52
Vinaripitui meke sa Tataru Variharupi te Tamasa
(Keke kinera te Devita si hie sipu la koe Saula se Doeqi sa tie Edomu meke tozi nia sa sapu e Devita si la koe Ahimeleki sa hiama pa Ipi Hopena.)* 1 Samuela 22:9-10
(1 Samuela 22:9,10)
1 Kei, agoi na tie varane,
na vegua ke vahesi pule nigo si goi koari na mua tinavete kaleadi,
Sa tataru nabuna te Tamasa si koa hola ninae rane.
2 Doduru rane si balabala ia goi si pude ṉoṉovala la koari kaiqa.
Sa meamu si ṉaru guana reza,
va podopodoe koha si goi doduru rane.
3 Qetu nia goi sa kinaleana hola nia sa lineana,
sa kinohakoha hola nia sa hinokara.
4 Agoi na tie marikokohamu,
qetu nia goi si pude va sigiti i bulodi sari na tie koari na mua zinama.
5 Ba kaqu huara ilasigo e Zihova si goi ninae rane.
Kaqu vagi panigo sa Tamasa si goi koasa mua popoa soti,
meke kaqu vala nigo Sa koasa vasina tadi na maqomaqodi rina tie matedi.
6 Kaqu dogoria rina tie toṉoto sapu gua asa,
meke matagutu dia,
meke kaqu hegere nigo rini si goi, meke zama,
7 “Ai, dotu sa tie sapu lopu hiva kalavarae koe Tamasa pude tava sare,
ba raṉei sa sari nana tinagotago sokudi.
Sa nana ṉiniraṉira si mae guana koasa nana ṉinovaṉovala pa tie,” gua si arini.
8 Ba arau si toa valeana pa vetu te Zihova,
guana huda olive sapu buma valeana.
Kalavarae si rau koasa tataru nabuna te Tamasa ninae rane.
9 Kaqu zama leana koa Goi ninae rane si rau,
koari na tinavete saripu ele taveti Goi.
Koa Goi mo Zihova si kaqu kalavarae si rau sina Agoi mo si leana.
Kaqu tozi vura nia rau koari na tie ṉoṉodi sa Mua lineana Goi.