51
Zion ham Khangnah
1 Duengnah aka hloem tih
BOEIPA aka tlap rhoek loh kai ol he hnatun lah.
Nangmih n'daeh nah lungpang neh
nangmih n'koeih nah lungkhui tangrhom te paelki uh.
2 Na pa Abraham neh nangmih aka yom Sarah te so lah.
Anih te pakhat bueng ni ka khue dae
anih yoethen ka paek tih ka ping sak.
3 BOEIPA loh Zion a hloep vetih
a imrhong khaw boeih a hloep pah ni.
A khosoek te Eden bangla, a kolken te
BOEIPA dum bangla a khueh ni.
A khuiah omngaihnah neh kohoenah a hmuh vetih,
uemonah neh oldi ol a yaak ni.
4 Ka pilnam loh kamah taengah hnatung uh lamtah
ka namtu loh kamah taengah hnakaeng uh.
Olkhueng tah kai taeng lamloh ha thoeng vetih
ka tiktamnah te pilnam kah vangnah la ka hoep ni.
5 Ka duengnah he yoei tih
kai kah daemnah tah ha pawk coeng.
Ka ban loh pilnam ham lai a tloek ni.
Kamah he sanglak rhoek loh n'lamtawn uh tih
ka ban a ngaiuep uh.
6 Na mik vaan la dai lamtah
diklai dangdik ke khaw paelki lah.
Vaan ke hmaikhu bangla cing vetih
diklai khaw himbai bangla hmawn ni.
A khuikah khosa rhoek khaw pilhlip bangla duek ni.
Kamah kah khangnah he kumhal duela
om vetih ka duengnah he rhihyawp mahpawh.
7 Duengnah aka ming tih a lungbuei ah
ka olkhueng aka dueh pilnam loh
kamah taengah hnatun uh lah.
Hlanghing kah kokhahnah te rhih uh boel lamtah
amih kah honah dongah rhihyawp uh boeh.
8 Amih te bungbo loh himbai bangla a caak vetih
keet loh tumul bangla a yoop ni.
Tedae kai kah duengnah tah kumhal duela,
kamah kah khangnah he cadilcahma kah
cadilcahma duela om ni.
9 Haenghang laeh, haenghang laeh,
BOEIPA bantha kah a sarhi te bai laeh.
Khosuen thawnpuei khothoeng tue kah
bangla haenghang laeh.
Rahab aka daeh tih
tuihnam aka poeih te nang moenih a?
10 Tuipuei tui aka dung tangkik aka kak sak,
a tlan rhoek loh a kat nah ham longpuei te
tuipuei dung ah aka khueh khaw nang moenih a?
11 Te dongah BOEIPA kah a lat rhoek tah
ha mael uh vetih tamlung neh,
a lu dongkah kumhal kohoenah neh Zion a pha uh ni.
Omngaihnah neh kohoenah loh a kae vaengah tah
kothaenah neh hueinah khaw rhaelrham pawn ni.
12 Nangmih aka hloep te khaw kai kamah ni.
Nang hlanghing, duek aka rhih te unim?
Hlang capa he sulrham bangla aka lam ni a tloeng uh.
13 Nang aka saii, vaan aka dih tih
diklai aka suen BOEIPA te na hnilh.
Kosi kah a kilh dongah hnin takuem na rhih nainoe mai.
Tedae phae hamla aka tawn uh tih
kosi kah a kilh te ta melae?
14 A khuum hlang te koeloe a hlah vetih
vaam khuiah khaw duek mahpawh,
a buh khaw vaitah mahpawh.
15 Kai Yahovah na Pathen loh
tuitunli khaw a kueng tih a tuiphu loh hue a sak.
A ming tah caempuei BOEIPA ni.
16 Na ka dongah ka ol kang khueh tih
ka kut kah hlipkhup neh nang kan dah.
Vaan aka ling tih diklai aka suen loh Zion te,
“Nang tah ka pilnam ni,” a ti ham ni.
17 Olp 14.10; 16.19Haenghang laeh, haenghang laeh
Jerusalem aw thoo laeh.
BOEIPA kut lamkah kosi boengloeng na ok coeng.
Ngaengainah boengloeng dongkah
a tuisam te na ci tih na ok.
18 A ca sak boeih loh amah te khool pawt tih
a ca cah boeih loh a kut ah moem voel pawh.
19 Te rhoi loh nang n'doe coeng.
Nang hamla unim aka rhaehba lah ve?
rhoelrhanah neh pocinah,
khokha neh cunghang lakli ah
u nang nim kan hloep bal eh?
20 Na ca rhoek loh saa uh tih
thaang dongkah cuung bangla imlang tom ah lu a doelh uh.
Te dongah BOEIPA kah kosi neh
na Pathen kah tluungnah ngawn tah rhoeh coeng.
21 Te dongah mangdaeng neh misurtui nen pawt khaw
aka rhuihmil tarha loh ya laeh he.
22 Tangkhuet la a pilnam aka rhuun
na Boeipa Yahovah neh na Pathen loh,
“Na kut lamkah rhuihmil boengloeng te ka loh coeng he ne,
kai kah kosi boengloeng dongkah
tuisam te ok hamla koep koei voel boeh.
23 ‘Na hinglu te duen lamtah kang kan uh mai eh,’ a ti uh tih
nang aka pae sak rhoek,
nang nam te diklai bangla na duen pah tih long bangla
aka pongpa thil rhoek kah kut dongah ni ka paek pawn eh,” a ti.