1 Nap’an ni yim’ Ehud, me denen e girdi’ nu Israel bayay nib togopluw ngak SOMOL. 2 Me pagrad SOMOL nge gel Jabin ngorad ko mael, ni ir e pilung u Kanaan mma gagyeg u lan e binaw nu Hazor. Ma en ni be tay murung’agen e salthaw rok e Sisera, nma par u Harosheth nma par e pi Gentile riy. 3 Jabin e 900 e chariot ni wasey rok, ma aram mi i gagiyegnag e girdi’ nu Israel nib gel e gafgow ni i tay ngorad ni rliw’ e duw. Me wenig piyu Israel ngak SOMOL ni nge ayuwegrad.

4 Mi Deborah nib profet ni le’engin Lappidoth, ma ku ir ba profet, ma maruwel rok e ba judge rok piyu Israel e ngiyal’nem. 5 Ma yan i par nga tan ba ke gek’iy ni palm ni bay u thilin yu Ramah ngu Bethel ni go’ burey u Efraim, ma girdi’ nu Israel e yad ma yan ngak e ngaram nge yog ngorad e tin ke duwgiliy. 6 Reb e rran me mulwoliy Barak ni nge yib, ni be’ nib mo’on ni fak Abinoam nma par u lan e binaw nu Kedesh ni bay u lan yu Naftali, me ga’ar fare pin ngak, “SOMOL ni ir e Got rok piyu Israel, e ke motochiyel ngom ni be ga’ar: ‘Ngam fek 10,000 e pumo’on ko ganong rok Naftali nge Zebulun ngam gafaliyrad ko fare Burey nu Tabor. 7 Bay gu fek Sisera i yib, ni ir pilungen e salthaw rok Jabin, ni nge cham ngom ko lul’ ni Kishon. Bay yib nike fek e pi chariot nge pi salthaw rok, machane bay gu gel nagem.’ ” 8 Ma aram me fulweg Barak ni ga’ar ngak Deborah, “Gu ra yan ni fa’an ga ra un ngog, ma fa’anra dab mu’un ngog ma dab gu wan.” 9 Me fulweg fare pin ni ga’ar, “Kefel’, bay gu un ngom, machane dab nognem ni gur e ka mu gel, ya bayi pi’ SOMOL Sisera nga pa’ be’ ni bpin.” Me sak’iy Deborah nge un ngak Barak ngranow nga Kedesh. 10 Me ulunguy Barak e ganong rok Zebulun nge Naftali nga Kedesh, ma 10,000 e pumo’on e ra uned ngak. Me un Deborah ngak.

11 Ma ke n’uf Heber ni be’ nu Keni e tent rok nib chugur nga Kedesh, ma ba chugur ko fare ke gek’iy ni oak ni bay u Zaanannim, nike chuw u fithik’ e tin kabay e girdi’ nu Keni, ni yad e pi’in owchen Hobab, nib mo’on ni walagen le’engin Moses.

12 Minog ngak Sisera, ni Barak ni be’ nib mo’on ni fak Abinoam e ke yan nga daken e burey ni Tabor. 13 Me yog ni nge yib fa 900 i chariot ni wasey nge urngin e salthaw rok, me l’ograd ngranod u Harosheth nma par e pi Gentile riy ko fare lul’ ni Kishon. 14 Me ga’ar Deborah ngak Barak, “Mman! Ya daba’ e ke gagiyegnag SOMOL ni ngam gel ngak Sisera ko mael. Ya SOMOL e be pow’iyem!” Me yan Barak u daken e burey ni Tabor nga p’ening ni yad fa 10,000 i pumo’on ni salthaw rok. 15 Ma fa’an ni m’ug Barak ngorad ni yad e salthaw rok, me balyangnag SOMOL Sisera nib mu’un fapi chariot rok ngay nge salthaw rok. Me og Sisera u chariot rok nga but’ nge mil. 16 Me lol’oeg Barak fapi chariot nge fapi salthaw ngar mada’gad nga Harosheth nma par e pi Gentile riy. Miyad li’ e salthaw rok Sisera ni gubin, ni de magey be’.

17 Me mil Sisera ko tent rok Jael, ni le’engin Heber ni be’ u Keni, ya Jabin, ni ir e pilung u Hazor, nge tabinaw rok Heber e bfel’ thilrad. 18 Me yan Jael ngar mada’gow Sisera, me ga’ar ngak, “Moy, moy ngalan e tent rog. Dab kum rus.” Me yan ngalan e tent rok, me mithag nga fon bangi mad ni kateng. 19 Me ga’ar Sisera ngak Jael, “Wenig ngom, mpi’ e ran nggu unum, ya ku gum’ ni belel.” Me bing ba tutuw ni keru’ e gamanman ni bay e milik riy, me pi’ boch riy nge unum, nge mu’ me mithag. 20 Me ga’ar Sisera ngak, “Mu sak’iy nga langan e mab ko re tent ney, ma fa’anra yib be’ i fithem ko bay be’ u roy fa dariy me lungum dariy.”

21 Mri mol Sisera, ya kari aw parwon. Me fek Jael ba ama nge ba richib ko tent me n’ag lingan nge yan ko gin bay riy, me yan i richibiy fare richib nga baraba’ i lolugen nge yan i for u baraba’ nge yan nga fithik’ e but’, me yim’. 22 Fa’an ni yib Barak ni be gay Sisera, me yan Jael i mada’nag, me ga’ar ngak, “Moy! Nggu dag ngom fare mo’on ni ga be gay.” Me un ngak ngranow ngalan fare tent rok, ma bay Sisera u rom u but’ nike yim’, ke kuruf fare richib ko tent lolugen ke for nga baraba’.

23 Rofen nem e gelnag Got piyu Israel ngak Jabin, ni fare pilung nu Kanaan. 24 Ya cham i cham piyu Israel ngak Jabin nge mada’ ko ngiyal’ ni kar thanged e fan rok.