1 Emitobang, sabtu veng, aing angu nehe Yahudi ang naung ived sambajang. Vedba tila muse, Maria ba Magdala aabang enehe angu, Maria ba eabeung (aing ba Yakobus iva angu) bot Salome, inang tue ila jal manema beli, aulange tobang se, baning ila metma Yesus Ebaring angu vengbokong, nehe Yahudi ehada angu eamulung. 2 Ang muse minggu kukuaveng, inang tue daang angu mi ila. 3-4 Via hahama mi muse inang tue itat mateng hula, “Ee! Eningse nuba ba bisa toang moling var eele angu aoring metma daang eviaha angu eahalang? Se pinang tue anga etabit bae daeri niang, se var angu etatabit eele!”

Aarunge ini ila angmi, e ini uuling ateing se, var angu ava aoring iila. 5 Ang muse inang tue daang angu mi maso. Aarunge inang tue mibarotit etatabi, se ini uuling ateing se nehe kuar nu itene oa angmi mihi sehi ekondo angu majaat huring jara. 6 Ang muse nehe kuar angu iat mateng vengbanang hula, “Ekang iiuangmari ekang! Na ateing se, iinang tue hoa hula Yesus ba Nasaret Enehe angu, ba ini Aing metma leut venghelet Ameang angu Aing aalaping. Ana bae angami niang iila, se Ana bale aabeta tila angu ebele. Ma, iinang tue ba iina euling, mana ba ini Yesus Ebaring metma mi mea angu, osing iila. 7 Ba, aaungba iinang tue uuser bale ila! Ila Petrus iimal iat mateng hula, Yesus bale aabeta tila. Ana lamal eturat ila Galilea mi. Eningse ini angmomi Yesus Aing harak, emenghula turangmi Ana iiat mateng iila angu edadenang. Ba, aaungba iinang tue bale ila!”✡ Matius 26:32; Markus 14:28

8 Nehe tue angu uuling se mana angu etatabit osing muse, ini mibaroti. Ang muse inang tue bihit bale kaluar hela. Ang muse inang tue uuser ila. Ini bae via mi nehe iiba at mateng di niang, se ini iuangmarit etatabi angu ebele.

9 Minggu kukuaveng angu, Yesus Ava metma Maria ba Magdala enehe angu ematurat etubing, aing ba tura Yesus setang bititu aterit aing mi kaluar hela eahalang angu.* Yunani ehur hurak tura bot miaaung angu hur kokal 8 mi muse seng. Markus esarenta vengtering angu via aaru: via nu angu aavening (Markus 16:9-20), bot eabeung nu angu tukang (Markus 16:9-10). Nehe omi venang ba Markus esarenta angu manggaratit aaung ang naung iamulung se, evengtering via aaru angu ini eveat hurak. Aarupi Yesus bale Aabeta Eaamina omimi, bot nehe ba omi metma Yesus Aing vengaanamang angu ekarajang vengsarenta. 10 Ana uuling Yesus ateing seng muse, ana bale ila nehe emangpi ba tura Yesus Amulung ang naung iat mateng. Yesus Eaamina angu mivengani se, iomi dira bot ieng oono hela, angu ba ini jedung baning taing vengkumpul sehi. 11 Ang muse Maria iat mateng hula, “Etatalang ba iini jedung iiomi dira sehi angu? Ekang iiomi dira ekang, se Yesus bale aabeta tila! Vede kakai anga, ba na Aing harak iila!”

Aarunge ing emangpi vengbanang hula, “We! Aana akal mateng!”

12 Ang muse, Yesus Egahing vala aaru lamal aabang nu mi ila. Via hahama mi muse, Yesus ila Ava metma oleve itubing. Aarunge Ana Ava aboit aabeung. Aarunge kabing dena muse, oleve di Apang ateing. 13 Ang muse oleve bale ila iserang ang naung iat hubait hula, “Ee! Iini vengmee hengi! Vede kakai anga, noleve via mi Yesus Aing harak!”

Aarunge iserang ang naung emangpi oleve ihur ebalet hula, “Ee! Oleve ekang akal mateng aulang ekang!”

14 Seng muse bot, Yesus Egahing vala arinu belta nu angu, mihit naadang sehise, Ana hoa ing harak. Ana iat mateng vengbanang hula, “Ah! Iing anga etatabit iiong aanamang! Nehe iiat hubai tilat hula, ini uuling ieng taang Nateing iila, aarunge iini bae ihur angu e etabit vengbanang niang! Iini hula ing emangpi akal mateng! Ba! Vede anga Naing ba hoa iila. Na etabit aamina tila, aarunge angase, Na bale aabeta tila. Ba iini iieng uuling.

15 Ba angase iini malekang ila por alolang anga miiipi, e Nesarenta aaung-hama angu, metma nehe emangpi veng iat hubai.✡ Kisah Para Rasul 1:8 16 Nuba ba omi metma Naing vengaanamang, bot nehe aing sarani, eningse Lahatala Ana aabetang ejajehing angu metma ma enang. Aarunge nuba ba bae omi metma Naing vengaanamang niang, eningse Lahatala Ana aing hukung, anguba Ana atobang aing metma sorga Lahatala Eabang hamulang angu eola. 17 Bot nehe ba omi metma Naing vengaanamang angu, eningse ini tanda herang emangpi angu ening, e nehe emangpi ateing hula kavasa ba ing veng angu etatabit Lahatala abung hoa. Angu ebele, eningse ini bisa Nene angu paket metma setang ateri, bot eningse Lahatala ening hur aabeung ba ini bae ateing niang angu di ini bisa veng mateng. 18 Bot hula ini duming amia vengpina e, rasong ba ini na di se, ini bae silaka niang. Bot hula ini iatang metma nehe dila ang naung ing taang mea angse, nehe angu malekang mona.

19 Ana Egahing vala ang naung iat mateng seng ang muse, Lahatala Ana Yesus Aing ohit sorga mi mida. Angumi Ana Lahatala atang tene oat mihi, e Lahatala At hama-hamat nehe parenta.✡ Kisah Para Rasul 1:9-11

20 Ang muse Egahing vala ang naung, Eparenta angu eamulung. Ini ila mana kanap Yesus Esarenta aaung-hama angu metma nehe emangpi iat hubai. Bot Lahatala kavasa metma ma inang, e ini tanda herang emangpi angu ening, emenghula Yesus iat hubai tila angu edadenang. Ang muse nehe toang rae angu iomi metma Yesus vengaanamang, se ini ateing iilat hula, sarenta aaung-hama angu etatabi.

Nehe jangu tue angu ila Petrus iimal ing harak muse, nehe kuar ba vede daang omimi iat mateng angu inang tue metma ing emangpi veng iat hubai.† Yunani ehur hurak tura bot miaaung angu hur kokal 8 mi muse seng. Markus esarenta vengtering angu via aaru: via nu angu aavening (Markus 16:9-20), bot eabeung nu angu tukang (Markus 16:9-10). Nehe omi venang ba Markus esarenta angu manggaratit aaung ang naung iamulung se, evengtering via aaru angu ini eveat hurak. Aarupi Yesus bale Aabeta Eaamina omimi, bot nehe ba omi metma Yesus Aing vengaanamang angu ekarajang vengsarenta. Seng ang muse, Yesus Ana Egahing vala ang naung ing parenta, e ini ila Esarenta aaung-hama angu metma mana emangpi mi vengmaring, ila por etupa ang naung taang. Sarenta aaung-hama anga via matubing, e Lahatala Ana nehe ening lohit metma ijasi-iahalang ang naung eola, e ing metma aabetang ejajehing angu omimi.

Sarenta aaung-hama anga etatabi. Angu ebele ana vengtahang ejehing-emeang, bae eseng veng niang.