Da Good An Spesho Book Rome 10

1 My braddahs an sistahs, you know fo real kine wat I like fo happen fo da Israel peopo? I pray real hard fo God take dem outa da bad kine stuff dey stay do.

2 I can tell you dis bout dese peopo: Dey like go all out fo God, but dey donno da mos importan stuff fo know him fo real kine. 3 Dey donno wat God wen do awready fo make us guys get um right wit him. Cuz a dat, dey try fo get um right wit God how dey like, an dass why dey no like lissen wen he tell um how fo get um right wit him.

4 Christ wen do eryting fo make us come right wit God. Dass wat da Rules wen try fo do, but dat neva get da powa fo do um. So whoeva trus Christ, dey da ones goin get um right wit God.

God Like Take Erybody
Outa Da Bad Kine Stuff Dey Stay Do

(Prieses 18:5; Rules Secon Time 30:11-14; Isaiah 28:16)

5 ✡Moses wen write dis befo time inside da Bible: Fo get um right wit God, da peopo gotta do eryting wat da Rules tell um fo do. Dis wat Moses tell: “Whoeva do eryting da Rules tell um fo do, dey goin get life cuz dey do dat.”

6 ✡Da Bible tell someting diffren den dat too, bout how fo get um right wit God cuz you trus him. Da Bible tell: “No good you go figga inside yoa head, ‘Eh, who go up dea inside da sky?’ ” Eh, dass jalike da guy go up dea fo tell da Spesho Guy God Wen Sen dat we like him fo come back down hea by us guys. 7 Same ting, da Bible tell: “No good you figga inside yoa head, ‘Who go way down inside da groun by da Deep Dark Hole wea da mahke peopo stay?’ ” Eh dass jalike da guy go down dea fo bring Christ back afta he mahke.

8 But da Bible tell dis too: “Da ting God tell, real easy fo undastan cuz jalike stay inside yoa mout an inside you.” Dass da same ting us guys stay teach: Eh, gotta trus Christ! 9 Dat mean, if you tell in front erybody, “Jesus, he Da One In Charge a me,” an you trus inside dat God wen bring Christ back alive afta he mahke, den God goin take you outa da bad kine stuff you stay do. 10 Dass cuz inside you trus God, an den he make you get um right wit him. An dass cuz you tell in front erybody dat Jesus stay Da One In Charge a you, an den God goin take you outa da bad kine stuff you do. 11 ✡Jalike da Bible tell, “Whoeva trus God, no way dey come shame, cuz God goin do eryting wat he tell.” 12 Da Jew guys an all da odda peopos, dey all same same. No mo diffrence. Cuz get Da One Dat Stay In Charge, an he Da One In Charge fo erybody. He goin do plenny fo erybody dat aks him fo kokua dem. 13 ✡Cuz da Bible tell, “Erybody dat aks Da One In Charge fo help um, he goin take um outa da bad kine stuff dey stay do.”

14 But you know wat?! How dey goin aks him fo help um if dey no trus him? An how dey goin trus him if dey neva hear notting bout him? An how dey goin hear bout him if nobody eva tell um bout him? 15 ✡An how dey goin tell peopo if nobody sen um out fo tell peopo? Jalike da Bible tell, “Wen peopo go out fo tell da Good Stuff From God, eh! dass awesome!”

16 ✡But you know, get some Israel peopo dat neva like lissen da Good Kine Stuff From God. Jalike Isaiah tell inside da Bible:

“Eh Boss! No mo nobody dat trus

Da tings dat dey wen hear from us guys!”

17 So den: Fo trus God, gotta lissen da tings he tell. An fo lissen wat God tell, firs gotta hear bout Christ.

18 ✡Wat you tink? You guys tink da Israel peopo neva hear notting, o wat? Fo shua dey wen hear someting! Jalike da Bible tell befo time:

“All ova da world, get peopo dat wen hear da Good Kine Stuff.

Da tings dey tell, go all ova da world fo peopo hear.”

19 ✡An dis anodda ting: “You tink da Israel peopo neva undastan notting?” Moses da firs one tell inside da Bible dat God tell dis:

“I goin do someting fo some odda peopos

Dass not jalike you guys.

An dat goin make you guys jealous.

An I goin do someting fo peopo dat you guys tink stupid,