1 I oƣullar, atanglarning nǝsiⱨǝtlirini anglanglar,

Kɵngül ⱪoysanglar,

Yoruⱪluⱪⱪa erixisilǝr.

2 Qünki silǝrgǝ ɵgitidiƣanlirim yahxi bilimdur,

Kɵrsǝtmilirimdin waz kǝqmǝnglar.

3 Qünki mǝnmu atamning yumran balisi idim,

Anamning arzuluⱪ yalƣuz oƣli idim,■ 1Tar. 29:1

4 Atam manga ɵgitip mundaⱪ dedi:

— Sɵzlirimni esingdǝ tut;

Kɵrsǝtmilirimgǝ riayǝ ⱪil,

Xuning bilǝn yaxnaysǝn.■ 1Tar. 28:9

5 Danaliⱪni alƣin, ǝⱪil tap,

Eytⱪan sɵzlirimni untuma, ulardin qiⱪma.

6  Danaliⱪtin waz kǝqmǝ, u seni saⱪlaydu;

Uni sɵygin, u seni ⱪoƣdaydu.

7 Danaliⱪ ⱨǝmmǝ ixning bexidur;

Xunga danaliⱪni alƣin;

Barliⱪingni sǝrp ⱪilip bolsangmu, ǝⱪil tapⱪin.■ Pǝnd. 23:23

8  Danaliⱪni ǝzizligin, u seni kɵtüridu,

Uni qing ⱪuqaⱪliƣanda, seni ⱨɵrmǝtkǝ sazawǝr ⱪilidu.

9 Bexingƣa taⱪalƣan gül qǝmbirǝktǝk sanga güzǝllik elip kelidu,

Sanga xɵⱨrǝtlik taj in’am ⱪilidu.■ Pǝnd. 1:19

10 I oƣlum, ⱪulaⱪ salƣin, sɵzlirimni ⱪobul ⱪilƣin,

Xunda ɵmrüngning yilliri kɵp bolidu.

11 Mǝn sanga danaliⱪ yolini ɵgitǝy,

Seni durusluⱪ yolliriƣa baxlay.

12 Mangƣiningda ⱪǝdǝmliring qǝklǝnmǝydu,

Yügürsǝng yiⱪilip qüxmǝysǝn.■ Zǝb. 91:9-12

13 Alƣan tǝrbiyǝngni qing tut,

Ⱪolungdin kǝtküzmigin;

Obdan saⱪliƣin uni,

Qünki u sening ⱨayatingdur.

14 Yaman adǝmlǝr mangƣan yolƣa kirmǝ,

Rǝzillǝrning izini basma.■ Zǝb. 1:1; Pǝnd. 1:10,15

15 Ularning yolidin ɵzüngni ⱪaqur,

Yoliƣa yeⱪin yolima;

Uningdin yandap ɵtüp kǝt,

Neri kǝtkin.

16 Qünki yamanlar birǝr rǝzillik ⱪilmiƣuqǝ uhliyalmas,

Birǝrsini yiⱪitmiƣuqǝ uyⱪusi kǝlmǝs.

17 Yamanliⱪ ularning ozuⱪidur,

Zorawanliⱪ ularning xarabidur.

18 Lekin ⱨǝⱪⱪaniylarning yoli goya tang nuridur,

Kün qüx bolƣuqǝ barƣanseri yoruydu.

19 Yamanlarning yoli zulmǝt keqidǝk ⱪapⱪarangƣu,

Ular yiⱪilip, nemigǝ putlixip kǝtkinini bilmǝydu.

20 I oƣlum, sɵzlirimni kɵngül ⱪoyub angla,

Gǝplirimgǝ ⱪulaⱪ sal.

21 Ularni kɵzüngdǝ tutⱪin,

Yürikingning ⱪetida ⱪǝdirlǝp saⱪliƣin.

22 Qünki sɵzlirim tapⱪanlar üqün ⱨayattur,

Ularning pütün tenigǝ salamǝtliktur.■ Pǝnd. 4:13

23 Ⱪǝlbingni «ⱨǝmmidin ǝziz» dǝp sap tut,

Qünki barliⱪ ⱨayat ixliri ⱪǝlbtin baxlinidu.

24 Aƣzingni ǝgri gǝptin yiraⱪ tart,

Lǝwliring ezitⱪuluⱪtin neri bolsun.

25 Kɵzüngni aldingƣa tüz tikkin,

Nǝziringni aldingƣa toƣra taxla;

26 Mangidiƣan yolungni obdan oylanƣin,

Xundaⱪ ⱪilsang ixliring puhta bolidu.

27 Ongƣa, solƣa ⱪaymiƣin;

Ⱪǝdǝmliringni yamanliⱪ yolidin neri tart.■ Ⱪan. 5:32; 28:14