Muqeddes Kalam (latin yéziq) Amos 2

Moab heqqide

1 Perwerdigar mundaq deydu:

—«Moabning üch gunahi, berheq töt gunahi üchün, uninggha chüshidighan jazani yandurmaymen,

Chünki u Édomning padishahining ustixanlirini köydürüp hak qiliwetti.

2 Hem Men Moab üstige ot ewetimen,

Ot Kériotning ordilirini yutuwalidu;

We Moab chuqan-sürenler bilen, qiya-chiyalar bilen, kanay sadasi bilen ölidu.

3 We Men ularning hakimini arisidin üzüp tashlaymen,

Uning emirlirini uning bilen bille öltürüwétimen, — deydu Perwerdigar.

Yehuda heqqide

4 Perwerdigar mundaq deydu: —

«Yehudaning üch gunahi, berheq töt gunahi üchün, uninggha chüshidighan jazani yandurmaymen,

Chünki ular Perwerdigarning Tewrat-qanunini kemsitti,

Uningdiki belgilimilerge emel qilmidi;

Ularning saxtiliqliri özlirini adashturup qoydi; ularning ata-bowilirimu bulargha egiship mangghanidi.□

5 Hem Men Yehuda üstige ot ewetimen,

Ot Yérusalémning ordilirini yutuwalidu.

Israil heqqide

6 Perwerdigar mundaq deydu: —

Israilning üch gunahi, berheq töt gunahi üchün, uni jazasidin qayturmaymen,

Chünki ular heqqaniylarni kümüshke sétiwetti,

Yoqsul ademni bir jüp choruqqa sétiwetti;

7 Ular namratlarning béshidiki chang-topilirini bosh qoyuwetmeydu,

Ajiz möminlerning nésiwisini qayriwalidu;

Ata-bala ikkisi Méning muqeddes namimni bulghap, oxshash bir qizning yénigha teng baridu.□

8 Ular qizlarni hemme qurban’gahning yénigha élip bérip,

Qerzge renige qoyghan kiyim-kéchekler üstide ular bilen yatidu;

Ular öz ilahining öyide jerimane bilen alghan sharabni ichmekte.□

9 Biraq Men Amoriylarni ularning aldidin halak qilghanmen,

Amoriylar kédir derixidek égiz, dub derixidek küchlük bolghan bolsimu,

Men üstidin uning méwisini, astidin yiltizlirini halak qildim.■

10 Hem Amoriylarning zéminini igilishinglar üchün,

Silerni Misir zéminidin élip chiqip,

Qiriq yil chöl-bayawanda yéteklidim.□ ■

11 Silerning oghulliringlardin bezilirini peyghember bolushqa,

Yigitliringlardin bezilirini «Nazariy» bolushqa turghuzdum.

Shundaq emesmu, i Israil baliliri? — deydu Perwerdigar.□

12 Biraq siler Nazariylargha sharab ichküzdunglar,

Hem peyghemberlerge: «peyghemberlik qilmanglar» — dep buyrudunglar.■

13 Mana, Men silerni basimen,

Xuddi liq önche bésilghan harwa yerni basqandek, silerni bésip turimen;

14 Hem chapqurlarningmu qachar yoli yoqaydu,

Palwan öz küchini ishlitelmeydu,

Zeberdes batur öz jénini qutquzalmaydu.

15 Oqyani tutquchi tik turalmaydu;

Yeltapan qachalmaydu,

Atqa min’güchi öz jénini qutquzalmaydu.

16 Palwanlar arisidiki eng jigerlik baturmu shu künide yalingach qéchip kétidu, — deydu Perwerdigar.

Amos
<
2
>

□2:4 «Ularning saxtiliqliri özlirini adashturup qoydi» — «saxtiliqliri» kéyinki geplerge qarighanda, ularning yasighan butlirini körsitidu.

□2:7 «Ata-bala ikkisi Méning muqeddes namimni bulghap, oxshash bir qizning yénigha teng baridu» — bu ish pahishiwazliq bolupla qalmay, yene ularning butigha, yeni «Baal»gha birxil choqunush paaliyiti hésablinatti.

□2:8 «Ular qizlarni hemme qurban’gahning yénigha élip bérip, qerzge renige qoyghan kiyim-kéchekler üstide ular bilen yatidu; ular öz ilahining öyide jerimane bilen alghan sharabni ichmekte» — bu jümlide Amos ularning, bolupmu baylarning töt gunahini körsitidu: — (1) ularning (butlargha atap béghishlighan) köp qurbanliqliri bar idi; (2) ular Musa peyghemberge chüshürülgen muqeddes qanun’gha xilapliq qilip, özlirige qerzdar bolghan namratlardin kiyim-kécheklirini tartiwalidu («Mis.» 22:26, «Qan.» 24:12-17ni körüng); (3) ular butxanilarni sélip, butlarni özlirining Xudasi dep étirap qilghan; (4) ular haram yolda xeqtin jerimane alidu — u gunahlar belkim 6-ayette éytilghan «üch gunahi, töt gunahi»ni éniq toluqlap körsitip bérishi mumkin.

■2:9 Chöl. 21:24; Qan. 2:31; Ye. 24:8

□2:10 «Silerni ... qiriq yil ... yéteklidim» — «Misirdin chiqish» we «Chöl-bayawandiki seper» boyiche ular chöl-bayawanda köp qétim Xudagha itaetsizlik, asiyliqmu qilghan. Xudaning shu künlerde ularni tashliwetmigenliki uning méhri-shepqitige intayin zor ispat berdi we béridu.

■2:10 Mis. 12:51

□2:11 «Nazariy» — bu ademler alahide yol bilen (jümlidin sharab ichmey, chachlirini chüshürmey) waqitliq yaki ömürwayet özini Xudagha atap béghishlighan. Shunga ularning yürüsh-turushliri xeqlerge baqiy dunyani eslitip turatti («Chöl.» 6-babni körüng).

■2:12 Am. 7:12, 13