1 Keinan gölmenöŋ bödi lömbötŋambuk mi toroqeba ahöyök. 2 Jeikobkö könagesöurupŋan wit padi Ijipt kantrinöhök memba kageri, mi körek nem tekögetka qahöwahiga iwiŋinan nahönurupŋi mi kewö jii mötket: “Iŋini mönö kunbuk liliŋgöba anda neneŋamnini tosatŋi söŋgöröŋi meme.”

3 Mewö jii mötketka Judanöŋ kewö jiyök: “Azi miaŋön mönö kapaŋ köla neŋgöra galöm meme keu köhöikŋi kewö jiyök: ‘Munŋinan embuk qahö kama ewö, iŋini mönö nöŋgö jemesoholne kunbuk kaŋgotpingö osime.’ 4 Miaŋgöra göŋön munini melainöŋga nembuk kama ewö, neŋön ölöp gömosöta neneŋamnini söŋgöröŋi membingöra anbin. 5 Azi miaŋön keu kewö jii mörin: ‘Munŋinan embuk qahö kama ewö, iŋini mönö nöŋgö jemesoholne kunbuk kaŋgotpingö osime.’ Miaŋgöra göŋön Benjamin aŋgön kölman ewö, nini qahö anbin.”

6 Mewö jiiga Israelnöŋ kewö jiyök: “Iŋini mönö wanigöra munŋini kun maljawi, keu mi azi miaŋgö jiget möröhaŋgöra ni urulömböt ketaŋi niŋgize?”

7 Mewö jiiga kewö meleŋda jiget: “Azi miaŋön nini aka könagesöurupnini eŋgöra törörök qeqesi könaŋi könaŋi neŋgiba kewö jiyök, ‘Iwiŋinan jebuk malja me qahö? Darumunŋini kun malja me qahö?’ Mewö jiyöhaŋgöra qeqesiŋi mi neŋön ölŋanök jiba meleŋnin. Yaŋön könaŋgep munini waŋgita kamegöra jibawak, mi mönö qeljiŋe nalö miaŋgöreŋ denöwö mötpinak?”

8 Mewö jigetka Judanöŋ iwiŋi Israelgöra kewö jiyök: “Miaŋgöra azi gwabö mi nöŋgö böröne ala melainöŋga mohotŋe anbin. Mewö aknöŋga amqeba zilaŋ gömosöta könanöŋ aninga nini, gi aka anöm-moröurupnini neŋön qahö kömum gororoŋgöbin. 9 Benjamingö malmalŋaŋgö sohopŋi miaŋgö keuŋan mönö nöŋgö böröne ahöiga liliŋgöba kaba gihimamgö jim köhöizal. Nöŋön i qahö waŋgita liliŋgöba ki kaba göhö jemesoholge qahö almam ewö, miaŋgö keu lömbötŋan mönö nöŋgö qakne öŋgöiga göhö jege bisiba malbiga gölmenöŋ malmalnan teköma. 10 Nalö köröpŋi eksekpeksek aka qahö mambötpinak ewö, neŋön lök endu anda liliŋgöba ki kainga ambemŋi yahöt akawak.”

11 Mewö jiiga iwiŋini Israelnöŋ kewö jii mötket: “Mewö akza ewö, iŋini mönö kewö akŋe: Gölme kiaŋgö töhötmöriamŋi ölöp kötökŋi tosatŋi kewöŋi mi memba toru gösöŋine löŋgöta anda azi mi kalema waŋgime: Sile mirimirigö kelökŋi tosatŋi, moroŋ oŋi tosatŋi, gipmi bakötök, marasin ip tokuŋi qetŋi mör gipit, kömin, kuŋgam aka saugö alaŋi almond mieŋgö ölŋini. 12 Silwö moneŋ walŋi toru gösöŋinaŋgö numbuŋine algetka memba kageri, mi aka miaŋgö dop qakŋe toroqeba ala mindirigetka jaŋgöŋan qariba 2:kö dop aiga mi memba liliŋgöba anda waŋgime. Tosatŋan köpösihira aka mi gösöŋine alget me denöwö? 13 Munŋini mewöyök waŋgita zilaŋ wahöta azi miaŋgöreŋ kunbuk liliŋgöba anget. 14 Anutu kukösum pakpakö Toŋan mönö azi miaŋgö jeŋe ak-kömukömuŋi eŋgiiga yaŋön darumunŋini kun aka Benjamin mi embuk mire liliŋgöba kamegöra imbi kölma. Nöŋgö moröurupnan tönbirin akŋe ewö, nöŋön mönö öne töhön malmam.”

15 Mewö jiiga kalem yuai mi memba silwö moneŋ memba kageri, miaŋgö dop qakŋe toroqeba ala mindirigetka jaŋgöŋan qariba 2:kö dop ahök. Mi memba Benjamin mohotŋe waŋgita wahöta ösumŋinan Ijipt anda Josefkö jeŋe aŋgotket. 16 Aŋgotketka Josefnöŋ Benjamin mi yeŋgö sutŋine eka miaŋgöreŋök miriŋaŋgö galömŋi kewö jim kutum waŋgiyök: “Gi mönö azi ki eŋguaŋgita nani mire anda al eŋginöŋga tatme. Tatketka anda sömbup kun qeba ohoba silimgö neneŋi mözözömgönöŋga yeŋön ölöp nömbuk mohotŋe nene nembin.” 17 Josefkö miriŋaŋgö galömŋan jim kutum waŋgiyöhaŋgö dop azi mi eŋguaŋgiriga Josefkö mire anget.

18 Eŋguaŋgiriga Josefkö mire anda jönömŋini unduiga keŋgötŋini möta kewö mötmöriba sutŋine jiget: “Mutuk kainga moneŋnini meleŋda toru gösönine algetka memba anini, miaŋgöra yeŋön mönö neŋguaŋgita kaba ki al neŋgigetka tatzin. Yeŋön mönö qeraköba neŋgum ureiba luhut al neŋgiba neŋgömegetka welenqeqeurupŋi omaŋi ahinga doŋkiurupnini kalöpköba aŋgön köl eŋgibepuk.” 19 Mewö jiba kinda Josefkö mirigö galömŋi yaŋgöreŋ öŋgöba angetka miri naŋguŋe kiniga yaŋgöra keu kewö jiget: 20 “O ketaŋamnini, nini nalö mutukŋa nene bohonŋi membingöra ki kain. 21 Kaba nene bohonŋi memba kunbuk liliŋgöba anda könanöŋ miri kunöŋ anda ahöbingöra tata toru gösöninaŋgö kösöŋi pösata moneŋnini totonine mi körekŋanök gösönini nanŋök nanŋök numbuŋine nene qakŋe ahöiga ehin. Miaŋgöra moneŋ mia merak kunbuk meleŋda memba kazin. 22 Silwö moneŋ mi daŋön toru gösönine meleŋda kunbuk alöhi, mi neŋön qahö mötzin. Neŋön mi aka silwö moneŋ tosatŋi mi qakŋe juhuköba nene söŋgöröŋi kunbuk membingöra gösönine ala memba kazin.”

23 Mewö jigetka miri galömŋan kewö jiyök: “Waimanjat kude mötme. Nanŋini aka iwiŋinaŋgö Anutuŋan mönö kungö uruŋi kuŋguiga silwö moneŋ mi toru gösöŋine aliga miwikŋaiget. Nöŋön eŋgöreŋ silwö moneŋ mi lök meal. Miaŋgöra keŋgötŋini kude möta urubönjöŋ tatme. “Mewö jiba Simeon waŋgita yeŋgöreŋ kayohot.

24 Kayohotka mohotŋe eŋguaŋgita Josefkö mire öŋgögetka könaŋini saŋgoŋmegöra o eŋgiyök aka doŋkiŋini gwözözak neneŋini miaŋön gumohom eŋgiyök. 25 Yeŋön silimgö neneŋi Josefkö mire mohotŋe nemeaŋgö keuŋi mötket. Miaŋgöra Josefnöŋ silimnöŋ miriŋe kaŋgotmapköra mamböta kalem yuaiŋini mi aukŋe areŋgöba tatket. 26 Tatketka Josefnöŋ mire kaiga kalem yuaiŋini memba kaba miriŋe öŋgögeri, mi waŋgiba wösöŋe simin köla gölmenöŋ bamgöget. 27 Bamgöba wahötketka jölöŋini jiba denöwö maljei, qesim eŋgiba kewö jiyök: “Iwiŋini azi namŋaŋgö jigeri, yaŋön denöwö malja? Toroqeba jebuk malja me qahö?”

28 Mewö jiiga kewö meleŋget: “Göhö welenqeqegi, neŋgö iwininan mönö ölöp malja. Mönö toroqeba jebuk malja. “Mewö meleŋda göda qem waŋgiba simin köla gölmenöŋ bamgöget.

29 Mewö aketka jeŋan ui anda kaiga munŋi Benjamin, nanŋi namŋaŋgö nahönŋi mi eka kewö qesim eŋgiyök: “Munŋini qöndökŋaŋgö jigetka mörali, yaŋön mönö ki akza me denöwö?” Qesim eŋgiba toroqeba kewö jiyök: “Nahöni, Anutunöŋ mönö ak kömum gihiiga malman.”

30 Mewö jiba munŋi eka wösöŋi pöröraköiga jeŋi asöliiga sahötmamgö möta miaŋgöreŋök wölaŋ liliŋgöba eŋgömosöta ösumŋan miri uruŋi ölöŋi kunöŋ öŋgöba nanŋök mala sahörök. 31 Sahöt teköba je imbilŋi saŋgoŋda miri uruŋi ölöŋi mi mosöta kaba törörök mökösöŋda kinda nanŋi galöm köl aŋguba numbu nene kölmegöra jiyök. 32 Ijipt yeŋön Hibru ambazip yembuk mohotŋe nene nembingö mötketka imbiloŋloŋambuk akzawaŋgöra mi osimakze. Miaŋgöra Josefkö neneŋi mi inanŋök köl waŋgigetka tari darumunurupŋi yeŋgö mi inanŋök köl eŋgiget tatketka Ijipt ambazip yambuk nene nembingö kaba tatkeri, yeŋgö neneŋini mi inanŋök kölgetka tatket. 33 Josefnöŋ jiiga darumunurupŋi mi ahugeraŋgö dop areŋgöm eŋgigetka mutukŋan qaikŋe tariga bezupŋinan qöndökŋe tariga Josefnöŋ mesohol köl eŋgiba tarök. Mewö tata nanŋini aŋgek kutuba welipköba tatket.

34 Mewö tatketka Josefnöŋ jiiga nanŋi teibolnöhök nene tosatŋi mendeŋda memba kaba köl eŋgigetka munŋi Benjamingöra ambemŋi 5:gö dop toroqeba kölgetka neyök. Mewö nemba Josefpuk közölömbuaŋ ala awamŋanök o köhöikŋi nemba sösöŋgai qakŋe tatket. Mewö.