1 Preisim YAWEI det trubala God!

Ai garra gibit theingks langa YAWEI garram ol main hat.

Lida langa ol im pipul weya majurrumap miselp,

2 Trubala! Ola ting weya YAWEI oldei dumbat, olabat brabli gudwan.

Ol detlot pipul hu oldei gudbinji blanga detlot gudwan ting, oldei wandim sabi mowa blanga olabat.

3 Garram detmatj rispek en pawa im dum ebrijing,

en im trubalawei jidan olagijawan.

4 YAWEI nomo larram wi fogedabat blanga ola gudwan ting weya im oldei dumbat.

Im brabli kainbalawan en im garram soribalawan filing blanga pipul.

5 Im gibit daga langa ol detlot hu rispek im.

Im nomo fogedabat im strongwan pramis.

6 Imbin shoum im pawa langa im pipul olabat wen imbin gibit olabat ola kantri blanga ola najalot pipul.

7 Langa ebrijing im dum im trubala,

en im oldei gibit feyago langa pipul.

Yu gin trastim ol im lowa brabliwei.

8 Im lowa jidan olagijawan.

Olabat jidan trubala en dei jidan raitwei, nomo garram eni rong.

9 Imbin baiyimbek im pipul olabat,

en imbin meigim det olagijawan brabli strongwan pramis garram olabat.

Im na det holiwan en det haibalawan God.

10 Yu garra abum rispek langa YAWEI basdam blanga jidan sabibala,

en im garra gibit ol detlot pipul hu teiknodis langa im lowa gudbala main blanga jinggabat raitwei.

Pipul garra oldei kipgon preisimbat im olagijawan.✡ Job 28:28; Prab 1:7; 9:10