37
1 Eng upa uh oru insiuk kihmkim arulana upa.
2 Kowos nukewa porongo pusren God,
Ac lohng pusren pulahl su tuku ke oalul me.
3 El supu sarom uh sasla in acn engyeng uh,
Liki tafun faclu nwe ke tafun yen ngia.
4 Na ngirngir lun pusracl lohngyukyak,
Pusra ku ac fulat lun pulahl uh
Ac sarom uh wi pacna fahsr.
5 Ke sap ku lun God, ma na usrnguk sikyak,
Ma na yohk su kut tia ku in kalem kac.
6 El sap snow uh in putati nu faclu,
Ac supu af na matol in kurrauk faclu.
7 El tulokinya orekma lun mwet uh;
El oru in kalem selos ma El ku in oru.
8 Kosro lemnak uh som nu in luf kialos.
9 Eng in paka tuku eir me,
Ac ohu na upa tuku epang me.
10 Momong lun God orala kof uh in kekela,
Ac ekulla kof uh nu ke ice matoltol.
11 Sarom uh ac sarmelik liki pukunyeng uh,
12 Ke ac mukuiyak oana ma lungse lun God.
Sarom uh ac oru ma nukewa ma God El sapkin uh,
In acn nukewa fin faclu.
13 God El supwama af in aksroksrokye faclu;
Sahp El supwama in kai mwet uh,
Ku in akkalemye insewowo lal.
14 “Job, mislawin ac porongo;
Srike nunku ke orekma usrnguk God El oru uh.
15 Ya kom etu lah God El sapsap fuka
Ac oru tuh sarom uh in sarmelik liki pukunyeng uh?
16 Ya kom etu lah pukunyeng uh sohksok fuka yen engyeng uh,
Su ma orek ke ku sakirik lun God?
17 Mo, kom ac arulana fol,
Ke pacl se eng fol lun acn eir uh tuhme.
18 Mea, kom ku in kasru God laknelik acn lucng
Ac oru tuh in ku oana sie osra ma tuktuki ac akfwelyeyukla?
19 Luti nu sesr ma kut in fahk nu sin God;
Kut lohsrla; wanginla ma kut ku in fahk.
20 Nga ac tia suk ngan kaskas nu sin God;
Mwe mea ngan sang pacl lal in kunausyula?
21 “Ac inge, kalem lucng me uh arulana saromrom;
Upala kalem kac uh, kut tia ku in ngetang nu kac;
Ac eng uh aknasnasyela yen engyeng uh.
22 Sie kalem na saromrom liyeyuk epang me,
Ac wolana lun God arulana aksangengyekutla.
23 Ku lun God uh arulana yokla — kut tia ku in kalukyang nu yorol;
El suwoswos ac pwayena ke ma El oru nu sin mwet uh.
24 Ke ouinge uh, ac tia sukok lah efu ku mwet uh sangeng sel,
Ac lah efu ku El tia lohang nu selos su sifacna oru mu elos lalmwetmet.”