1 Taluarae taloa se Devita koasa vasileana lavata pa Qati meke govete la koasa bae tata pa vasileana pa Adulamu. Sipu avoso nia ri tasina na turaṉana sapu koa vasina si asa, si la koasa si arini.* Sam 57; Sam 142 2 Sokudi rina tinoni si mae somanae koe Devita, ari doduru pu ta ṉoṉovala na ta veko gale meke lopu koa qetu si mae beto koasa. Padana tata ka made gogoto tie doduruna, meke ta evaṉae na dia koimata rini se Devita.

3 Taluarae vasina se Devita meke la gua pa Mizipa pa Moabi, meke zama la koasa baṉara pa Moabi, “Va malumi sari karua tiatamaqu pude mae koa koa goi, osolae gilania rau gua sapu hiva tavete poni nau Tamasa.” 4 Ke vekoi e Devita sari karua tiatamana koasa baṉara pa Moabi, koa vasina si arini pa doduruna sa totoso sipu koa tome se Devita pa bae.

5 Meke mae koe Devita sa poropita Qadi meke zama, “Lopu koa tani, mu topue la pa popoa Ziuda.” Ke taluarae se Devita meke la pa muqe pa Hereti.

6 Keke rane si mae pa Qibea se Saula, habotu nana pa kauruna sa huda tamarisiki pa toqere, taṉinia nana pa limana sa nana hopere, meke turu vari likohae nia ri doduru nana palabatu varipera. Tozi nia rini sapu ele ta dogoro se Devita meke sari doduru nana tie. 7 Ke zama la koari nana palabatu varipera si asa, “Va avoso mae, gamu na tinoni koasa butubutu te Benisimane! Balabala ia gamu sapu kote ponini gamu pepeso na inuma vaeni e Devita si gamu doduru, meke va palabatu gamu koasa nana qeto minate, gua? 8 Asa gua ke kukiti nau gamu? Lopu keke gamu si tozi nau sapu sa tuqu soti si kalikali la gua koe Devita. Loke tie hite galagala nau, babe tozi nau sapu se Devita, keke koari na qua tie soti, si korapa hata ia kamahire si keke lolomo pude va mate au gua, meke sa tuqu soti si sovutuna sa!”

9 Doeqi si turu turaṉae tugo koari na palabatu varipera te Saula, meke zama si asa, “Dogoria rau se Devita totoso la si asa koe Ahimeleki sa tuna e Ahitubi pa Nobu.* 1 Samuela 21:7-9; Sam 52 10 Tepatepa la koe Zihova se Ahimeleki sapu nasa si kote tavetia e Devita pa hiniva Tanisa. Meke tiqe ponia vinabeo sa se Devita meke vala nia sa sa magu varipera te Qolaea sa tie Pilisitia.”

11 Ke va garunu la zinama sa baṉara Saula koe Ahimeleki sa tuna Ahitubi meke sari na turaṉana, sapu na hiama tugo pa vasileana pa Nobu pude mae, ke mae koasa si arini. 12 Zama la se Saula koe Ahimeleki, “Va avoso mae!”

“Hiera si rau qua baṉara” gua si asa.

13 Nanasa la ia Saula, “Venagua ke kukiti nau gamu kara Devita si arau? Vegua ke ponia vinabeo na magu varipera meke tepa ponia goi koasa Tamasa sapu nasa si kote tavetia Devita? Kamahire si talirau sa si rau meke korapa aqa nia sa sa lolomo pude va mate au.”

14 Olaṉa se Ahimeleki, “E Devita si na mua nabulu ṉoṉona meke na roamu soti si asa, koimata tadi na tie varipera pu kopu nigo, ta pamaṉae hola koari doduru tie pa korapana sa mua vetu baṉara. 15 Hinokara, nanasa ponia rau koasa Tamasa, meke lopu na qua totoso kekenu si hie pude tavete gua asa. Qua baṉara, mu lopu zutu au babe esei pule pa korapana sa qua butubutu. Lopu gilana hokaria rau si keke tiṉitoṉa la gua koasa ginugua hie.”

16 Zama sa baṉara, “Ahimeleki, agoi meke sari doduru mua butubutu si kaqu mate.” 17 Ke zama la i sa sari na tie kopu saripu turu kapaedi koasa, “Va mate i sari na hiama te Zihova! Va kalekale la gua koe Devita si arini, meke lopu hite tozi nau rini sapu ele govete si asa, ele tumae nia dia sa doduruna sa vivinei.” Ba korodia va matei rina tie kopu sari na hiama te Zihova. 18 Ke zama la koe Doeqi se Saula, “Agoi mamu va matei!” Meke va mate betoi e Doeqi. Koasa rane sana si va matei sa si ari ka vesu ṉavulu lima hiama saripu pada pude va sagei sari na poko hiama. 19 Garunu ni tugo Saula sari doduru tinoni pa popoa Nobu, sa vasileana lavata tadi na hiama pude tava mate: palabatu, na barikaleqe, koburu hiteke na lavata, bulumakao, doṉ'ki, meke na sipi si tava mate beto.

20 Ba se Abiata d, keke koari kasa tuna Ahimeleki si govete meke la somanae nana koe Devita. 21 Tozi nia sa sapu la e Saula meke va matei sari na hiama te Zihova. 22 Zama la se Devita koasa, “Totoso dogoria rau se Doeqi pa Nobu ranena asa, si gilana valeania rau sapu na asa hokara mo si kote tozi nia se Saula. Ke guana arau mo si va matedi sari turaṉamu. 23 Mu koa koa rau, mu lopu matagutu. Gita kara beto mo si hiva va mate gita Saula, ba kote tava sare si goi koa rau.”