1 Me ulunguy Joshua urngin e ganong nu Israel nga Shekem. Me non ngak e pi’in pi’lal, nge pi’in yad ma yog e thin rok piyu Israel, nge pi tayugang’, nge pi tolang rok piyu Israel, miyad yib nga p’eowchen Got. 2 Me ga’ar Joshua ngak urngin e girdi’, “Ba’aray e n’en ni nge yog SOMOL, ni Got rok piyu Israel ‘Kakrom e i par pi chitamangimed u ba’nem fare lul’ ni Eufrates, ngu’ur ted fan yugu boch e got. Bagayad e pi ga’ kakrom e Terah, ni chitamngin Abraham nge Nahor. 3 Gu fek e ga’ romed i Abraham u lan fare nam ni bay nga ba’nem e lul’ ni Eufrates mu gu pow’iy u lan e nam nu Kanaan ni ga’ngin. Mu gu pi’ ngak e pi’in owchen ni pire’. Gu pi’ Isak ngak, 4 mu gu pi’ Jakob nge Esau ngak Isak. Gu pi’ ngak Esau fare nam nu Seir ni go’ burey ni nge tafnay, me yan Jakob nge pifak nga Egypt. 5 Mu gol’oeg Moses nge Aron, mu gu girengiy e gafgow nib gel nga daken yu Egypt. Mu gu pow’iyrad nga wuru’; 6 mu gu fek pi chitamangimed nga wuru’ yu Egypt, miyad yib ko fa gi day ni Red Sea fithingan. Me lol’oegrad piyu Egypt ni karbad u chariot nge pi’in yad be yannag ngar mada’gad ko gi day nem. 7 Fa’anra meybilgad ngog nri aram rogon u lan ngorongorrad, mu gu gagiyegnag nge nep’ u thilrad nge piyu Egypt. Mu gu gagiyegnag e day nge yib i tharey piyu Egypt. Ka mu guyed e n’en ni gu rin’ ngak piyu Egypt.

“ ‘Gimed e mu pired u daken e ted ni ba n’uw nap’an. 8 Ma aram mu gu fekmed i yib ko nam rok e pi Amorite, ni yad ma par u ba’ ni ngek e lul’ ni Jordan. Miyad cham ngomed, mu gu gagiyegnag ngam gelgad ngorad. Mi gimed kol e nam rorad, ni gimed be yan nga m’on ma gu be li’rad. 9 Mi Balak, ni ir e pilung rok yu Moab, ni be’ nib mo’on ni fak Zippor, e mael ngak piyu Israel. Me pi’ e thin nge yan ngak Balaam nib mo’on ni fak Beor, ni be wenig ngak ni nge yibil ni nge buch wa’athmed. 10 Machane da gu telig ngak Balaam, ma aram me yibilaymed ni nggu ayuwegmed, mu gu ayuwegmed u pa’ Balak. 11 Mi gimed th’ab e lul’ ni Jordan nga barba’ ngambad nga Jeriko. Me mael piyu Jeriko ngomed, ma ku aram e n’en ni rin’ e pi Amorite ngomed, nge Perizzite, nge Kanaanite, nge Hittite, nge Girgashite, nge Hivite, nge Jebusite. Mu gu gagiyegnag ngam gelgad ngorad. 12 Mu gu gagiyegnag ngar rusgad u nap’an ni gimed be yan i yan nga m’on ni bochan e nge mil fa gal pilung ko pi Amorite ngar chuwgow ko nam rorow. Saydon romed nge gat’ing romed e gathi ir e gagiyegnag nge yodrom. 13 Mu gu pi’ ngomed bang e but’ ni gathi gimed e mu gi’ed e but’ riy, nge bogi binaw ni gathi gimed e mu sunmiyed. Gimed be par riy gimed be kay e grape nge olive ni gathi gimed e mu yunged.’

14 Ma aram me yog Joshua ngak e girdi’ ni ga’ar: “Mu liyorgad ku SOMOL, mi gimed fol rok, mi gimed par ni gimed ba yul’yul’ ngak ni gubin ngiyal’. Mu chuweged e pi got ni i tay pi chitamangimed farad u Mesopotamia ngu Egypt, ya kemus ni go’ SOMOL e ngu’um pigpiggad ngak. 15 Fa’anra der magan’med ngay ni ngam pigpiggad ngak SOMOL, me ere mu duwgiliyed e daba’ e re got ni ngu’um pigpiggad ngak, ko pi got ni i pigpig pi chitamangimed ngorad u lan e nam nu Mesopotamia, ara pi got rok e pi Amorite, ni nam rorad e gimed be par riy e chiney. Machane gag nge girdi’ ko birog e tabinaw e ngu’ug pigpiggad ngak SOMOL.”

16 Me fulweg e girdi’ ni lungurad, “Dariy e n’en nra rin’ ma gamad leamnag ni nggu paged SOMOL nggu pigpiggad ngak yugu boch e got! 17 I SOMOL ni ir e Got rodad e fek pi chitamangidad nge gadad nge chuwegdad ko sib ni ud tayed u lan yu Egypt, ma kad guyed e pi maang’ang nike rin’. I ta’dad nde buch ban’en rodad ko yungi n’en ni u darod riy u fithik’ urngin girdi’en e pi nam. 18 Gadad be yan ma be tuluf SOMOL e girdi’ yad be chuw, ni aram e pi Amorite ni be par u lan e re nam ney. Ere ku er rogomad ni ngu’ug pigpiggad ngak SOMOL; ya ir e Got rodad.”

19 Me ga’ar Joshua ngorad, “Dabiyag ni ngam pigpiggad ngak SOMOL, ya ir ba Got nib thothup ma ba taliyeg. Dabi n’ag fan u wan’ e denen romed nge kireb; 20 ni fa’an gimed ra pag SOMOL ngam pigpiggad ngak yugu boch e got u boch e nam, ma aram e ra pig i cheal ngomed nge gechig nagmed. Ma ra li’med ngam m’ad, ni yugu aram rogon ni i par ni be ngongliy e tin ni bfel’ ngomed ko som’on.”

21 Me ga’ar piyu Israel ngak Joshua, “Danga’! Ya bay ug pired ni gamad be pigpig ngak SOMOL.” 22 Me ga’ar Joshua ngorad, “Gimed e kam manged mich romed ko re bugithin nir ni kam duwgiliyed ni ngu’um pigpiggad ngak SOMOL.”

Me lungurad, “Er rogon, kug pired ni gamad e mich riy.”

23 Me ga’ar, “Ere mu n’iged e pi got nu boch e nam ni bay romed, mi gimed yog ni ngu’um pired ni gimed ba yul’yul’ ngak SOMOL, ni ir e Got nu Israel.” 24 Me ga’ar piyu Israel ngak Joshua, “Bay ug pigpiggad ngak SOMOL ni ir e Got romad, mu ug folgad ko tin keyog ni nggu rin’ed.” 25 Me ngongliy Joshua reb e m’ag ni fan ngak e girdi’ nu Israel e rofen nem, me yog ngorad u rom u Shekem e tin yad ra rin’ nge tin ndab rrin’ed. 26 Me yoloy Joshua e pi motochiyel nem ngalan fare babyor ko motochiyel rok Got. Me fek ba malang nib ga’ nge tay nga tan fare ke gek’iy ni oak u bang nib tabgul ni fan ngak SOMOL. 27 Me ga’ar ngak urngin piyu Israel, “Mu sapgad ko re malang ney! Bay i par ni ir e mich ko tin kadogned. Ke rung’ag urngin e thin nike weliy SOMOL ngodad. Ere bay i par ni ir e mich nib togopluw ngomed, nge ta’med ni dab mu togopluwgad ngak e Got romed.” 28 Me pag Joshua piyu Israel nge bagayad me sul ko gin be par riy ko fare nam.

29 Ma aram me yim’ Joshua, nib mo’on ni fak Nun, ma tapigpig rok SOMOL, nike gaman 110 e duw rok. 30 Miyad k’eyag u daken e girok e binaw u Timnath Serah u Efraim ni ba nam ni go’ burey, ni bay nga lel’och ko Burey ni Gaash.

31 Piyu Israel e ur pigpiggad ngak SOMOL u n’umngin nap’an ni kabfos Joshua, ma nap’an ni yim’ mu ur pired ni yad be pigpig ngak SOMOL u n’umngin nap’an ni kabfos e pi’in yad be yog e thin rok piyu Israel ma yad manang urngin ban’en ni i rin’ SOMOL ni fan ngak piyu Israel.

32 Yilen Josef ni fek piyu Israel u Egypt i yib e ni k’eyag u Shekem u daken fa gi but’ ni chuw’iy Jakob rok fapi pumo’on ni fak Hamor, me Hamor e chitamngin Shekem, ni ra’ay yang e silber e pi’ ni puluwon. Re gi but’ nem e par nike tafnay e pi’in owchen Josef. Gen 33:19; 50:24, 25; Exo 13:19; Act 7:16

33 Me yim’ Eleazar nib mo’on ni fak Aron min k’eyag u Gibeah, chi binaw nem e bay u Efraim ni go’ burey nni pi’ ngak Finehas nib mo’on ni fak.