1 Miaŋgö andöŋe Josefnöŋ miriŋaŋgö galömŋi jim kutum waŋgiba kewö jiyök: “Gi mönö azi mieŋgö toru gösöŋine wit padi mi sirimeaŋgö dop löŋgötnöŋga numbuŋine kotme. Mewöŋanök mohot mohot yeŋgö moneŋ esuŋini mi nanŋök nanŋök toto qeba toru gösöŋinaŋgö numbuŋine alman. 2 Munŋini qöndökŋi yaŋgö toru gösöŋaŋgö numbuŋe miaŋgöreŋ nane qambi silwönöŋ memeŋi mi wit padigö moneŋi memba kayöhi, miambuk almam. “Mewö jim kutum waŋgiiga miaŋgö dop ahök.

3 Miri asariiga söŋanök azi mi melaim eŋgigetka doŋkiŋini eŋguaŋgita könanöŋ anget. 4 Anda siti mosöta köröwen qahö angetka Josefnöŋ miriŋaŋgö galömŋi kewö jim kutum waŋgiyök: “Gi mönö zilaŋ wahöta azi mi eŋguataŋgöba anda miwikŋaim eŋgiba eŋgeka kewö qesim eŋgiman: ‘Azi kembunöŋ ölöpŋi ak eŋgiiga iŋini mönö wuanöŋgöra miaŋgö kitipŋi bölöŋi meleŋ waŋgiba kaze? 5 Nöŋgö ketaŋamnan qambiŋeyök kuluŋ nemakzawi aka qambiŋi miaŋön unji aka keu asa-asambötŋaŋgö könaŋi miwikŋaimakzawi, iŋini qambi mi mönö wuanöŋgöra yoŋgorö memba kaze? Iŋini mönö silik mi bölöŋi kötökŋa akze.’ ”

6 Josefnöŋ miriŋaŋgö galömŋi mewö jim kutum waŋgiiga anda miwikŋaim eŋgiba keuŋi mi jiyöhaŋgö dop jii mötket. 7 Jii mötketka kewö meleŋ waŋgiget: “Ketaŋamninan keu tandökŋi mewöŋi mi mönö wuanöŋgöra jiza? Göhö welenqeqeurupki neŋön silik bölöŋi mewöŋi mi qahöpmahöp akzin. Mi yapmakek! 8 Mötnöŋ, nini toru gösöninaŋgö numbuŋine silwö moneŋ esu miwikŋainini, mi mewöyök Keinan gölmenöhök memba kaba gihiin. Nini mönö wuanöŋgöra silwö me goul mi ketaŋamgahö mireyök yoŋgorö membinak? 9 Welenqeqeurupki neŋgöreŋök kungö toru gösöŋe silwö qambi mi miwikŋaiman ewö, yaŋön mönö kömupkö buŋaya aiga tosatŋi neŋön ketaŋamnini, göhö welenqeqe omaŋi aka malbin.”

10 Mewö meleŋ waŋgigetka kewö jiyök: “Mewö miaŋön ölöp. Jizeaŋgö dop mi ölöp akin. Kungö toru gösönöhök silwö qambi mi miwikŋaimami, yaŋön mönö nöŋgö welenqeqeni omaŋi akŋapmö, tosatŋi eŋgö sileŋine keu qahö ahöiga ölöp nanŋinök miriŋine anme.” 11 Mewö jii möta körekŋan gösöŋini nanŋök nanŋök ösumok qeköba memba eta gölmenöŋ ala numbuŋinaŋgö kösöŋi pösatket. 12 Pösatketka Josefkö miriŋaŋgö galömŋam datŋini mutukŋaŋgö toru gösöŋeyök könahiba qezaŋda jaruba anda anda munŋini qöndökŋi Benjamingö toru gösöŋe teteköŋe eka qambi mi miaŋgöreŋ miwikŋaiyök. 13 Mi miwikŋaiiga yeŋön uruŋini kot gwözöŋniga wösöbirikŋini kondela malukuŋini munjukunjuratket. Mewö aka sukinapŋini doŋki qakŋine ala kunbuk liliŋgöba sitinöŋ anget.

14 Juda aka darumunurupŋi yeŋön liliŋgöba Josefkö mire angetka yaŋön tok miriŋeyök tarök. Tariga wösöŋe aŋgota simin köla gölmenöŋ bamgöget. 15 Bamgögetka Josefnöŋ kewö jiyök: “Iŋini mönö wani siliha mi akzeye? Azi ni ewöŋan mönö ölöp unju memba yuai yoŋgorö megetka mi miwikŋaimakzali, iŋini mi qahö mötze me?”

16 Mewö jiiga Judanöŋ kewö meleŋnök: “O ketaŋamni, nini mönö wani keuya göhöra jibinak? Nini keugö jaruzin. Neŋön yuai bölöŋi qahö ahini, mi kondel gihibinaŋgö dop qahö. Anutunöŋ mönö welenqeqeurupki, neŋgö pinjitkö keuŋi indeli aukŋe ahöza. Miaŋgöra kungö toru gösöŋeyök qambi mi miwikŋaizawi aka tosatŋi neŋön mewöyök mönö azi kembunaŋgö welenqeqeurupŋi omaŋi aka malbin.”

17 Mewö meleŋnökmö, Josefnöŋ kewö jiyök: “Nöŋön yuai mewöŋi mi qahö ak eŋgimam. Mi saumbaŋ! Azi dagö toru gösöŋe qambi mi miwikŋaizawi, yaŋönök mönö nöŋgö welenqeqeni aka malmapmö, tosatŋi iŋini ölöp luai qakŋe liliŋgöba iwiŋinaŋgöreŋ mire anme.”

18 Mewö jiiga Judanöŋ Josefkö wösöŋe anda keu kewö jiyök: “O azi kembuni, ölöp imbi kölnöŋga welenqeqegi nöŋön keu tosatŋi azi kembuni göhöra jibileŋak. Göŋön Farao kiŋ nanŋambuk öröröŋ akzanmö, töndup welenqeqegi nömbuk kazik kude ak niŋgiman. 19 Azi kembuni göŋön welenqeqeurupki nini mutuk kainga kewö qesim neŋginöŋ: ‘Eŋgö iwiŋini aka darumunŋini kun maljahot me qahö?’

20 “Mewö qesim neŋginöŋga neŋön azi kembuni göhöra kewö meleŋnin: ‘Neŋgö iwinini azi namŋi aka munini azi gwaböya kun mire tatzahot. Munini miaŋön iwininan lök azi namŋi aiga nalö miaŋgöreŋ asuhuyök. Namŋan azi morö yahöt etkimeiga datŋan kömuiga nanŋök töhön malja. Yaŋön mönö iwiŋaŋgö wölböt (jojopaŋ) nahönŋi akza.’ 21 Mewö meleŋninga göŋön welenqeqeurupki neŋgöra keu kewö jinöŋ, ‘Iŋini mönö munŋini mi waŋgita nöŋgöreŋ ki kagetka i ölöp nani jenan uba ekŋam.’

22 “Mewö jinöŋga neŋön azi kembunini göhöra kewö meleŋnin: ‘Azi gwabö mi iwiŋi mosötmamgö osima. Iwiŋi mosötpawak ewö, iwiŋan mönö kömumbawak.’ 23 Mewö meleŋninmö, göŋön welenqeqeurupki neŋgöra keu kewö jim kutunöŋ: ‘Munŋini qöndökŋan embuk ki qahö kama ewö, iŋini mönö nöŋgö jemesoholne kunbuk kude asuhume.’

24 “Mewö jim kutunöŋga mirinine liliŋgöba anda nöŋgö iwini, göhö welenqeqegi yaŋgöra azi kembuni göhö keugi mi jiinga mörök. 25 Mi jiinga möta iwininan könaŋgep kewö jiyök: ‘Iŋini mönö kunbuk anda neŋgöra nene tosatŋi söŋgöröŋi memba kame.’

26 “Mewö jiyökmö, nini kewö jiin, ‘Neŋön naninök anbingö osibin. Munini qöndökŋan nembuk mohotŋe anmapkö jiman ewö, mönö ölöp anbin. Munini bezupŋi qahö waŋgita anbin ewö, neŋön mönö azi miaŋgö jemesoholŋe asuhubingö osibin.’

27 “Mewö jiinga nöŋgö iwini göhö welenqeqegi yaŋön kewö jiyök: ‘Anömni Reizölnöŋ nahönyahötni yahöt etkimeyök. Mi nanŋini ölöp mötze. 28 Datŋan nömosöta anda sohoiga kewö jial, “Sömbup kalŋan mönö yöhöqöhöi kömumbawak me denöwö?” Nalö miaŋgöreŋök könahiba i qahö ehal. 29 Merak munŋi ki mewöyök noaŋgita angetka könanöŋ ayuayuhu kunŋan yaŋgö qakŋe öŋgöma ewö, iŋini mönö kondotketka wösöbirik öŋgöŋgöŋan nöŋgö qakne öŋgöiga köŋjiliŋ möta kömumba nöröp jupni yaŋgonambuknöŋ uŋem mire gemam.’ ”

30 Judanöŋ toroqeba keu kewö jiyök: “O azi kembuni, nöŋön munini azi gwabö mi qahö waŋgita anda iwini, göhö welenqeqegi yaŋgö mire aŋgotpileŋak ewö, iwininan mönö ayuhubapuk. Yaŋön mönö uruŋi pakpak nahönŋi bezupŋi yaŋgöreŋ jöhöiga malmalŋiri mohot maljahot. 31 Miaŋgöra azi gwabö mi qahö waŋgita aninga iwininan mi eka mönö kömup miwikŋaibapuk. Göhö welenqeqeurupki neŋgöreŋ mewö asuhuiga nini mönö kondoringa wösöbirik öŋgöŋgöŋan iwinini göhö welenqeqegi yaŋgö qakŋe öŋgöiga kömumba nöröp jupŋi yaŋgonŋambuknöŋ uŋem mire gema. 32 Göhö welenqeqegi nöŋön azi gwabönöŋ qahö ayuhumapkö keuŋi mi iwinaŋgöra jim jöhöba kewö jial: ‘I qahö waŋgita göhöreŋ liliŋgöba kamam ewö, miaŋgö keu lömbötŋan mönö göhö jege nöŋgö qakne öŋgöba ahöiga gölmenöŋ malmalni mewö mal öŋgöm tekömam.’ 33 Miaŋgöra göŋön ölöp jim tekönöŋga nöŋön azi gwabö yaŋgö salupŋe azi kembuni göhö welenqeqegi omaŋi aka ki malbiga yaŋön daturupŋi yembuk liliŋgöba miriŋine anme.

34 “Azi gwabö miaŋön nömbuk qahö kama ewö, nöŋön mönö denöwö aka iwinaŋgöreŋ anbileŋak? Wösöbirik öŋgöŋgöŋan iwinaŋgö qakŋe öŋgöbawak, nöŋön mönö mi ekŋamgö tököm köhöizal. Miaŋgöra i mönö kude jöhöman.”