1 Kamnajich etatin vatz u Tioxh bꞌanel tiꞌ qꞌul etachaꞌv, qꞌul epaav. Loqꞌ u Jesuus aqꞌon etiichajil kꞌatza. 2 Tan taꞌxh nichebꞌaneꞌ vetiꞌanka. Aꞌ nichetiqꞌo tetz u paav tu u vatz amlika txꞌavaꞌ tzaꞌ. Aꞌ nichenima tetz u tioxhil maalo vaꞌl niqꞌesalin qꞌu maalola chaj aanxel nipaal tiꞌ kajiqꞌ vaꞌl atil kꞌatz qꞌu qelol Tioxh. 3 Aꞌ qꞌu kam atichkꞌoꞌ maꞌx tiempo tziꞌ. Taꞌxh tii nikubꞌaneꞌ kam kusaꞌ, qꞌu tachaꞌv u kuchiꞌl utz, qꞌu kam qꞌuꞌl nitul tu kupensaar. Ech nichikꞌuloꞌk qiꞌ aas sakuꞌ u choobꞌal paav qiꞌ tu u Tioxh. Echaꞌ tereꞌn qꞌu aanima yeꞌ tootzaj Tioxh.

4 Pek tiira txumul vatz u Tioxh tan, ibꞌan tii qiꞌ. 5 Aal vettaqꞌlu kutiichajil kꞌatz u Cristo tetz bꞌenqꞌii bꞌensaj, kꞌuxh aal kamnajichꞌoꞌ siatz tu qꞌu kupaav. Ech tibꞌaꞌnil koꞌn u Tioxh kꞌuxh vetchitpꞌex tu qꞌul epaav. 6 Ela vetqꞌaavtitzꞌpixsaꞌoꞌ u Tioxh tuchꞌ u Cristo. Ech ela texh tuchꞌ aꞌ kumol tu Amlika kꞌujleloꞌ u Cristo Jesuus tu u qatin kꞌatza. 7 Utz iꞌan koꞌnkoxh ok u kam tziꞌ, pek aꞌ isaꞌ ikꞌuchtu vitechalla bꞌaꞌnil tu qꞌu tiempo taabꞌaꞌbꞌen tzaꞌ aas nojchit tii qiꞌ. Itxum kuvatz tiqꞌaqꞌal u Cristo Jesuus. 8 Vibꞌaꞌnil u Tioxh setiꞌ atziꞌ kꞌuxh vetchitpꞌex tu qꞌul epaav tu vikujeꞌ ekꞌuꞌl tiꞌ. Utz yitꞌ ex koj vettxꞌakon, pek u Tioxh vetꞌoyan sete. 9 Yitꞌ iqꞌaqꞌal koj ebꞌanoneꞌ. Ech yeꞌxhabꞌil koꞌxh maꞌj satoksa jeꞌ iqꞌii tiꞌ. 10 Tan Tioxh bꞌanonnaj qetz. Tiꞌ u Cristo Jesuus ibꞌanvoꞌ. Utz aꞌ isaꞌ qiꞌ aas aꞌ sakubꞌan qꞌu kam bꞌaꞌn, kam echaꞌ bꞌanel tiꞌ taqꞌo koꞌxtene.

11-12 Atoj sekꞌuꞌl aas yeꞌkich ex kꞌatz u Cristo maꞌx tiempo. Tan yitꞌ ex koj Israeel, yitꞌ ex koj itenam u Tioxh bꞌanel. Ech tokeꞌ yeꞌk etokebꞌal tiꞌ u nukꞌuꞌm vaꞌl iꞌan u Tioxh tuchꞌ vitenam. Nikoꞌxh tiꞌ qꞌu kam tala sataqꞌeꞌ. Kam koj maꞌj bꞌaꞌnil nichechꞌia. Utz aꞌich koj etioxh u itzꞌlich Tioxh. Tan ex qꞌu aanima qꞌuꞌl “yitꞌ tzokꞌel koj el bꞌiil echiꞌl” nital qꞌu Israeel qꞌuꞌl tzokꞌel el bꞌiil ichiꞌl. Ech yitꞌ ex koj itenam Tioxh vatz qꞌu Israeel.

13 Pek kꞌuxh tzian atichkꞌex kꞌatz Tioxh tan, xaanyuꞌlex. Okyex kꞌatz u Cristo Jesuus tiꞌ vikajal vaꞌl el setiꞌ tiꞌ ichool qꞌul epaav.

14 Aꞌ vetꞌul oksan u paas u Cristo. Ech maꞌl tekoꞌn iatz qꞌu niman tetz taqꞌo, kꞌuxh Israeel utz, kꞌuxh yitꞌ iꞌ. Aꞌ ul isotzsa tu vikam vatz kurus u chiꞌkꞌulaibꞌ vaꞌl atiche vaꞌl nichjatxonoꞌ qibꞌilaj, echaꞌ tok maꞌj bꞌitzꞌ. 15 Aꞌ ul itzaasa qꞌu mantaar, qꞌu tzii qꞌuꞌl oknajich qiꞌ. Tan aꞌ vaꞌl nichoksan u xoꞌl. Utz maꞌl tekoꞌn tenam vetbꞌenku kaꞌ tanul qꞌu aanima taqꞌo qꞌuꞌl kꞌuxh jatxich tibꞌ iatz. Tan vetmotxinima u Jesuus, ech vetꞌok ibꞌaꞌn. 16 Ech tu vikam u Cristo vatz kurus, sotz u chꞌaꞌo u jatxiꞌbꞌ vaꞌl atich xoꞌl kaꞌ tanul qꞌu aanima. Vettoksa ibꞌaꞌn tuchꞌ Tioxh. Ech maꞌl tekoꞌn vetꞌelku siatz. 17 Bꞌaꞌnla yol tetz paas vettiqꞌo ul u Cristo tu qꞌu aanima qꞌuꞌl tzian kꞌatz Tioxh, echaꞌ ex utz, tuchꞌ tu qꞌuꞌl kꞌuxh tootzaj nal bꞌiil u Tioxh majte. 18 Tan tiqꞌaqꞌal koꞌn u Cristo kꞌuxh maꞌl texh qok vatz u Tioxh. Tan maꞌl koꞌn u Tioxhla Espiiritu atil sukukꞌatza.

19 Ech tokeꞌ kꞌuxh ex puera aanima tu vechiꞌl utz, tu vetatin tu u vatz amlika txꞌavaꞌ tzaꞌ, pek yitꞌ ex tereꞌn koj puera aanima vatz u Tioxh. Pek ela texh etenamil tuchꞌ qꞌu Israeel niman tetz u Jesuus. Ech tatineꞌ kꞌaol meꞌala aas molomal tibꞌ tu maꞌl atibꞌal. 20 Aatz vetatin cheel tan, ech ex maꞌl mam otzotz aas maꞌl koꞌn vixeꞌ. Utz aꞌ vixeꞌ qꞌu chusbꞌal tal qꞌul ichaj u Jesuus tuchꞌ qꞌu alon tetz u yolbꞌal Tioxh. Pek aꞌ u Sivan u Cristo, vitiil u otzotz tixoobꞌal. 21 Ech oj atoꞌkꞌex kꞌatz u Cristo, nechꞌii kꞌatza atziꞌ. Bꞌaꞌnla nukꞌimal etibꞌ setibꞌilaj. Utz saꞌnalbꞌenexs tioxhla atibꞌal vatz u kuBꞌaal Amlika. Echaꞌ maꞌl totztioxh aas bꞌoono inukꞌlu jeꞌ viꞌ itzꞌachil. 22 Utz kꞌuxh paarten aanimail ex tan, maꞌl koꞌn ex atilex kꞌatz u Cristo, nukꞌimal etibꞌ, ex tatibꞌal Tioxh siꞌaneꞌ. Saꞌatin sekꞌatza tu viTioxhla Espiiritu.