5
Tang rok Deborah nge Barak
1 Rofen nem e yin’ Deborah nge Barak, ni fak Abinoam, e re tang ni ba’aray:
2 Ke sorok SOMOL!
Ya turguy piyu Israel u lanin’rad ni ngranod ko mael;
ra be’ me ognag ir ni nge un ko mael nib felan’ ngay!
3 Mu telmed, e pi pilung!
Mu sapgad, e pi’in gimed ma gagiyegnag e girdi’!
Ya nggu tang mu gu chubeg e musik ni fan ngak e Got rok piyu Israel, ni ir e SOMOL!
4 SOMOL, fa’an mu chuw ko fapi burey nu Seir,
fa’an mub u lan fa gi binaw nu Edom nga wuru’,
me rur e but’, me aw e n’uw u lang.
Arrogon, i map’ e ran ko manileng nga but’.
5 Me durru’ e pi burey u mit SOMOL nu Sinai,
u mit SOMOL, ni ir fare Got rok piyu Israel.
6 Fapi rran nnap’an Shamgar, ni be’ nib mo’on ni fak Anath,
nnap’an fapi rran rok Jael,
e gamanman nge girdi’ ni nike yip’e thelep be milekag e da kuranod u daken fare nam,
u ranod ko yu pa’ i kanawo’ u wuru’ fare nam.
7 Deborah, i par fapi binaw nu Israel ni kan n’ag,
i par e pi binaw nem ndariy e girdi’ riy nge mada’ ko ngiyal’ ni mub,
ni mub ni bod ba matin ngak piyu Israel.
8 Me yib e mael nga daken e nam
nap’an ni mel’eg piyu Israel boch e got ni be’ech ngorad.
Gur immoy be’ u fithik’ fa 40,000 i pumo’on nu Israel
ni feke shield ara sarey?
9 Lanin’ug e bay rok e pi’in yad be tay murung’agen e salthaw nu Israel,
ni bog ni’ nra og niged yad nib magan’rad ngay ni ngaru’ned ko mael.
Ke sorok SOMOL!
10 Gimed e pi’in kam afgad nga daken e pi dongki nib wechwech,
ni kam pired nga daken e n’en ni kan filath nga daken keru’ e dongki e ngam weliyed murung’agen,
ma ku er rogon gimed e pi’in nthingar mmarod u but’ ko gin ngam marod ngay.
11 Mu telmed! Girdi’ ni pire’ nike mada’ lamrad ngalang u to’oben e pi luwed
ni yad be weliy murung’agen e gel ni tay SOMOL ko pi mael,
ni pi mael ni gel piyu Israel riy!
Me thelep e girdi’ rok SOMOL ko pi binaw rorad nga pe’ning.
12 Mm’on, Deborah, mm’on!
Mu gafaliydad! Ngad tanggad! Nggu leked gur!
Barak, ni ga be’ nib mo’on ni fak Abinoam, mman nga m’on,
mu gafaliy e pi’in kam kol i yan ngabang!
13 Ma aram e pi’in yad ba yul’yul’ e rabad nga pe’ning ngak e pi’in yad e gafal rorad;
girdi’ rok SOMOL e rabad ngak ni kar fal’eged rogorad ko cham.
14 Rabad u Efraim ngalan e loway
ni yad be lek e ganong rok Benjamin.
Me yib e pi’in yad be tay murung’agen e salthaw u Makir nga pe’ning,
ma pi tolang ko salthaw e rabad u Zebulun nga pe’ning.
15 Ma pi’in yad be yog e thin ko ganong rok Issakar e ra cheggad ngak Deborah ngarbad;
er rogon, i yib Issakar, ma ku er rogon Barak.
Ra leked ngarbad ngalan e loway.
Machane ganong rok Ruben e ruw raba’ e girdi’ riy;
ma de yag ni ngar turguyed ni ngarbad.
16 Mang nra pired rok e pi saf rorad ma darbad?
Ngar motoyilgad nga laman e pi’in yad ma
gafaliy e saf ni yad be pining e yu ran’ i saf?
Errogon, ganong rok Ruben e ruw raba’ e girdi’ riy’
dayag ni ngar turguyed ni ngarbad.
17 Ganong rok Gad e par ko ngek u Jordan,
ma ganong rok Dan e par u charen e pi barkow.
Ma ganong rok Asher e par u dap’el’ay;
ra mageygad u dap’el’ay.
18 Machane girdi’en e ganong rok Zebulun nge Naftali
e ra paged fan e pogofan rorad u tagil’ e mael.
19 Me yib e pi pilung ngar’uned ko mael
u Taanak, u to’oben e lul’ u Megiddo.
I un e pi pilung nu Kanaan ko mael,
machane de yag nra feked e silber.
20 Pi t’uf u lang e ru’uned ko cham;
yad be yan u lanelang
ma yad be cham ngak Sisera.
21 I sugbur e lul’ nu Kishon me fekrad e ran,
ko gireng ko lul’ nu Kishon.
Bay gu ayi salthaw, i yan nga m’on nib el mirin!
22 Ma aram me yib e pi os ni yad be tim’og,
ni yad be rugoy ayrad nga but’.
23 Be ga’ar fare engel rok SOMOL, “Mu bucheg wa’athan yu Meroz,
mu bucheg wa’athan, mu bucheg wa’athan e pi’in yad be par u rom.
Ya darbad ni ngar ayuweged SOMOL,
ni ngarbad nrogon e salthaw ngar chamgad ni fan ngak.”
24 Re pin nth’abi fel’ wa’athan e Jael,
ni le’engin Heber ni be’ nu Keni,
ni ir e re pin nth’abi fel’ wa’athan u fithik’ e ppin ni yad ma par u lan e pi tent.
25 I ning Sisera e ran, machane me pi’ e milik ngak,
me fek e kirim i yib ngak nike tay ngalan baraba’ i dabiy ni bfel’ ya’an.
26 Me fek ba richib ko tent nga baraba’ i pa’,
me fek e ama ni yima maruwel ngay nga baraba’ i pa’;
me pirdiiy lolugen Sisera nge bilig,
me kuruf lolugen nge for u barba’.
27 Me aw nga but’ nib ragbug,
me thig nga charen rifrifen ay fare pin.
To’oben i rifrifen ay e aw riy nga but’ nib ragbug me thig;
me thig nga but’ nike yim’.
28 Me changar e chitiningin Sisera nga wean u thilin e sagal ko winda;
me ga’ar, “Mangfan nike pag nap’an ni nge yib e chariot rok?
“Mangfan nike sag’al e pi os rok ko sul?
29 Ma pi ppin ni yad ba gonop ni yad ma par rok e ra fulweged lungun,
mi i ga’ar u wan’,
30 “Ka yad be pir’eg e pin’en ni ngan kol ngan f’oth,
nra reb e salthaw ma reb e bpin ara l’agruw, ma er i tay e mad nib tolang puluwon ni nge fanay Sisera,
nge yungi mad ni ka nip’ ni bfel’ ya’an ni ngan fanay ni fan nga belel’ugun e en ni le’engin e pilung.”
31 SOMOL, mange yigi yim’ urngin e pi to’ogor rom ni aram rogon,
machane pi’in gab t’uf rorad e nge gal rama’erad ni bod e yal’ ni be yib ngalang!
Ma aram me yib e gapas nga daken e nam ni aningeg i ragag e duw.
DRAFT VERSION — Proofreading in progress