22
Dawutning medhiye küyi
Zǝb. 18
1 Perwerdigar uni barliq düshmenliridin hem Saul padishahning qolidin qutquzghan küni, u Perwerdigargha bu küyni éytti: —□ «...u Perwerdigargha bu küyni éytti» — Zebur, 18-küy we uning izahatliri bilen sélishturung.
2 U mundaq dédi: — Perwerdigar méning xada téghim, méning qorghinim, méning nijatkarimdur!
3 Xuda méning qoram téshimdur, men Uninggha tayinimen —
U méning qalqinim, méning qutquzghuchi münggüzüm,
Méning égiz munarim we bashpanahim, méning qutquzghuchimdur;
Sen méni zorawanlardin qutquzisen!□ «...méning qutquzghuchi münggüzüm» — ibraniy tilida «....nijatimning münggüzi». «Sen méni zorawanlardin qutquzisen!» — ibraniy tilida «Sen méni zorawanliqtin qutquzisen». ■ Ibr. 2:13
4 Medhiyilerge layiq Perwerdigargha men nida qilimen,
Shundaq qilip, men düshmenlirimdin qutquzulimen;
5 Chünki ölümning asaretliri méni qorshiwaldi,
Ixlassizlarning yamrap kétishi méni qorqitiwetti;□ «Ixlassizlarning yamrap kétishi méni qorqitiwetti» — ibraniy tilida «Ixlassizlarning qiyan-tashqinliri méni qorqitiwetti».
6 Tehtisaraning taniliri méni chirmiwaldi,
Ölüm sirtmaqliri aldimgha keldi.
7 Qiynalghinimda men Perwerdigargha nida qildim,
Xudayimgha peryad kötürdüm;
U ibadetxanisidin awazimni anglidi,
Méning peryadim Uning quliqigha kirdi.
8 Andin yer-zémin tewrep silkinip ketti,
Asmanlarning ulliri dehshetlik tewrendi, silkinip ketti;
Chünki U ghezeplendi.
9 Uning dimighidin is örlep turatti,
Aghzidin chiqqan ot hemmisini yutuwetti;
Uningdin kömür choghliri chiqti;
10 U asmanlarni éngishtürüp égip chüshti,
Puti astida tum qarangghuluq idi.
11 U bir kérub üstide perwaz qildi,
U shamalning qanatlirida köründi.
12 U qarangghuluqni, shundaqla yighilghan sularni,
Asmanlarning qoyuq bulutlirini,
Öz etrapida chédiri qildi.
13 Uning aldida turghan yoruqluqtin,
Otluq choghlar chiqip ötti;
14 Perwerdigar asmanda güldürlidi;
Hemmidin aliy Bolghuchi awazini yangratti;
15 Berheq, U oqlirini étip, düshmenlirimni tarqitiwetti;
Chaqmaqlarni chaqturup, ularni qiyqas-süren’ge saldi;□ «berheq, u ... düshmenlirimni tarqitiwetti» — ibraniy tilida «berheq, U ... ularni tarqitiwetti». 18-ayetni körüng.
16 Shuning bilen déngizning tekti körünüp qaldi,
Alemning ulliri ashkarilandi,
Perwerdigarning tenbihi bilen,
Dimighining nepisining zerbisi bilen.
17 U yuqiridin qolini uzitip, méni tutti;
Méni ulugh sulardin tartip aldi.
18 U méni küchlük düshminimdin,
Manga öchmenlerdin qutquzdi;
Chünki ular mendin küchlük idi.
19 Külpetke uchrighan künümde, ular manga qarshi hujumgha ötti;
Biraq Perwerdigar méning tayanchim idi.
20 U méni kengri-azade bir jaygha élip chiqardi;
U méni qutquzdi, chünki U mendin xursen boldi.
21 Perwerdigar heqqaniyliqimgha qarap manga iltipat körsetti;
Qolumning halalliqini U manga qayturdi;
22 Chünki Perwerdigarning yollirini tutup keldim;
Rezillik qilip Xudayimdin ayrilip ketmidim;
23 Chünki uning barliq hökümliri aldimdidur;
Men Uning belgilimiliridin chetnep ketmidim;
24 Men Uning bilen ghubarsiz yürdum,
Özümni gunahtin néri qildim.
25 We Perwerdigar heqqaniyliqimgha qarap,
Köz aldida bolghan halalliqim boyiche qilghanlirimni qayturdi.
26 Wapadar-méhribanlargha Özüngni wapadar-méhriban körsitisen;
Ghubarsizlargha Özüngni ghubarsiz körsitisen;
27 Sap dilliqlargha Özüngni sap dilliq körsitisen;
Tetürlerge Özüngni tetür körsitisen;
28 Chünki Sen ajiz mömin xelqni qutquzisen;
Biraq közliringni tekebbur üstige tikip,
Ularni shermende qilisen;
29 Chünki Sen Perwerdigar méning chiraghimdursen;
Perwerdigar méni basqan qarangghuluqni nurlanduridu;■ Pend. 13:9
30 Chünki Sen arqiliq düshmen qoshuni arisidin yügürüp öttüm;
Sen Xudayim arqiliq men sépildin atlap öttüm.□ «düshmen qoshuni arisidin yügürüp öttüm» — «yügürüp öttüm» dégen mushu sözler «bösüp öttüm» dégen menini öz ichige alidu.
31 Tengrim — Uning yoli mukemmeldur;
Perwerdigarning sözi sinap ispatlan’ghandur;
U Özige tayan’ghanlarning hemmisige qalqandur.■ Qan. 32:4; Dan. 4:34; Zeb. 12:6; 119:140; Pend. 30:5; Weh. 15:3
32 Chünki Perwerdigardin bashqa yene kim ilahtur?
Bizning Xudayimizdin bashqa kim qoram tashtur?■ Qan. 32:39; 1Sam. 2:2; Zeb. 86:8; Yesh. 45:5
33 Tengri méning mustehkem qorghinimdur;
U yolumni mukemmel, tüp-tüz qilidu;
34 U méning putlirimni kéyikningkidek qilidu;
U méni yuqiri jaylirimgha turghuzidu;
35 Qollirimni urush qilishqa ögitidu,
Shunglashqa bileklirim mis kamanni kéreleydu;
36 Sen manga nijatingdiki qalqanni berding,
Séning mulayim kemterliking méni ulugh qildi.
37 Sen qedemlirim astidiki jayni keng qilding,
Méning putlirim téyilip ketmidi.
38 Men düshmenlirimni qoghlap yoqattim,
Ular halak bolmighuche héch yanmidim.
39 Qayta turalmighudek qilip,
Ularni halak qilip yanjidim,
Ular putlirim astida yiqildi.
40 Sen jeng qilishqa küch bilen bélimni baghliding;
Sen manga hujum qilghanlarni putum astida égildürdüng;
41 Düshmenlirimni manga arqini qilip qachquzdung,
Shuning bilen men manga öchmenlerni yoqattim.
42 Ular telmürdi, biraq qutquzidighan héchkim yoq idi;
Hetta Perwerdigargha qariwidi, Umu ulargha jawab bermidi.
43 Men ularni soqup yerdiki topidek qiliwettim;
Kochidiki patqaqtek men ularni cheyliwettim;
Ularning üstidin pétiqdiwettim.
44 Sen méni xelqimning nizaliridin qutquzghansen;
Sen méni ellerning béshi bolushqa saqliding;
Manga yat bolghan bir xelq xizmitimde bolmaqta.
45 Yat eldikiler manga zeipliship teslim bolidu;
Anglishi bilenla ular manga itaet qilidu;
46 Yat eldikiler chüshkünliship kétidu;
Ular öz istihkamliridin titrigen halda chiqip kélidu;
47 Perwerdigar hayattur!
Méning Qoram Téshim mubareklensun;
Nijatim bolghan qoram tash Xuda aliydur, dep medhiyilensun!
48 U, yeni men üchün toluq qisas alghuchi Tengri,
Xelqlerni manga boysundurghuchidur;
49 U méni düshmenlirim arisidin chiqarghan;
Berheq, Sen méni manga hujum qilghanlardin yuqiri kötürdüng;
Zorawan ademdin Sen méni qutuldurdung.
50 Mushu seweblik men eller arisida sanga teshekkür éytimen, i Perwerdigar;
Namingni ulughlap küylerni éytimen;■ Rim. 15:9
51 U bolsa Özi tikligen padishahqa zor qutquzushlarni béghishlaydu;
Özi mesih qilghinigha,
Yeni Dawutqa hem uning neslige menggüge özgermes muhebbetni körsitidu.
□22:1 «...u Perwerdigargha bu küyni éytti» — Zebur, 18-küy we uning izahatliri bilen sélishturung.
□22:3 «...méning qutquzghuchi münggüzüm» — ibraniy tilida «....nijatimning münggüzi». «Sen méni zorawanlardin qutquzisen!» — ibraniy tilida «Sen méni zorawanliqtin qutquzisen».
□22:5 «Ixlassizlarning yamrap kétishi méni qorqitiwetti» — ibraniy tilida «Ixlassizlarning qiyan-tashqinliri méni qorqitiwetti».
□22:15 «berheq, u ... düshmenlirimni tarqitiwetti» — ibraniy tilida «berheq, U ... ularni tarqitiwetti». 18-ayetni körüng.
□22:30 «düshmen qoshuni arisidin yügürüp öttüm» — «yügürüp öttüm» dégen mushu sözler «bösüp öttüm» dégen menini öz ichige alidu.
■22:31 Qan. 32:4; Dan. 4:34; Zeb. 12:6; 119:140; Pend. 30:5; Weh. 15:3
■22:32 Qan. 32:39; 1Sam. 2:2; Zeb. 86:8; Yesh. 45:5