104
Kaksakin El Su Orala Ma Nukewa
1 Kaksakin LEUM GOD, O ngunik.
O LEUM GOD luk, kom fulatlana!
Kom nuknukyang ke sunak ac wolana.
2 Kom afinkomi ke kalem.
Kom laknelik kusrao oana sie lohm nuknuk,
3 Ac musaela nien muta fulat lom fin kof uh lucng liki kusrao.* kof uh lucng liki kusrao: kof inge ma srumunyuk in Gen 1:6–7
Kom orekmakin pukunyeng uh oana chariot nutum
Ac kasrusr fin eng uh.
4 Kom oru tuh eng uh in mwe utuk kas lom,
Ac sarmelik lun sarom uh oana mwet kulansap lom. Heb 1:7
5 Kom oakiya faclu fin pwelung ku la —
Ac fah tiana mukuikui.
6 Kom filiya meoa uh fac oana sie nuknuk,
Ac kof uh afinya eol uh.
7 Ke kai lom, kof uh kaingelik,
Ac ke pusren sap lom, elos sa na kaing.
8 Kof uh sororla fineol uh me nu infahlfal uh,
Nu yen kom orala nu selos.
9 Kom oakiya sie masrol ma elos tia ku in alukela,
Tuh elos in tia sifil afinya faclu.
10 Kom oru tuh infacl srisrik in sororma infahlfal uh,
Ac infacl lulap in ut inmasrlon inging uh.
11 Kof inge orala mwe nim nimen kosro nukewa inimae,
Ac kosro donkey nimnim we ac tila malu.
12 Won yen engyeng uh elos oru ahng lalos
Ac on ulun sak sisken infacl.
13 Kom supwama af inkusrao me nu fineol uh,
Ac faclu sessesla ke mwe insewowo sum me.
14 Kom akkapye mah nu sin cow uh,
Ac sacn nu sin mwet uh
Tuh elos in yukwiya ac konauk mongo nalos kac,
15 Ac in orala wain in akenganyalos,
Ac oil in olive tuh in mwe akmusra,
Ac mwe mongo in sang ku nu sin mwet.
16 Yokna af in aksroksrokye sak cedar ke inging Lebanon —
Sak sunun LEUM GOD, ma El sifacna yukwiya.
17 Won elos orek ahng lalos olo,
Won stork elos oru ahng lalos ulun sak fir.
18 Nani lemnak elos muta fineol fulat,
Ac kosro coney elos wikwik ye fulu uh.
19 Kom orala tuh malem uh in mwe akilen kais sie malem;
Ac faht uh etu na pacl in tili la.
20 Kom orala fong, na ke pacl lohsr
Kosro lemnak ac oatume.
21 Lion fusr elos ngutngut ke elos forfor
In suk ma nalos su God El akoo nu selos.
22 Na ke faht uh takak, elos ac folokla
Ac ona ke luf lalos.
23 Mwet uh ac som nu ke orekma lalos
Ac elos ac orekma nwe ke ekela.
24 LEUM GOD, puslana ma kom orala!
Ke lalmwetmet lom kom orala ma inge nukewa!
Faclu sessesla ke ma kom orala.
25 Meoa uh pa ingo, yohk ac sralap,
Yen kain in ma moul puspis muta we —
Kewana ma yohk ac ma srihk.
26 Oak palang uh kasrusr fac,
Ac Leviathan, wet lulap soko ma kom orala, el srital we. Job 41:1; Psa 74:14; Isa 27:1
27 Ma inge nukewa elos filiya lulalfongi lalos in kom
Tuh kom fah sang mwe mongo nalos ke pacl fal.
28 Kom sang ma nalos ac elos mongo kac,
Kom kitalos ac elos kihpkin.
29 Ke pacl kom ngetla lukelos, elos sangeng;
Ke kom tulokinya momong lom lukelos, elos misa
Ac folokla nu ke kutkut† kutkut: liye Psa 103:14 ma elos orekla kac.
30 Tuh ke kom sang ngunum,‡ ngunum: oasr kalmac akosr ke kas Hebrew se inge: “ngun,” “eng lulap,” “momong,” ac “ku.” elos orekla ma moul;
Kom sang moul sasu nu fin fohk uh.
31 Lela wolana lun LEUM GOD in oan ma pahtpat!
Lela tuh LEUM GOD Elan engan ke ma El orala!
32 El ngetang nu ke faclu, na faclu rarrar;
El kahlye fineol uh, na fosryak.
33 Nga fah on nu sin LEUM GOD ke moul luk nufon;
Nga fah onkakin on in kaksak nu sin God luk ke lusenna moul luk.
34 Finsrak tuh on luk in mwe akinsewowoyal,
Mweyen engan luk tuku sel me.
35 Lela tuh mwet koluk in kunausyukla liki faclu.
Lela elos in wanginla nwe tok.
Kaksakin LEUM GOD, O ngunik!
Kaksakin LEUM GOD!