1 YAWEI det trubala God bin dalim main Bos,

“Jidan iya langa main raidensaid en ai garra bidim ola enami blanga yu en meigim olabat jidan lobala langa yu.”✡ Meth 22:44; Mak 12:36; Luk 20:42,43; Eks 2:34,35; 1 Karin 15:25; Ifi 1:20-22; Kalosh 3:1; Hib 1:13; 8:1; 10:12,13

2 Brom Saiyan na YAWEI garra meigim yu jidan bos blanga loda kantri.

Im tok, “Yu jidan bos blanga yu enami olabat.”

3 Langa det dei wen yu garra fait langa yu enami olabat,

yu pipul olabat garra kaman en album yu.

En jis laik det dyu weya im jidan ailibala,

wal seimwei na ola yangbala men garra kaman langa yu deya ontop langa detlot seikridwan hil.

4 YAWEI bin meigim strongbala pramis en im kaan breigim det pramis.

Imbin tok, “Yu garra jidan haibala serramonimen olagijawan jis laik Melkisadek.”✡ Hib 5:6; 6:20; 7:17,21

5 Det Bos jidan langa yu raidensaid.

Wen im garra gitwail im garra binijimap ola king.

6 Im garra jadjim ola pipul langa ebri kantri, en im garra gaburrumap det faiting pleis garram ola ded bodi.

Im garra bidim ola king oloba langa dijan wel.

7 Det king kaan wori blanga im enami olabat na, en im gin dringgim woda brom eni lilwan krik.

En im garra jidan brabli strongbala dumaji imbin win.