1 Yesus kokolak nae, “Mamanene baa! Ei nana mbaꞌak mia Au. Au sama leo ai anggol huuk esa. Tehuu Au ia, ai anggol huu tetebes!* Nai Susula Hehelu Laak, hataholi mana sula kala lakasasama hataholi nusa Israel no ai anggol huuk esa, do, osi anggol esa. (Mete Sosoda Koa-kio kala 80:8-16; Yesaya 5:1-7; Yermia 2:21; Yeskial 15:1-8; 19:10-14; Hosea 10:1; ma susula feꞌek bali boe.) Tehuu hataholi nusa Israel asa laꞌo heok leme Lamatuak dala ndoon mai. Huu ndia de nai ia Yesus foi aon nae, Ndia ndia, ‘ai anggol huu tetebes’, huu Ana taa laꞌo heok neme Lamatuak hihii-nanaun mai. Ma Au Amang ndia, sama leo mana tao osi. 2 De hataholi fo kada nae ana nana mbaꞌak no Au, tehuu taa tao hata esa boe, na, Au Amang nggali henin, sama leo mana tao osi loꞌo heni basa baꞌe kala fo taa laboa. Tehuu hataholi esa-esak fo nana mbaꞌak no Au, na, Amak tao nalalao manggenggeok neme ndia dalen mai, sama leo mana tao osi kedi kekeꞌu baꞌek esa, fo suek boan boe namanoꞌu.

3 Au Dedeꞌa-kokolang sila, bisa tao nalalao ei dale mala so, sama leo mana tao osi tao nalalao ai huuk baꞌe nala. 4 Ei musi nana mbaꞌak nakandoo mia Au, sama leo Au nana mbaꞌak ua ei. Huu baꞌek fo tepa henin neme huun mai, taa bisa naboa so. Leondiak boe no ei. Ei taa bisa tao hata malole esa boe, mete ma ei taa nana mbaꞌak nakandoo mia Au.

5 Au ia, sama leo ai huu anggol esa. Ei ndia, sama leo ndia baꞌen. De hataholi fo nana mbaꞌak nakandoo no Au, ma Au boe nana mbaꞌak ua ndia, na, ndia sama leo baꞌek esa mana maboa noꞌuk. Huu mete ma ei taa nana mbaꞌak nakandoo mia Au, na, ei taa bisa tao hata fo malole. 6 Hataholi fo taa nana mbaꞌak nakandoo no Au, na, ndia sama leo baꞌek esa fo sosoan taa. Baꞌek matak leondiak, hataholi la lateme beta henin, fo elan namatuu. Basa de hataholi lakaduduluk lala baꞌe kala sila, de ala nggali sala leni haꞌi dale leu fo hotu heni sala. 7 Tehuu mete ma ei nana mbaꞌak nakandoo mia Au, ma Au Dedeꞌa-kokolang boe nahele nakandoo nai ei dale mala, na, ei bisa moke sudi hata neu Manetualain, boe ma dei fo Ana tao fee ei.

8 Mete ma ei tao dedeꞌa malole makadotok, na, sama leo baꞌek esa naboa makadotok, na, ndia soꞌuk namadedema Manetualain. No leondiak, na, ei boe oo matudu mae, ei ia, Au ana mana tungga nala.

9 Sama leo Amak sue Au, de Au boe oo sue ei leondiak. Ei musi nana mbaꞌak makandoo mia Au, fo suek Au bisa atudu Au susueng neu ei. 10 Mete ma ei tao tungga Au palenda nggala, na, ei nana mbaꞌak makandoo mia Au, de Au bisa atudu Au susueng neu ei. Ndia sama leo Au tao tungga Au Amang palendan, de Ana natudu Ndia susuen nakandoo neu Au.

11 Au afada dedeꞌa kala ia neu ei neme makahulun mai, fo suek ei dale mala bisa lamahoko, sama leo Au daleng namahoko. Huu Au hihiing na, ei dale mala lamahoko lalan seli! 12 Au palendang leoiak: ei musi masueao esa no esa, sama leo Au boe oo sue ei so.✡ Yohanis 13:34; 15:17; 1 Yohanis 3:23; 2 Yohanis 5 13 Mete ma hataholi esa sadia mate, fo suek ndia nonoon bisa nasoda, na, ana sue tebe-tebe ndia nonoon ndia. Taa hambu susuek esa lena heni ndia. 14 Mete ma ei tao tungga Au palendang nakandondoo henin, na, ei dadik Au nonoo nggala. 15 Au taa nau oke ei ae, Au ‘hataholi nadedenu nggala’ bali. Huu hataholi nadedenuk esa taa bubuluk no teteben ndia malanggan hihii-nanaun. Tehuu Au oke ei, ae Au ‘nonoong’, huu Au buka ledo-ledo basa hata fo Au Amang nafada Au so. 16 Ei taa hele Au. Tehuu Au ndia hele ma soꞌu ala ei, fo makalalaꞌok ues ia. No leondiak, ei musi miu tao dedeꞌa malole noꞌuk fo buna-boan bisa nahele nala dook. Ndia sama leo ai huu anggol esa naboa malole nakandondoo henin. Mete ma ei tao leondiak, na, ei bisa moke Au Amang sudi hata, boe ma Ana tao fee ei. 17 De Au palenda ei ia leoiak: ei musi masueao esa no esa.”

18 Yesus kokolak nakadaik nae, “Mete ma hataholi malai daebafok ia husembuluk leu ei, na, masaneda, huu ala husembuluk lakahuluk leu Au. 19 Mete ma ei ia, sama leo hataholi feꞌe kala malai daebafok ia, na, neu ko ala sue ei. Tehuu ei taa sama leo sila. Huu Au hele ala ei, fo tao kofeꞌe ei mima sila mai. Huu ndia de ala husembuluk leu ei.

20 Boso mafalende henin, fo Au afadak ei ndia so ae, ‘Ata esa taa lena heni ndia malanggan.’ De mete ma ala tao doidoso Au, na neu ko sila boe oo tao doidoso ei. Mete ma ala lamanene Au Dedeꞌa-kokolang, na, sila boe oo lamanene ei.✡ Mateos 10:24; Lukas 6:40; Yohanis 13:16 21 Dei fo ala tao doidoso ei, huu ei nana mbaꞌak mia Au. Sila boe oo taa lalelak Ndia fo mana madenu Au. 22 Au mai ma atudu dala ndoos neu hataholi manai dae-bafok ia so. De mete ma ala tao salak, na, ala taa laena toꞌok bali fo kokolak lae, ‘Wei! Ai taa bubuluk, ai taok ndia, salak.’ Mete ma Au taa kokolak dedeꞌa ndoos neu sala, na, fama ala duduꞌa lakandoo lae, sila taa sala hata esa boe. Tehuu hatematak ia taa.

23 Hataholi fo taa hii Au, ndia boe oo taa hii Au Amang. 24 Au tao tanda heran mata-mata kala so, fo hataholi feꞌek taa tao nitak. Hataholi malai dae-bafok ia lita tanda heran sila, tehuu ala taa hii Au ua Au Amang nai nusa-sodak. Mete ma Au taa tao tanda heran sila, na, Au Amang taok sila taa sala. Tehuu hatematak ia ala musi lemba salak ndia. 25 Dedeꞌa kala ia, basa sala dadi so, fo tao tungga hata fo nana sulak nai Lamatuak Heti-heun nae, ‘Ala taa hii Au. Naa te sila taa hihiin leondiak ndia, taa no huu-okak hata esa boe.’✡ Sosoda Koa-kio kala 35:19; 69:5

26 Tehuu dei fo Mana Makalalaꞌok ndia sangga mai. Ndia ndia Dulak fo tao ei bubuluk hata fo ndoos. Ana neme Au Amang mai. Mete ma Au uni Au Amang uu so, na, dei fo Au haitua Dulak ndia mai neu ei. Ana nafada ei laꞌeneu Au. 27 Ei musi kokolak miu hataholi feꞌek laꞌeneu Au, huu ei sama-sama mia Au so, neu faik fo Au mulai fee nanonolik.