52
BOEIPA kah Khangnah Hapai
1 Olp 21.2,27Haenghang laeh, haenghang laeh
Zion nang loh sarhi tak sak.
Khopuei cim Jerusalem nang
boeimang himbai bai laeh.
Na khuiah aka pawk ham pumdul neh
rhalawt loh n'koei voel mahpawh.
2 Laipi te khoek laeh.
Jerusalem aw thoo lamtah ngol laeh.
Zion nu tamna aw na rhawn kah
kuelrhui te hlam rhoe hlam laeh.
3 Te dongah BOEIPA loh, “A yoeyap la n'yoih uh tih tangka mueh lam ni n'tlan uh eh,” a ti. 4 Te dongah ka Boeipa Yahovah loh he ni a thui. Lamhma ah tah ka pilnam loh Egypt ah bakuep pahoi ham suntla tih Assyria loh lungli lungla la anih te a hnaemtaek. 5 Rom 2.24Tahae ah ba aih nim kai tloe tah, menim kai ham tah BOEIPA kah olphong lah ve? Ka pilnam te poeyoek la a khuen coeng. Anih aka taem la aka taem rhoek tah rhung uh coeng. BOEIPA kah olphong dae ta, nainoe taitu la hnin takuem ah kai ming a tlaitlaek. 6 Ka ming he ka pilnam loh ming tangloeng saeh. Tekah khohnin ah kamah loh, “Kai ni he,” ka ti tangloeng coeng.
7 Nah 1.15; Rom 10.15; Eph 6.15Rhoepnah aka phong tih aka yaak sak,
a then aka phong tih khangnah aka yaak sak,
Zion taengah, “Na Pathen tah manghai coeng,”
aka ti nah kah a khokan tah tlang soah
khaw damyal tangkik mai.
8 Na rhaltawt rhoek kah ol tah
ol pakhat la huek a huel uh tih tamhoe uh.
BOEIPA te Zion la a mael vaengah tah
a mik, mik ah so uh thae ni.
9 Jerusalem imrhong rhoek
tun pang uh lamtah tamhoe uh.
BOEIPA loh a pilnam a hloep tih
Jerusalem a tlan coeng.
10 Namtom boeih kah mikhmuh ah
BOEIPA loh a ban cim te a lam vetih
diklai khobawt ah mamih Pathen kah
khangnah te boeih a hmuh uh ni.
11 2Ko 6.17Nong uh laeh,
nong uh lamtah te lamloh coe uh laeh.
Rhalawt te ben boeh,
a khui lamloh nong laeh.
BOEIPA kah hnopai aka phuei long tah meet uh.
12 Tokrhat la coe boel lamtah
yonglong khaw hmaai boeh.
Nangmih mikhmuh ah aka cet
BOEIPA neh Israel Pathen loh nang ng'khoem ta.
Sal Patang A Thangpom
13 Ka sal loh a cangbam bitni.
Amah te a pomsang vetih
a ludoeng vaengah bahoeng sang bitni.
14 Nang taengah muep a hal uh vanbangla
a hmuethma khaw hlang lakah,
a suisak hlang ca rhoek lakah
poeih uh tangloeng coeng.
15 Rom 15.21Namtom rhoek khaw anih kongah a haeh muep vetih
manghai rhoek loh a ka a buem uh ni.
Amih taengah a doek pah pawt te khaw a hmuh uh vetih
a yaak uh noek pawt te a yakming uh ni.