Leta Nu Sin Mwet
HEBREW
Tukakinyen Leta Nu Sin Mwet HEBREW
Leta se nu sin mwet Hebrew inge tuh simla nu sin sie un mwet Christian su yokyokelik alein nu selos, pwanang oasr sensen mu elos ac fuhleak lulalfongi lalos. Mwet se ma simusla leta se inge tuh srike in akkeyalos ke lulalfongi lalos, ke ma inge el fahkak lah Jesus Christ pa fahkak safla ke luman God, ac el mukena pa fahkulak pwaye. El akkalemye ma inge ke sripa yohk tolu: (1) Jesus el Wen nutin God nwe tok, su lotela akosten pwaye nu sin Papa ke mwe keok su el keok kac. Ke el pa Wen nutin God uh, el fulat liki mwet palu nukewa in Wuleang Matu, ac el fulat liki lipufan, ac oayapa Moses sifacna. (2) God El sifacna fahk mu Jesus el Mwet Tol Fulat se nwe tok, ac el fulat liki mwet tol nukewa in Wuleang Matu uh. (3) Ke sripen Jesus, sie mwet lulalfongi el ac moliyukla liki ma koluk ac sangeng ac misa. Oayapa ke sripen Jesus pa Mwet Tol Fulat, el pa ase molela pwaye. Ouiya nukewa ma mwet Hebrew elos oru in alu lalos oemeet me, ke elos kisakin kosro ac oru pac lumah saya, ma inge oana sie lemlem nu ke mwe kisa pwaye, su pa akpwayeyuk ke Jesus Christ.
Mwet sim se inge el akesmakinye mwet inge ke ouiyen lulalfongi lun mwet matu pwengpeng lalos, su ma srumunyuk ke sramsram matu lun mwet Israel (pa ke chapter 11), na el kwafe selos tuh elos in fahsr tukun mwe srikasrak wo lun mwet meet ah. Ke chapter 12, el kwafe pac selos tuh elos in oaru na nu ke safla. Elos in ngetang suiya Jesus, ac in muteng ke kutena mwe keok ac mwe kalya su ac fah sonolos. Ke saflaiyen leta se inge, oasr kas in kasru, oayapa kas in sensenkakin.
Takla Lun Koanon Leta Se Inge
Kas in ikasla: Christ pa fahkak na pwaye luman God 1:1–3
Christ el fulat liki lipufan 1:4—2:18
Christ el fulat lukel Moses ac Joshua 3:1—4:13
Christ el fulat liki mwet tol nukewa 4:14—7:28
Wuleang lun Christ wo liki wuleang meet ah 8:1—9:22
Mwe kisa lun Christ saok liki mwe kisa meet ah 9:23—10:39
Yohk sripen lulalfongi 11:1—12:29
Akinsewowoye God 13:1–19
Pre in kaliya 13:20–21
Kas safla 13:22–25
1
Kas Lun God Sin Wen Natul
1 In pacl meet ah, God El kaskas nu sin mwet matu lasr pacl na pus, ac in ouiya pus sin mwet palu, 2 a in len safla inge, El kaskas nu sesr sin Wen natul. God El orala kusrao ac faclu kacl, ac God El sulella tuh ma nukewa in ma lal ke safla uh 3 Wen el kalmeak kalem wolana lun God, ac lumahl oapana luman God, ac el sruokya faclu ac kusrao ke ku lun kas lal. Tukun el oakiya tari inkanek in nunak munas ke ma koluk lun mwet uh, el muta inkusrao ke lapo layot sin God, su Kulana.
Fulatlana Lun Wen Nutin God
4 Akfulatyeyuk Wen liki lipufan uh, oana ke ine se ma God El sang nu sel fulat liki inelos. 5 Tuh God El tiana fahk nu sin kutena lipufan,
“Kom Wen nutik;
Misenge nga Papa lac tomom.”
Oayapa God El tiana fahk ke kutena lipufan,
“Nga ac fah Papa tumal,
Ac el ac fah Wen nutik.”
6 A ke God El akola in supwama Wounse se natul nu faclu, El tuh fahk,
“Lipufan lun God nukewa enenu in alu nu sel.”
7 A God El fahk ke lipufan uh,
“God El orala lipufan lal in oana eng uh,
Ac mwet kulansap lal in oana firir in e uh.”
8 Tusruktu God El fahk ke Wen:
“Tokosrai lom, O God, ac fah oan nwe tok ma pahtpat!
Kom leum fin mwet lom ke nununku suwohs.
9 Kom lungse ma suwohs, ac srunga ma sesuwos.
Pa inge sripa se God, aok God lom, El tuh sulekomla
Ac sot nu sum insewowo ac sunak arulana yohk liki
Kutena mwet su wi kom.”
10 El oayapa fahk,
“Kom, Leum God, ke mutawauk kom orala faclu,
Ac ke poum sifacna, kom orala kusrao.
11 Ma inge ac fah wanginla, a kom ac mutana;
Ma inge nukewa ac kulawi oana nuknuk uh.
12 Kom ac fah lumwani oana sie nuknuk lik,
Ac elos ac fah ayaolla oana nuknuk uh.
A kom nuna oaya ah na,
Ac moul lom wangin saflaiya.”
13 God El tiana fahk nu sin kutena sin lipufan lal:
“Muta lapo layot sik
Nwe ke na nga filiya mwet lokoalok lom
In ma loangeyen niom.”
14 Na fin ouinge, mea orekma lun lipufan uh? Elos ngun su kulansupu God, ac El supwalosme elos in tuh kasrelos su ac eis molela.