9
Yesu imbaaŋ mbiwa tooni saŋavul ve ru pa uraat
(Mt 10:1-15; Mk 6:7-13)
1 Murei ra, Yesu ipoi mbiwa tooni saŋavul ve ru tilam tilup zi, ve irei tapiri irau zi, leso tigharaat moroghooŋ maata maata. Ve ighur avuvu sasaghati tisov tileep ila sambazi, leso tiziir zi tighau pa tamtamon. 2 Ve imbaaŋ zi tila ighe tivotia pooz to Maaron pa tamtamon, ve tigharaat yes moroghooŋa le tinizi poia. * Mt 28:19+; Mk 16:15+
3 Yesu isaav pazi ighe: “Saawe tau ala, na alaagh tomania gabua naol sov. Tauvene akis gabua eta imin titi, pepeel, aniiŋ, ma maet sov. Ve nonoghiiŋa tsiam paam, agham ru sov. Ee mon ta igheen ila tinimim, ene irao. 4 Isaav ighe ala avot nugh eta, ruum sindei tau ighe tighur gham pani, na aleep ila ruum tana mon le irau apul nugh tawe ve ala. 5 Ve isaav ighe nugh eta lolozi pa ghamuuŋ gham mako ve tizor gham, na aghatuun aghemim ve ŋgaupup toozi izi, o apul nugh toozi ve ala. Leso imin ilaal pazi pa sosor toozi.” * Lu 10:4+
6 Yesu isavsaav pazi le isov, ra tipuli, ve tila tilaagh irau nugh nugh, ve tivovotia vaaru poia pa tamtamon. Ve nugh sindei tau tila pani na, tigharaat moroghooŋa toozi paam.
Erod igham ŋgar naol pa Yesu
(Mt 14:1-2; Mk 6:14-16)
7 Erod, i daaba tau iŋgin taan sirivu to Galilaia. Ilooŋ Yesu vaaru pa uraat tau i ighamghamu na, le igham ŋgar naol. Pasaa, tamtamon siriv tisavsaav tighe Yesu, i ŋeer rughuzaaŋa Yoan tau imaat na, ve Maaron ipaburigini pa mateegh. 8 Ve tamtamon siriv tighe i propet Ilia tau ivot muul. Ve siriv tighe Yesu, i propet muŋganazi ee tau imaat alok wa, ve aazne iburig muul gha ilam. 9 Tauta Erod isaav pa tauu ighe: “Yoan, yau narav motin luua wa. Ewe sei kat tau naloŋlooŋ vaaru tighe i ighamgham gabua ŋgeretazi ivotvot?” Tauvene iliil eez ighe le ighita Yesu. * Lu 23:8
Yesu ipan tamtamon ndiŋndiŋ ndiŋndiŋ liim (5,000)
(2King 4:42-44; Mt 14:13-21; Mk 6:30-44; Yo 6:1-13)
10 Yesu mbaŋooŋa tooni tila tigham uraat le isov, ra timuul tilam tivot tooni, ve tipaes pani pa uraat tau tighamu na. Yesu igham zi gha yesŋa tipul eval tiina, ve tila pa taan sirivu tau igheen igharau nugh Betsaida. Leso zigazi tileep. 11 Eemon eval tiina tilooŋ varuzi, ve titaghon zi tila. Yesu ighit zi, ve igham zi toman loolo poia, ve isavsaav pazi pa pooz to Maaron, ve igharaat moroghooŋa toozi le tinizi poia.
12 Tilepleep le ravrav izi, ra mbiwa tooni saŋavul ve ru tana tila tisaav pani tighe: “Ughita. Ene taleep izi nugh ŋginaaŋa. Usaav pa eval tiina tane gha tila pa nugh siriv tau tigheen tataŋgan ne. Leso tiil lezi aniiŋ ve nugh to ghenooŋ.”
13 Eemon Yesu isaav pazi ighe: “Mako. Yam taumim agham aniiŋ pazi.”
Yes tiyol aliiŋa tighe: “Wai, iit leen aniiŋ naol mako. Ughita. Ene mberet liim, ve iigh ru mon. Pale irau eval tiina tane wa? Ma mindai? Ughe nila nighol aniiŋ siriv paam pazi?” 14 Tisaav tauvene pasaa, eval tiina tawe, zitamoot mon irau ndiŋndiŋ ndiŋndiŋ liim (5,000) ma vene.
Yesu isaav pazi muul ighe: “Avalagh tamtamon ila ŋgun ŋgun, ve asaav pazi mbolezi izi. Aghur tamtamon irau tamoot ru saŋavul (50) ila ŋgun eŋaeŋa.”
15 Tauvene titaghon Yesu aliiŋa, ve tila tighur eval tiina tana ila ŋgun ŋgun, ve mbolezi izi. 16 Ra Yesu igham mberet liim tomania iigh ru tawe, ikis zi, ve maata izala pa sambam ve ipait Maaron pa aniiŋ tana. Isuŋ le isov, ra iteev mberet tomania iigh ru tana, ve ighur zi ila mbiwa tooni nimazi, ve anazi tila tireii pa eval tiina tawe. 17 Tisov tighan le apozi isuŋ. Ve avozi muuri tau izi na, tigoog zi, ve tinonogh zi tila nakaral saŋavul ve ru le tivoniir.
Petrus ivotia Yesu ighe i Mesia
(Mt 16:13-20; Mk 8:27-30)
18 Saawe ee, Yesu tomania mbiwa tooni zigazi tileep, ve i isuŋsuŋ. Isuŋ le isov, ve ighason zi ighe: “Laak, tamtamon tigham ŋgar payau tighe yau sei?”
19 Yes tiyol ghasoniiŋ tooni tighe: “Zeran siriv tighe yo ŋeer rughuzaaŋa Yoan, siriv tighe yo propet Ilia, ve siriv tighe propet muŋganazi tau timaat alok wa, yo toozi ee tau iburig pa mateegh gha ilam.”
20 Yesu ighason zi muul ighe: “Ve yam taumim, aghe yau sei?”
Petrus iyol aliiŋa ighe: “Yo Mesia. Maaron ighur ghom to ugham mulin tamtamon tooni itaghon saveeŋ mbuaaŋ tooni.” * Yo 6:68, 11:27
21 Petrus isavsaav le isov, ra Yesu iŋgalsekin zi ariaaŋ ighe tivotia saveeŋ tana pa tamtamon eta sov.
Yesu isavia mateegh ve burigiiŋ tooni
(Mt 16:21-23; Mk 8:31-33)
22 Saawe tana, Yesu isaav ghazooŋa pa mbiwa tooni ighe: “Tamtamon Naatu, i aat ibaad pataŋani naol, ve yavyavuuŋ tiina ighamu itaghon Taama Maaron ŋgar tooni. Ve yes pooza tomania daaba to watooŋrau ve yes ŋgara to tutuuŋ pale tizori, ve tiravu imaat. Eemon mboŋ imin tol, Maaron pale ipaburigini pa mateegh.”
Eez to tataghon Yesu
(Mt 16:24-28; Mk 8:34–9:1)
23 Yesu isaav pa tamtamon tisov tau yesŋa tilepleep na ighe: “Isaav ighe tamtamon eta ighe imin leg ve itaghon eez tsiau, i aat itatan tauu, ibaad ai pambarooŋ tooni irau saawe, ve ilam itaghon ghau. * Mt 10:38+; Lu 14:27
24 Pa ighe tamtamon eta iil eez pa tauu leso ileep poia izi taan, ene pale ilale. Ve isaav ighe tamtamon eta loolo eemon ve ipul tauu payau, i aat igham lepoogh poia ila to Maaron. * Lu 17:33; Yo 12:24+
25 Isaav ighe tamtamon eta igham gabua popoiazi naol isov to taan, eemon i tauu ilale, ene pale gabua naol tana tiuule mindai? Mako.
26 “Isaav ighe tamtamon eta maaya payau ve saveeŋ tsiau, ve ipaisamun ghau, saawe tau Tamtamon Naatu imuul ilam, ve itotoi yesuru Taama Maaron, ve aŋela tooni patabuyaaŋa tapirizi ve mbonarizi ivot ighazooŋ, ene pale i maaya pa tamtamon tana paam, ve ipaisamuna. * Mt 10:33; Lu 12:9; 2Tim 2:12
27 “Ve alooŋ. Yau nasaav payam kat. Tamtamon siriv tau itiŋa tayozyooz ne, aat timaat soone, ve tighita Maaron itotoi pooz tooni ivot ighazooŋ.” * Paesiiŋ to saveeŋ ziiri tane igheen ila Mk 9:1.
Yesu itotoi mbonari ivot ighazooŋ
(Mt 17:1-8; Mk 9:2-8)
28 Yesu isavia saveeŋ tane le isov, ve mboŋ liim ve tol ilam ila, ra igham Petrus, Yoan, ve Yakobus, ve yes paaŋ mon tizala loloz ee. Leso isuŋ ta sewe. 29 I isuŋsuŋ, ve naagho itoora, ve nonoghiiŋa tooni paam ipisosooŋ le isul toman mbonari tiina. 30-31 Malau mako ve zeran ru, Mose gha Ilia, tivot tooni toman mbonarizi tiina, ve yesŋa Yesu tisavsaav pa uraat tau i pale ighamu izi Yerusalem, ve eez to i igham mulin tamtamon, ve ipul taan gha imuul izala pa sambam. † Lukas ibood saveeŋ ila yes Grika aliŋazi ighe Mose gha Ilia tisavsaav pa ‘Eksodos’ to Yesu. Puughu tauvene: Buk to Baibol tau imin ru pani, ‘Kisim Bek’, tiwaat eeza ila Grik aliŋazi tighe ‘Eksodos.’ Saveeŋ tane, puughu tauvene: ‘eez to tavot tala.’ Buk tawe isavia eez tau Maaron igham mulin yes Israela timbuzŋa pa pataŋani toozi, ve igham zi tipul Isip, ve timin i tauu le. Yesu uraat tooni, ene ŋgara raraate. Pasaa, mateegh ve burigiiŋ tooni, ene eez paaghu tau Maaron igham mulin ghiit pa pataŋani to sosor toit. Leso saghati tapiri ikis ghiit muul sov, ve tamin Maaron le. 32 Eemon Petrus tomania zeetŋa ru tigheen le lolozi iveegh kat. Saawe tau tiburig gha matazi ighazooŋ, ra tighita Yesu mbonari, ve zeran ru tau tiyozyooz tomania. * Igham 34:29; Yo 1:14; 2Pe 1:16+
33 Tilepleep le zeran ru tawe tighe tipul Yesu, ve Petrus isaav ila pa Yesu ighe: “Tiina, taleep ta sene, poia kat. Mindai, pale nirau balbaal tol? Ee payo, ee pa Mose, ve ee pa Ilia.” Aliiŋa tane, i igham ŋgar poi ve isaav mako. Isiki sorok.
34 Petrus isavsaav, ve taitai izi le ikau zi. Tauvene roiŋ tiina igham zi. * Igham 40:34+
35 Ra tilooŋ Maaron aliiŋa ivot ila taitai tawe loolo ighe: “Ena yau natug. Yau taug nasiigho ve naghuru pa uraat tsiau wa. Alooŋ aliiŋa, ve ataghoni!” * Mbo 2:7; Is 42:1; Lu 3:22
36 Saveeŋ tane isov, ve matazi ila le tighita Yesu zigani. Gabua tau tighita na, tisavia pa tamtamon eta rekia mako. Igheen toozi mon le murei ra, tivotia.
Yesu iziir avuvu saghati pa ŋeer marani ee
(Mt 17:14-20; Mk 9:14-29)
37 Yesu tomania mbiwa tooni tol tana tileep mboŋ nughizau, ra tipul loloz, ve timuul tizila le tizaa to eval tiina kat tau tiŋarui zi tilam. 38-39 Ŋeer ee tau ileep ila eval tiina tawe sosozi na, iboob ila pa Yesu ighe: “Mos puughu, yau nataŋ rarai ghom: Ulam ughita natug tane ve uule lak! I natug eemon, ve avuvu saghati izeeva. Ighe izaa pani, ene rekia mon iyak tiina, itap izila taan, tuua ipardaŋdaŋ, ve ambeera izi. Gabua tane ivavaghamunia le isaghat kat. Ve ipulpuli mako. 40 Yau nataŋ rarai mbiwa tsio naghe tiziir avuvu saghati tane ighau pani. Eemon titoova, le tirao mako.”
41 Yesu iyol aliiŋa ighe: “Oyai, yam tamtamon to aazne, aghur ila mako, ve ŋgar tsiam ikaukau kat. Itiŋa takaria lepoogh wa. Tauvene naghe pa ŋgar tsiam ivot ve aghilaal rig. Eemon mako. Monmon yam agham pataŋani payau. Pale ŋeez o namariau? Poia. Ugham natum ilam.”
42 Ŋeer marani iŋarui Yesu ilam, ve avuvu saghati tawe izaa pani, ve isiki izila taan, ve igham tuua ipardaŋdaŋ. Tauvene Yesu iyaon avuvu saghati ighau ve igharaat ŋeer marani gha tiini poia, ra ighuru imuul ila to taama. 43 Yes tau tighita kaut ŋgereeta tana, tisov tirur pa Maaron tapiri, le ŋgar toozi imbool.
Yesu iyol aliiŋa muul pa mateegh tooni
(Mt 17:22-23; Mk 9:30-32)
Tamtamon tighita uraat ŋgeretazi naol tau Yesu ighamgham zi na, ve tisov avozi ikaak. Tauvene Yesu isaav pa mbiwa tooni ighe: 44 “Yam aghur taliŋamim poi pa saveeŋ tane. Tamtamon Naatu, pale tighuru ila koiŋa nimazi.” * Lu 9:22
45 Mbiwa tooni tilooŋ saveeŋ tane, eemon tighazooŋ pani mako. Tikankaan pani. Pasaa, puughu iyooŋ pazi. Eemon tighason Yesu pa saveeŋ tooni puughu mako. Pasaa tiroi. * Lu 18:34
Sei ta eeza tiina kat?
(Mt 18:1-5; Mk 9:33-37)
46 Saawe ee, mbiwa tooni tivazorai zi pa toozi sei ta eeza tiina iliiv zi tisov. * Mk 10:35+; Lu 22:24+
47 Yesu iwatagh ŋgar tau igheen ila lolozi wa. Tauvene igham ŋeer marani ee ilam, ipayooze ila ziige, 48 ve isaav pazi ighe: “Isaav ighe tamtamon eta maata iŋgal ghau, ve igham marani tane ve iuule pa yau ezag, ene i igham ghau paam. Ve isaav ighe tamtamon eta igham ghau, ene i igham Tamaŋ tau imbaaŋ ghau nalam ne paam. Pasaa, yes tau tileep ila yam sosomim, ve tamtamon matazi veleghin zi tighe lezi ezazi mako, ene Maaron ighit zi ighe ezazi tintiina.” * Mt 10:40+; Yo 13:20
Tamtamon tau ighe ighur koi pait mako, ene imin etaan
(Mk 9:38-40)
49 Yoan ilooŋ saveeŋ tana, ve isaav pa Yesu ighe: “Tiina, yei nighita ŋeer ee izirziir avuvu sasaghati ila yo ezam. Eemon i itaghon ghiit pa lupuuŋ toit tane mako. Tauvene yei niŋgalsekini nighe igham tauvene sov.”
50 Eemon Yesu isaav pazi ighe: “Ai, yam agham vene sov. Pa tamtamon tau ighe ighur koi payam mako, ene imin etamim ve irau iuul gham.” * Mt 12:30; Lu 11:23; 1Kor 3:1-9
Nugh ee to Samaria lolozi pa ghamuuŋ Yesu mako
51 Yesu saawe tooni tau Maaron ighe ighamu imuul izala pa nugh sambam, ene ilam igharau wa. Tauvene ŋgar tooni iyaryaaŋ ighe izala pa Yerusalem. 52 I imbaaŋ tamtamon siriv timuuŋ tila pa nugh ee to Samaria, leso tigharaat eez pani. 53 Eemon tamtamon to nugh tawe tilooŋ Yesu ŋgar tooni iyaryaaŋ ighe izala pa Yerusalem, tauvene lolozi pa ghamuuŋni mako. * Yo 4:9
54 Mbiwa tooni ru, Yakobus gha Yoan, tighita gabua tana le irau lolozi mako. Tauvene tighason Yesu tighe: “Tiina, ughe nigham mindai? Pale nighason Maaron, leso igham yav sambam ve izilam, gha ighan tamtamon tawe?” * 2King 1:10+; Mk 3:17
55 Eemon Yesu itoor ghi ve iyaon zi. 56 Ra tipaburigin laghooŋ toozi muul, ve tila pa nugh ite.
Eez to tataghon Yesu
(Mt 8:19-22)
57 Yes tilaghlaagh taghon eez tila, ve ŋeer ee isaav pa Yesu ighe: “Nugh sindei tau yo ughe ula pani, yau aat nataghon ghom ve ituru tala.”
58 Yesu iyol aliiŋa ighe: “Ŋgavuun sagsagŋa lezi niazi ila taan puura. Ve man tau tirovroov ila taitai saamba, lezi rumazi izala ai. Eemon Tamtamon Naatu, i le niia to ghenooŋ mako.” * 2Kor 8:9; Pil 2:6+
59 Ra Yesu isaav pa ŋeer ite ighe: “Ulam utaghon ghau.”
Eemon ŋeer tawe iyol aliiŋa ighe: “Tiina, mindai? Irau upul ghau namuul nala naleep tomania tamaŋ? Ve nasaŋani le imaat gha natavia, o nalat nataghon ghom?”
60 Yesu iyol aliiŋa ighe: “Mako. Yes tau lezi ghilalooŋ pa Maaron mako ve titaghon eez to mateegh na, yes irau titavia mateegha. Eemon yo aat ula uvotia pooz to Maaron pa tamtamon.”
61 Ra ŋeer ite, aana ilam ve isaav pa Yesu ighe: “Tiina, yau naghe nataghon ghom. Ve mindai? Irau upul ghau namuul nala pa nugh tsiau ve yeŋa zetagŋa nileep rig? Ve nakis nimazi le isov, o nalat nataghon ghom.”
62 Yesu iyol aliiŋa ighe: “Mako. Tamtamon eta ighe igham pooz pa waaŋ ve maata imulmuul, ene irau igham uratoi pooz to Maaron mako.” * Lu 17:32; Pil 3:13+
*9:20: Yo 6:68, 11:27
*9:26: Mt 10:33; Lu 12:9; 2Tim 2:12
*9:27: Paesiiŋ to saveeŋ ziiri tane igheen ila Mk 9:1.
†9:30-31: Lukas ibood saveeŋ ila yes Grika aliŋazi ighe Mose gha Ilia tisavsaav pa ‘Eksodos’ to Yesu. Puughu tauvene: Buk to Baibol tau imin ru pani, ‘Kisim Bek’, tiwaat eeza ila Grik aliŋazi tighe ‘Eksodos.’ Saveeŋ tane, puughu tauvene: ‘eez to tavot tala.’ Buk tawe isavia eez tau Maaron igham mulin yes Israela timbuzŋa pa pataŋani toozi, ve igham zi tipul Isip, ve timin i tauu le. Yesu uraat tooni, ene ŋgara raraate. Pasaa, mateegh ve burigiiŋ tooni, ene eez paaghu tau Maaron igham mulin ghiit pa pataŋani to sosor toit. Leso saghati tapiri ikis ghiit muul sov, ve tamin Maaron le.
*9:32: Igham 34:29; Yo 1:14; 2Pe 1:16+
*9:35: Mbo 2:7; Is 42:1; Lu 3:22
*9:50: Mt 12:30; Lu 11:23; 1Kor 3:1-9