9
Zion Rhal Soah Laitloeknah
1 Isa 17.1-3; Jer 49.23-27; Amo 1.3-5 Isa 23.1-18; Ezk 26.1—28.26; Joe 3.4-8; Amo 1.9,10; Mat 11.21,22; Luk 10.13,14Hadrak khohmuen neh a duemnah,
Damasku ham BOEIPA kah olrhuh ol.
Hlang neh Israel koca boeih kah a mik he,
BOEIPA dongah ni a om.
2 A taengah rhi aka suem Khamath khaw,
bahoeng aka cueih Tyre neh Sidon khaw om.
3 Tyre loh amah hamla vongup a sak tih,
cak te laipi bangla,
sui khaw vongvoel kah tangnong bangla a hmoek.
4 Ka Boeipa loh anih te a talh vetih,
a caem khaw tuitunli la a ngawn pah ni he.
Te phoeiah anih te,
hmai loh a hlawp pawn ni.
5 Isa 14.29-31; Jer 47.1-7; Ezk 25.15-17; Joe 3.4-8; Amo 1.6-8; Zep 2.4-7Ashkelon loh a hmuh vaengah a rhih vetih,
Gaza khaw muep poi ni.
Ekron khaw a uepnah ham yak ni.
Gaza lamkah manghai milh vetih,
Ashkelon khaw khosak tal ni.
6 Ashdod ah halhca loh kho a sak vetih,
Philisti kah hoemdamnah ka khoe ni.
7 A ka lamkah a thii khaw,
a no laklo lamkah a sarhingkoi khaw,
ka khoe pah ni.
Amah khaw mamih kah Pathen hamla sueng vetih,
Judah ah khoboei la om ni.
Te vaengah Ekron te Jebusi bangla om ni.
8 Ka im he, aka paan tih aka mael taeng lamloh,
rhaltawt neh ka rhaeh thil ni.
Ka mik neh ka hmuh coeng dongah,
tueihno loh amih te paan voel mahpawh.
Zion Manghai Lo Coeng
9 Mat 21.5; Jhn 12.15Zion nu aw bahoeng omngaih laeh,
Jerusalem nu aw yuhui laeh.
Na manghai te na taengah a dueng la ha pai coeng ke.
Amah loh mangdaeng te a khang.
Te dongah laak so neh
laaknu a ca laaktal dongah ngol.
10 Tgt 72.8Ephraim lamkah leng neh Jerusalem lamkah
marhang khaw ka hnawt vetih,
caemtloek lii khaw tlawt ni.
Namtom taengah rhoepnah a thui vetih,
a boeinah he tuitun lamloh tuitun duela,
tuiva lamloh kho bawt duela a pha ni.
11 Sng 24.8Nang khaw na paipi thii rhangneh
na thongtla pataeng a khuiah
tui aka om pawh tangrhom lamloh ka hlah ni.
12 Ngaiuepnah khuikah thongtla rhoek,
lunghim taengla mael uh laeh,
tahae khohnin ah pataeng a doek tih
nang taengah rhaepnit la kan thuung ni.
13 Judah te kamah hamla lii la ka phuk vetih,
Ephraim khaw cung ni.
Greek nang ca rhoek taengah
Zion nang ca rhoek te kan haeng vetih,
nang te hlangrhalh kah
cunghang bangla kang khueh ni.
14 BOEIPA he amih soah phoe vetih,
a thaltang te rhaek bangla a khuen ni.
Te vaengah ka Boeipa Yahovah loh
tuki te a ueng vetih,
tuithim hlipuei neh cet ni.
15 Caempuei BOEIPA loh amih te a tungaep ni.
Te vaengah a caak uh vetih,
payai lung te a khoem uh ni.
Misurtui vaengkah bangla,
a ok vetih umya uh ni.
Te phoeiah tah baelcak bangla,
hmueihtuk rhungsut bangla hah uh ni.
16 Te khohnin ah tah,
amih te a Pathen BOEIPA loh,
a pilnam tuping la,
a khohmuen ah aka vang
rhuisam lung la a khang ni.
17 A kawnthen khaw bahoeng then,
a sakthen khaw bahoeng then.
Tongpang te cangpai neh,
oila khaw misur thai neh thaihsu ni.