one wahine, no go make sex wit her daughta too. An no go make sex wit her grandaughta. Dey da wahine close relative. Az one real bad kine ting you stay do.

18 “No take yoa wife sistah fo come anodda wife fo you, cuz den dey goin fight. No make sex wit her wen yoa real wife still yet stay alive.

19  ✡ 18:19: Pries 20:18“No go nea one wahine fo make sex wit her wen she get her period, wen she no can come in front me.

20  ✡ 18:20: Pries 20:10“No go make sex wit any odda guy wife, an come pilau lidat fo you no come in front me.

21  ✡ 18:21: Pries 20:1-5“No give any a yoa kids fo make um go thru da fire fo make one sacrifice fo da idol kine god Molek, cuz you guys betta not make my name pilau. Me, Da One In Charge.

22  ✡ 18:22: Pries 20:13“No make sex wit one guy jalike you make sex wit one wahine. Az pilau lidat.

23  ✡ 18:23: Outa 22:19; Pries 20:15-16; Rules2 27:21“No make sex wit one animal, an come pilau lidat. One wahine betta not give her body to one animal fo make sex wit um. Dat mean dey ack jalike peopo an animals not diffren, an az go agains fo do da right tings.

24 “No go do dis kine stuff an make um fo you no come in front me, Da One In Charge. Az how da peopos dat donno me stay make, dat stay live inside da land I goin give you guys, da ones I goin move um outa da land. 25 Dey even make da land pilau awready. So I goin punish da land cuz a all da bad kine stuff da peopo ova dea do. Jalike da land goin bahf up da peopo dat stay dea now. 26 But you peopo gotta make shua you live da way I tell you gotta do, an do wat my rules tell you fo do. An you gotta no do notting dat stay pilau, da kine I tell you bout. Da guys dat born hea an da guys from anodda place dat live wit you guys, same ting, dey betta not do notting dat stay pilau kine. 27 Da peopo dat wen live inside da land befo you guys, dey wen do all dat pilau kine stuff. Dey make da land pilau too. 28 If you guys make da land pilau, da land goin bahf up you guys, jalike da land wen bahf up da peopo dat stay dea befo you guys.

29 “Anybody do any a dese pilau kine tings, you gotta cut dem off so dey not yoa peopo no moa. 30 You guys gotta make shua fo do da stuff I tell dat you guys gotta do. No follow da pilau kine style da peopo dat wen stay dea befo you guys do. No make um fo you no come in front me lidat. Me, yoa God, Da One In Charge!”