36
1 Ac Elihu el sifilpa fahk:
2 “Sifilpa mongfisrasr kitin pacl ac lohng
Kas ma nga ac aolla God ac fahk.
3 Yohk ma nga kalem kac; nga ac orekmakin ma kalem sik uh
In akkalemye lah God, su oreyula, El suwosna.
4 Wangin kas kikiap ke ma nga ac fahk nu sum inge;
Kom liye sie mwet na lalmwetmet ye motom.
5 “Arulana yohk ku lun God! Wangin sie mwet El srunga;
Wangin kutena ma El tia kalem kac.
6 El tia lela mwet koluk uh in moul na,
Ac El oru ma suwohs nu sin mwet sukasrup in pacl nukewa.
7 El loangelos su suwosna moul la;
Ac lela tuh elos in leumi oana tokosra,
Ac oru in akfulatyeyuk elos nwe tok.
8 Tusruktu mwet uh fin kapiri ke sein,
Ac keok ke sripen ma koluk elos orala,
9 God El akkalemye nu selos ma koluk lalos ac inse fulat lalos.
10 El oru elos in lohng kas in sensenkakin lal nu selos
Tuh elos in forla liki orekma koluk.
11 Elos fin akos God ac kulansupal,
Na elos ac insewowokin moul lalos uh in misla ac wo ouiya.
12 A elos fin tia akos ac kulansupu God, na elos ac anwuki ke cutlass,
Ac misa in nikin lalos.
13 “Mwet su tia etu God uh elos ac mutana in kasrkusrak lalos,
Ac finne akkeokyeyuk elos, elos tia pre in suk kasru.
14 Elos ac srakna fusr na elos misa,
Eli ke sie moul lusrongten.
15 Tusruktu God El luti mwet uh ke mwe keok nu selos,
Ac ikasla mutalos ke mwe ongoiya.
16 “God El ke folokinkomme liki ongoiya,
Nu ke sie acn mwesas, yen wangin ma ikus kom;
Ac tepu lom uh sessesla ke mwe mongo yuyu.
17 Tusruktu, inge akkeokyeyuk kom oana ma fal in orek nu sum.
18 Taranna kom in tia lela molin eyeinse in kiapwekomla,
Ku mwe kasrup in aktafongyekomla.
19 Kom finne pang ke kuiyom nufon in suk kasru, ac fah wangin sripa;
Ku lom nufon tia ku in akwoye kom inge.
20 Nimet kom ke in tari fongeni,
In sun pacl ma mutunfacl lulap uh ac fah wanginla.
21 Karinganang kom in tia forla nu ke ma koluk;
Mwe keok lom inge ma tuku in tuh sruokkomi liki ma koluk.
22 “Esam lupan yokiyen ku lun God uh;
Su sie mwet luti oana El?
23 Wangin mwet ku in fahk nu sin God ma Elan oru,
Ku fahk mu koluk ma El oru uh.
24 Nuna kaksakinyuk El pacl nukewa ke ma El oru;
Enenu na kom in wi pac kaksakunul.
25 Mwet nukewa liye tari ma El orala;
Tusruktu kut ac tu na oe saya liye.
26 Kut tia ku in etu na pwaye lupan fulat lal uh,
Ku oakla pisen yac lal uh.
27 “God pa orauk kof uh liki faclu,
Ac ekulla nu ke tulin af uh.
28 El oru tuh kof uh in kahkla liki pukunyeng uh
Ac afi nu fin mwet nukewa.
29 Wangin mwet etu lah pukunyeng uh mukuikui fuka,
Ku lah fuka tuh pulahl uh ngirngir
In acn engyeng uh yen God El muta we.
30 El supu sarom nu in acn nukewa yen engyeng uh,
Tusruktu acn loal in meoa uh nuna lohsr na.
31 Pa inge luman kiteyen mwet uh sel,
Ac El sang mwe mongo puspis nun mwet uh.
32 El sang paol sruokya sarom uh,
Ac sap tuh in tungalya acn El ac fahk uh.
33 Pusren pulahl uh sulkakin lah paka se ac tuku,
Ac un cow uh etu lah ac pakala.