1 Me yan Samson u rom nga Gaza, me guy be’ ni bpin u rom nma chuway’ ngak mi yow par. 2 Me nang e girdi’ nu Gaza ni bay Samson u rom, miyad yin’ e gin’em nga longob ngu’ur son niged u langan e garog ko re binaw nem ni polo’ e nep’. Ra pired e re nep’ i n’em ni polo’ nde non bagayad, ni be lungurad u wun’rad, “Ngad son niged nge yan i kadbul ma gadad li’ ngem’.” 3 Me par Samson u chob nge lukngun e nep’. Me od me yan i kol fare mban e garog ko binaw nge pug ngalang ni ka reb ni kabay e lok riy nge urngin riy. Me yin’ nga pon nge fek i yan nga bugul e burey ni yira sap riy nga but’ min guy yu Hebron.

4 Tomuren e biney me adag Samson reb e bpin nma par u lan fare loway nu Sorek, ni Delilah fithingan e re pin nem. 5 Me yan fa lali pilung nu Filistia ngak me lungurad, “Ngam bannag Samson ngam nang ko mangfan nrib gel, nge rogon me yag ni ngug gelgad ngak, mm’ag nge par ndabkiyag ni nge rin’ ban’en. Bayi bagamad me pi’ ngom 1,100 yang e salpiy ni silber.”

6 Me ga’ar Delilah ngak Samson, “Wenig ngom, mu weliy ngog ko mangfan ni er fanam gel. Fa’anra ba’adag be’ ni nge m’agem ngam par ndabkiyag ni ngam rin’ ban’en, ma uw rogon nra rin’?” 7 Me fulweg Samson ni ga’ar, “Fa’an yad ra m’ageg nga medlip yil’ i gaf ndawori mlik’ ni yima m’ag ko gat’ing, mu gu par ni ku gu bod feni me’waer e yug girdi’.” 8 Me fek fapi pilung nu Filistia medlip yil’ fapi gaf ndawori mlik’ ni yima m’ag ko gat’ing i yib ngak Delilah, me yib i m’ag ngak Samson. 9 Ma bay boch e pumo’on nike tayrad fare pin nga reb e senggil, me tolul ni ga’ar, “Samson! Keb piyu Filistia!” Me gelnag ir me math’math’ fa yul’ i gaf ni gowa tret ni aw e nifiy ngay. Ma aram miyad par ni ka dawor ra nanged ko uw e be yib gelngin riy.

10 Me ga’ar Delilah ngak Samson, “Ga be aliliy nigeg ma ga be ban nigeg. Wenig ngom mu weliy ngog rogon nrayag ni m’agem be’.” 11 Me ga’ar ngak, “Fa’anra ni m’ageg ko gaf ni kab be’ech ndawor ni maruwel ngay, mu gu par ni kug waer ni bod e yug girdi’.” 12 Me fek Delilah boch e gaf ni kab be’ech me m’ag ngak. Me tolul ni ga’ar, “Samson! Keb piyu Filistia!” Ma ke par boch e pumo’on ni yad be son u lan reb e senggil. Ma fa’ani gelnag ir me math’math’ fapi gaf u pa’ ni gowa tret.

13 Me ga’ar Delilah ngak Samson, “Ka ga be aliliy nigeg ma ga be ban nigeg. Mog ngog rogon e n’en nra rin’ me m’agem be’.” Me ga’ar ngak, “Fa’an ga ra l’ang piyan lolugeg ni medlip yael’ ma ga tay ba richib ngay ngam chichi’iy, mu gu par ni kug me’waer ni bod e yug girdi’.” 14 Me guy rogon nge mol me fek fa medlip yil’ i piyan lolugen nge lifith nga ban’en ni yima lifith e mad ngay. Me fek ba richib nge ning ngay ni nge dabki puf, me tolul ni ga’ar, “Samson! Ke yib e piyu Filistia!” Machane me od me puf piyan lolugen ko fare n’en ni yima lifith e mad ngay.

15 Me ga’ar Delilah ngak, “Uw rogon ni ga be yog ni gab adageg, ma gathi er rogon u wun’um? Nga dalip yay ni kam aliliy nigeg, ma kadawor mu weliy ngog ko mangfan ni er fanam gel.” 16 Me par ngi i me’eryag ngak ni gubin e rran. Me chelban nge ngochan’ Samson ngak ni yigu be me’eryag ngak. 17 Me munmun mri weliy e tin riyul’ ngak ni ga’ar, “Dawor nth’ab piyan lolugeg bi’id. Nap’an nni gargel nigeg mi ni pi’eg nga pa’ Got ni nggu mang ba Nazirite. Fa’an yira th’ab piyan lolugeg, ma ra m’ay gelngig nggu par ni kug me’waer ni bod e yug girdi’.”

18 Fa’ani nang Delilah nike weliy e tin riyul’ ngak, me l’oeg e thin nge yan ngak fapi pilung ko Filistia ni ga’ar, “Ka ta’ab yay ni ngambad, ya ke weliy e tin riyul’ ngog.” Miyad yib ni kar feked e salpiy. 19 Me gurgon Delilah nge mol Samson nga daken ay ngri mol, me pining be’ nib mo’on nge yib i th’ab fa medlip wu’ i piyan lolugen Samson. Me tabab fare pin i gafgownag, ya ke chuw gelngin Samson. 20 Me tolul Delilah ni ga’ar, “Samson! Ke yib e piyu Filistia!” Me od me ga’ar u wan’, “Bay kug gel nigeg mu gu thay ni bod gubin yay.” Ma de nang nike chuw SOMOL rok. 21 Me yib piyu Filistia ra lufed lan mit nruw raba’. Miyad fek nga Gaza ngar m’aged e chen ngak nni ngongliy ko wasey ni bronze, miyad tay ngi i maruwel ngi i bilig e wheat u kalbus. 22 Machane mi i n’uw piyan lolugen i yan.

23 Me mu’ulung piyu Filistia ni ngar madnomgad miyad pi’ ba maligach ni ba ga’ ko fare got rorad ni Dagon. Miyad tang ni be lungurad, “Fare got rodad e ke gagiyegnag kadgelgad ngak e to’ogor rodad i Samson!” 24 Ma fa’ani guy e girdi’ Samson, miyad tang ni yad be pining e sorok ngak fare got rorad ni be lungurad, “Got rodad e ke pi’ e to’ogor rodad ngalan pa’dad, ir e cha’ ni i gathay e nam rodad, ke thang e fan rok bo’or i gadad!” 25 Yad be garus u fithik’ e felfelan’ me lungurad, “Ngan pining Samson nge yib, ya ngi i palag owchadad!” Ma fa’anra feked Samson nga wuru’ e kalbus mu’ur moninggad ngak, minib ni sak’iynag nga thilin e duga’ ko fare naun. 26 Me ga’ar Samson ngak fare pagel ni ir e ke kol pa’ Samson be pow’iy i yan, “Mu fekeg i yan ko fa gal duga’ ni ir e gelngin e re naun ney, ya gu ba’adag ni nggu gif ngay.” 27 Ma re naun nem e ke sug ko pumo’on nge ppin. Ma fa lal i pilung nu Filistia e yad bay u rom ni yad urngin, ma gonap’an dalip e biyu’ e pumo’on nge ppin ni yad bay u daken e chigiy, ni yad be yaliy Samson ma yad be moningnag.

28 Me meybil Samson ni ga’ar, “SOMOL ni Th’abi Tolang, wenig ngom, mu leam nigeg; wenig ngom i gur Got, mu pi’ gelngig e t’ayaney, nggu maruwel ngay e ta’yaney nggu fulweg ngak piyu Filistia labgen lan owcheg nruw raba’.” 29 Me kol Samson fa gal duga’ ni bay u lukngun e naun ni gelngin fare naun, ra barba’ i pa’ me tay nga reb fa gal duga’, nge pi’ 30 me tolul ni ga’ar, “Nggu’un ngak piyu Filistia ko yam’!” Me pi’ fa gal duga’ ni kari musmus gelngin, me puth fare naun nga daken fa lal i pilung nge urngin e girdi’. Ka bo’or e girdi’ ni li’ e ngiyal’nem nge yim’ ko tin ni li’ ni kabfos.

31 Me yib pi walagen ni pumo’on nge girdi’en e tabinaw rok nga p’ening ngar feked mranod ra chibgiliyed nga thilin yu Zorah nge yu Eshtaol, ngalan e re low ni ba’aram nni yan ni chibgiliy Manoah ni chitamngin ngay. Ma aram e ke gaman rliw’ e duw ni i par ni be gafaliy piyu Israel.