Mutu Yesus Eetvala ang naung
Esarenta
1
Lahatala palait hula ERoh Hamulang panatut
1-3 Nimang Topilus* Topilus ene Yunani ehur mi se evengbanang ꞌnehe ba omi metma Lahatala ejahiꞌ. Anga, Lukas ebuku emiaaru ba ana hurak metma Topilus enang. Lukas 1:1-4 di euuling. ba oomi aaung. Naing ba Lukas, na aaing aada.
Ne buku ba tura angu, emangpi ba Yesus Eaabetang omimi angu na hurak iila. Ana ening iila, bot emangpi ba ehalomang Ana vengbanang iila angu, na hurak. Ana Eetvala ang naung ing vengtalail. Nehe Aing ening dira tila bot Ameang, aarunge Lahatala ening bale aabeta. Uanguveng Ana bale aabeta muse, Ana ava metma Eetvala ang naung itubing. Ini uuling Ateing mi aaedeng ila mietang ari buta, ini ateing iila, etatabit Ana aabeta tila. Ana bot iat mateng hula, Lahatala angu emenghula raja ba parenta pina angu edadenang. Lahatala ERoh Hamulang angu Ekavasa omimi angu ba Ana ing gahing.
Angu emangpi angu, ba na hurak iila.
4-5 Minu adana, Yesus bot Eetvala ang naung ini taing vengmihit hama-hama doe Saitun dol taang. Ana ing parentat hula,
“Vengani! Tura angu Yohanis ana mang jar ba metma nehe sarani, aarunge angase Lahatala Ana hula ening miaaung-mihama, se ved aaedeng maveng se, Ana ERoh Hamulang angu metma maiinang angu ebele. Base, iini malekang ading. Iini ekang lamal bendar Yerusalem anga eahalang ekang. Aarunge iini angami ading sampe Nimang Ana ERoh Hamulang metma iiomi mi tila angu edadenang. Bot Nandi metma iiat hubai tila angu eamulung.”✡ Lukas 24:49; Matius 3:11; Markus 1:8; Lukas 3:16; Yohanes 1:33
Mutu Yesus Ava ohit sorga mi mida
6 Yesus bot Eetvala ang naung imampi taing vengkumpul sehise, ini Adangtaaning hula, “Nimang! Ni hula taaning alang: Turang jamang negara Israel ava parenta angu Nimang vengani sehi. Aulang ba, angase Nimang hula ning ening lohit metma Roma eparenta angu eahalang e, ni malekang jol aabeung ba ading?”
7 Ang muse Yesus ibalet hula, “Ejol angu iini ekang veng taaning ekang. Nimang ba enang kolang ejol angu veng ator. 8 Aarunge kabingdena maveng se, Lahatala ERoh Hamulang angu hoa iiomi mi, senge kavasa angu iing veng. Sengila se iini ila naba ba Na ening iila angu vengmaring metma nehe toang ba bendar Yerusalem mi bot aabang ba propinsi Yudea mi bot propinsi Samaria mi ang naung bot ila por ola ang naung taang veng iat hubai.”✡ Matius 28:19; Markus 16:15; Lukas 24:47-48 9 Mateng aulang seng muse, Yesus iapangadang mi ava ohit burang mi mida. Ana ava ohit ila bano Aing vengtering, angmuse ini bae uuling ateing niang iila.✡ Markus 16:19; Lukas 24:50-51
10 Ini jedung burang euuling sehi se mibaroti se, nehe aaru pakiang majaat hamulang pake ue iabar oa ang mi tahi sehi. 11 Nehe aaru angu mateng hula, “He! Iing ba Galilea enehe! Etatalang ba iini jedung taninggar burang euuling angu? Vede Yesus Ava ohit burang mi mida ila bano Aing vengtering iini uuling ateing iila. Iini uuling ateing Ana mida tatalang se, Ana bale hela di eningse aulang.”
Ini nehe aabeung valaping Yudas etelul ening
12 Seng angmuse, Yesus Eetvala ang naung Saitun dol taang bale hela ila bendar Yerusalem mi. Dol angu bendar eola oma kilo nu.† Uanguveng angu, Yahudi eguru agama ang naung atoran ening hula, ved hamulang adana, Yahudi enehe ang naung ekang lamal ola mi ekang. Yunani ehur kokal ang mi hurak hula, dol anga Yerusalem eolat emenghula, “Ved hamulang mi lamal eola” edadenang. Base, aulange pi ateing, hula dol angu bendar eolat kilo nu.
13 Ila bendar mi muse, ini hava nu mi mida mihit vengtahang. Angmuse, ini hava omi atela ang mi mida. Etvala ang naung iene benang ba:
Petrus,
Yohanis,
Yakobus,
Andarias,
Pelipus,
Tomas,
Bartolomeus,
Mateos,
Yakobus (Alpius oal),
Bot Yudas (Yakobus oal).✡ Matius 10:2-4; Markus 3:16-19; Lukas 6:14-16
14 Ing emangpi biasat taing vengmihi tominu sambajang hama-hama. Maria Yesus iva, nehe jangu aaedeng, bot Yesus ekaku ang naung imampi sambajang hama-hama.
15 Ved nu adana, ini bot taing vengmihi oma inang ratu nu ari aaru. Petrus ana aloming tahi senge, ana mateng hula, 16 “Niva-nimang bot nekaku naung! Yudas ba tura erombongan iat ila Yesus adoi angu, iini jedung vengani sehi. Emangpi ba Yudas ening angu, etabit malekang jadit aulang. Se turang jamang mi Lahatala ERoh hur metma raja Daud omimi senge nababa metma Yudas adana angu ana hurak aulang iila. 17 Tura aing angu pi iiba. Andi piat karajang.”
18 (Aarunge uanguveng Yudas ana Yesus Aing aabali sengmuse, eseeng angu ana metma meke kabingdena beli. Angmuse, meke angu metma emana aamina ening se ana angu mi adodut baat hela sampe atou takahi, bot atou sar ang naung emangpi kaluar. 19 Angmuse nehe ang naung itat sarenta angu ebele nehe emangpi ba bendar Yerusalem mi ang naung di Yudas eaamina angu vengmee. Anguba meke angu ini Ibrani ehur mi vengbanang ꞌAkeldamaꞌ evengbanang hula, angu ꞌMeke veꞌ.)✡ Matius 27:3-8
20 Petrus bot mateng tarus hula, turang jamang mi raja Daud hurak aulang metma eMasmur buku tajaning angu mi tila. Ana hurak hula,
ꞌKilange emihing mana angu, ana osing;
nehe iiba ekang ang mi mihi ekang.ꞌ
Angmuse ana bot taang hurak hula,
ꞌKilange karajang angu, ini metma nehe aabeung ba enang.ꞌ✡ Mazmur 69:25; 109:8
21-22 Base, pi malekang nehe valaping metma Yudas etelul ening. Nehe ba piamulung hama-hamat lamal luung iila. Malekang nehe ba Mutu Yesus At aabeta bot Amulung taang-taang mi ila, mulai Yohanis Yesus Aing sarani mi. Andi bot malekang uuling eng taang ateing, hula, Mutu Yesus aamina bot bale aabeta tila, bot Ana bale ila sorga mi mida, anguba pi nu vengtalail.”✡ Matius 3:16; Markus 1:9; 16:19; Lukas 3:21; 24:51
23 Petrus mateng aulang seng muse, nehe ba imampi taing vengkumpul angmi angu ini nehe aaru iene vengbanang. Nehe nu ene Matias, bot nu angu, ene Yusup (ba ini ibiasat eaarut Barsabas; ene nu angu, benang ba Yustus). 24-25 Seng angmuse ini sambajang hula, “Nimang doe sorga mi! Nehe emangpi iomi Nimang ateing etatabi. Yudas ana ekarajang veng ea angu ebele ana aamina. Base Nimang Ana nehe aaru anga metma ni tubing, nuba ba ni vengtalail metma Yudas etelul ening, senge ni hula aing ohit metma Mutu Yesus Eetvala ening.” 26 Seng muse nehe aaru iene angu ini bing amaang. Angmuse bing angu Matias ba vengbaa. Angu ebele ini aing ohit metma etvala ening inang arinu belta nu angu imampi hama-hama.
*1:1-3 Topilus ene Yunani ehur mi se evengbanang ꞌnehe ba omi metma Lahatala ejahiꞌ. Anga, Lukas ebuku emiaaru ba ana hurak metma Topilus enang. Lukas 1:1-4 di euuling.
✡1:4-5 Lukas 24:49; Matius 3:11; Markus 1:8; Lukas 3:16; Yohanes 1:33
✡1:8 Matius 28:19; Markus 16:15; Lukas 24:47-48
✡1:9 Markus 16:19; Lukas 24:50-51
†1:12 Uanguveng angu, Yahudi eguru agama ang naung atoran ening hula, ved hamulang adana, Yahudi enehe ang naung ekang lamal ola mi ekang. Yunani ehur kokal ang mi hurak hula, dol anga Yerusalem eolat emenghula, “Ved hamulang mi lamal eola” edadenang. Base, aulange pi ateing, hula dol angu bendar eolat kilo nu.
‡1:13 Hur ꞌSelotꞌ bot hur ꞌPatriotꞌ evengbanang hula, Simon anga nehe aaedeng itatominu senge ba inangkolang tahi angu enehe. Ini hula Roma eparenta nehe Israel epor taang angu aterit metma iola.
✡1:13 Matius 10:2-4; Markus 3:16-19; Lukas 6:14-16
✡1:19 Matius 27:3-8
✡1:20 Mazmur 69:25; 109:8
✡1:21-22 Matius 3:16; Markus 1:9; 16:19; Lukas 3:21; 24:51