1 Me taw nga ba ngiyal’ ni ngan t’ar wom’ngin e woldug ni wheat ngan tay nga naun, me yan Samson ni nge fangechiy le’engin, me fek ba kaming ni kab bitir ni nge pi’ ngak. Me ga’ar ngak e chitamngin le’engin, “Gu ba’adag ni nggu wan nga senggil rok le’engig.” Ma de pag ni nge yan nga senggil. 2 Me ga’ar ngak Samson, “Kug leamnag ni kam fananikay, ere kug pi’ ngak fare pagel ni gimew ba pach. Machane bin bbitir ngak i walagen e kab pidorang ngak. Rayag ni nge yag ngom.” 3 Me ga’ar Samson, “Yaney e ren’en ni gu ra ngongliy ngak e pi Filistine e gathigag e kireb rog!” 4 Me yan i kol dalip miri’ay e gamanman ni fox. Me m’ag p’ebuk’rad ni yu lal’agruw, nra l’agruw me m’ag reb e mol’ nga thilrow. 5 Me tay e nifiy ko fapi mol’, me pag fapi gamanman ni fox ngranod nga daken e yungi flang ko wheat rok e pi Filistine. Nge mo’oruf e wheat ni kan kunuy, nge ku tin e wheat ni kabay u daken fa yungi flang i yan ndawor nth’ab. Miki mo’oruf yu chuwo’ i gek’iy ni olive. 6 Me fith e pi Filistine ko mini’ e ke yodrom. Miyad pir’eg ni Samson, ni bochan e chitamngin le’engin ni be’ nu Timnah e ke fek le’engin Samson ke pi’ ngak fare pagel ni yow ba pach Samson. Me yan e pi Filistine ngar urfiyed fare pin nge yim’, miyad urfiy e naun rok e chitamngin. 7 Me ga’ar Samson ngorad, “Ara’ rogon e ngongol romed! Nggu micheg ngomed ndab gu tal nge yan i mada’ ko ngiyal’ ni kug fulweg taban ngomed!” 8 Me cham ngorad nrib el merin nge li’ bo’or i yad. Me yan i par ngalan e yiy ni bay u taban bangi rech u Etam.

9 Me yib piyu Filistia ngarbad ra pired nga Judah, ngar m’aged e mael ko binaw nu Lehi. 10 Me fith e pumo’on nu Judah ngorad ni lungurad, “Mangfan ni kam m’aged e mael ngomad?” Miyad fulweg ni lungurad, “Kugbad ni nggu koled Samson nggu feked, ma gamad rin’ ngak e tin ke rin’ ngomad.” 11 Me yan dalip biyu’ e pumo’on nu Judah ko fare yiy ni bay u taban fa gi rech u Etam, me lungurad ngak Samson, “Da mu nang ni piyu Filistia e yad e yad be gagiyeg nagdad? Ere mang e kam rin’ ngodad?” Me fulweg ni ga’ar, “Kug rin’ ngorad e n’en ni kar rin’ed ngog.”

12 Me lungurad ngak, “Kugbad ngaray ni nggu m’aged gur nggu pi’ed gur nga pa’ yu Filistia.”

Me ga’ar Samson, “Mmicheged ngog ndab mu li’edgag nggum’.” 13 Me lungurad ngak, “Dab gu li’ed gur, kemus ni nggu m’aged gur ma gamad pi’em ngorad.” Ma aram miyad m’ag nga ruw i gaf ni kab be’ech ngar feked ngar chuwgad ko fagi rech.

14 Fa’ani taw nga Lehi, me mil piyu Filistia i yib ngak ni yad be tolul ngak. Me yib gelngin SOMOL ngak nge gel, me gelnag ir nge math’math’ e gaf ni kanm’ag nga pa’ ni bod e tret nni urfiy. 15 Me guy ba yododan e dongki ni kafni yim’, me lumel nga but’ nge thiy pa’ ngay, me li’ reb e bbiyu’ e pumo’on ngay. 16 Me tang Samson ni ga’ar,

18 Me yib e belel nib gel ngak Samson, me pining fithingan SOMOL me ga’ar, “Kam gagiyegnag kug gel ko mael; ere nggum’ nriyul’ e chiney ko belel me koleg e pi Filistine ni dar nanged Got?” 19 Me bing Got bangi but’ nib aw nga but’ u rom u Lehi, me yib e ran riy. Me unum Samson e ran riy, me fel’ rogon. Min tunguy fithingan e re alublub nem ni Hakkore;‡ HAKKORE: Re ngachal ney ni Hebrew e fan e “en ni pong.” re alublub nem e kabay u rom u Lehi.

20 Me par Samson ni ir e be gagiyegnag piyu Israel ni rliw’ e duw, ma yu Filistia e yad be tay murung’agen fare nam.