U Uꞌ ITZꞌIBꞌA BꞌEN U PABLOXEꞌ QꞌU NIMAN TETZ U JESUUSTU EEFESO
Yol tiꞌ u uꞌ tzaꞌ
U Pablo tzꞌibꞌan u uꞌ tzaꞌ. Aꞌ itzꞌibꞌav bꞌen xeꞌ qꞌu niman tetz u Jesuus tu Eefeso. Tu Roma itzꞌibꞌav kꞌasuꞌl tixoꞌl qꞌu yaꞌbꞌ 59 — 61 m.t.J. Aꞌ chit atich tu preexhuil.
Aꞌ vibꞌoꞌqꞌol nital u Pablo tu qꞌul iyol tzaꞌ aas maꞌloj chit iatz qꞌu niman tetz u Jesuus tibꞌilaj, kꞌuxh kam koꞌxh aanimail sijununil.
Yeꞌ ootzajibꞌe kaniꞌch tok qꞌu bꞌaxa chaj aa Eefeso tiꞌ inimal u Jesuus. Loqꞌ atil iyolil tu Qꞌu Bꞌaꞌnla Chaj Kam Bꞌanel (Hechos) 18.24—20.1. Kamal u Aquila tuchꞌ u Priscila chikon bꞌaxa. Ech xamtel tuul opon u Apolos. Utz ech tek u Pablo. Oxvaꞌl yaꞌbꞌ iꞌan u Pablo tziꞌ. Xamtel tek tuul itzaqꞌtaka qꞌu ansiano u Pablo aas aꞌ chit ibꞌen tu Jerusaleen. Choktaj Qꞌu Bꞌaꞌnla Chaj Kam Bꞌanel (Hechos) 20.17-38; Qꞌu Kam Ibꞌaxabꞌsa Ikꞌuchax U Tioxh (Apocalipsis) 2.1-11.
Aꞌ u jatxbꞌal tibꞌ qꞌu yol tu u uꞌ tzaꞌ.
1) 1.1-2 Nitaqꞌ ichajlichil qꞌu niman tetz u Jesuus.
2) 1.3—3.21 Niyolon tiꞌ u mam bꞌaꞌnil vaꞌl ul iꞌan u Jesuus tiꞌ vichitpuneꞌ.
3) 4.1—6.20 Nichusun tiꞌ aas kaniꞌch tiqꞌol u atinchil kꞌatz u Jesuus. Niyolon tiꞌ qꞌu doon majte. Ayaꞌ qꞌuꞌl nitaqꞌ u Tioxh tiꞌ taqꞌax iyakꞌil qꞌu niman tetz u Jesuus.
4) 6.21-24 Ech vitzojpu qꞌu yol tu u uꞌ tzaꞌ.
1
U Uꞌ ITZꞌIBꞌA BꞌEN U PABLOXEꞌ QꞌU NIMAN TETZ U JESUUSTU EEFESO
Ichajlichil qꞌu niman tetz u Jesuus tu Eefeso
1 Nuntzꞌibꞌa opon u uꞌ tzexeꞌ tzaꞌ hermanos jankꞌal ex nimamal u Cristo setaqꞌo atilex tu Eefeso utz, tii etatin kꞌatz u Jesucristo. In Pablo, ichaj u Jesucristo titxumbꞌal u Tioxh. 2 Utz taqꞌ koj kuꞌ vibꞌaꞌnil u Tioxh setiꞌ, ayaꞌ u kuTat tu Amlika, tuchꞌ u kuBꞌaal Jesucristo. Utz taqꞌ koj u paas tetaanima majte.
Viqꞌaqꞌal vinimal u Jesuus
3 Techal chit u Tioxh, viTat u kuBꞌaal Jesucristo tan, kajay mamaj bꞌaꞌnil vettaqꞌ qe tu Amlika tibꞌaꞌnil u Cristo tu u qatin kꞌatz u Tioxh.
4 Tan tiqꞌaqꞌal koꞌn kꞌuxh ayaꞌxchen itxaatꞌoꞌ u Tioxh aas yeꞌsajich ichee u vatz amlika txꞌavaꞌ. Aꞌ isaꞌ sakunima, saxaaneꞌloꞌ kꞌatz paav. Ech yeꞌk kupaav tu u qatin siatz.
5 Tiira tu taanima cheeka aas taqꞌbꞌenoꞌ sikꞌaol imeꞌal tiꞌ u kunimat u Jesucristo. Tan ech nal chit u bꞌaꞌnil nititzꞌa qiꞌ. Te elka aas iꞌan tii qiꞌ.* Aꞌ tok u yol tziꞌ, taqꞌax bꞌen kꞌaol meꞌala maꞌl tal nitxaꞌ aas yitꞌ kꞌaol meꞌala koj. Aꞌ vaꞌl niꞌan qꞌu nan qꞌuꞌl yitꞌix chee titzꞌin. Nijaj maꞌj tal titzꞌin utz, taꞌn tek nibꞌens tetz. Nibꞌen ibꞌii tiꞌ utz, tiira titzꞌin tekuꞌen, kꞌuxh yitꞌ titzꞌin koj tiꞌ vikajal. Ech vaꞌl niꞌan u Tioxh tu qꞌu niman tetz taꞌn tek nibꞌen ikꞌaol imeꞌal tiqꞌaqꞌal vaꞌl iꞌan u Jesuus. Choktaj Qꞌu Niman Tetz U Jesuus Tu Galaacia 4.5; Qꞌu Niman Tetz U Jesuus Tu Roma 8.14-17.
6 Echixeꞌat bꞌenamen niqoksa iqꞌii u Tioxh tiꞌ u techalla bꞌaꞌnil vetiꞌan qe tiqꞌaqꞌal viTxaaom vaꞌl tiira tii tiꞌ.
7 Kꞌuxh vetikuy qꞌu kupaav tan, tiꞌ atziꞌ aas tiira sibꞌ vibꞌaꞌnil qiꞌ. Utz vetitooꞌoꞌ tu vikajal vaꞌl el qiꞌ.
8 Utz niꞌxhikꞌuch u Tioxh aas nojchit tii qiꞌ tan, kajay txumbꞌal utz, kajay ootzajibꞌal vettaqꞌ qe.
9 Vetqootzajil vitxumbꞌal tiꞌ u tulebꞌal u Cristo vaꞌl yeꞌich ootzajibꞌe taqꞌo. Tan aꞌ u bꞌaꞌnil itzꞌamal qiꞌ taqꞌo.
10 Utz saꞌnalitzojpi u Tioxh kajay qꞌu kam kꞌajel nal tiꞌ taqꞌo aas loꞌopon vitiempoil. Tan saꞌnaliꞌan maꞌl iatz kajay qꞌu kam taqꞌo, qꞌuꞌl atil vatz txꞌavaꞌ tuchꞌ qꞌuꞌl atil tu Amlika. Utz u Cristo saqꞌesalain kajayil.
11 Kꞌajel nal qiꞌ taqꞌo aas saetzanoꞌ tiꞌ u bꞌaꞌnil kꞌatza utz, saetzanoꞌ tiꞌ tereꞌn qꞌu kam tzixeꞌ taabꞌaꞌbꞌen tiꞌ inimal u Jesuus. Aꞌ vaꞌl itzꞌamal tu u Tioxh, u bꞌanol tetz qꞌu kam kajayil.
12 Ech abꞌiste oꞌ, oꞌ bꞌaxa okchil kꞌatz u Cristo, saꞌxhkutꞌanbꞌaꞌ u Tioxh tu vitechalil.
13 Tan aatz etabꞌi vinujul, ayaꞌ u bꞌaꞌnla chusbꞌal tetz chitpichil tu paav utz, enima u Cristo; okꞌex kꞌatza. Yakich okoj maꞌl vetechlal tetaanima, ayaꞌ u Tioxhla Espiiritu vaꞌl tal u Tioxh aas sauli. Techlal aas ex tek ikꞌaol imeꞌal Tioxh.
14 Techlal majte aas saꞌnaltaqꞌ tereꞌn qꞌu kam u Tioxh qe qꞌuꞌl alel taqꞌo sataqꞌeꞌ. Loqꞌ analen aas latiqꞌo tibꞌ u kubꞌen tu bꞌenqꞌii bꞌensaj tzixeꞌ. Ech saꞌxhtꞌanbꞌaꞌl u Tioxh tu vitechalil.
Vijajtu u Pablo tu u Tioxh aas saꞌaqꞌax itxumbꞌal qꞌu niman tetz u Jesuus
15-16 Echixeꞌat bꞌenamen nunkꞌama Tioxh setiꞌ. Nunnachpixsaꞌex tunqꞌilat unsikꞌlet Tioxh chajpaj. Tan nivabꞌi aas tiira kꞌujlel ekꞌuꞌl tiꞌ u kuBꞌaal Jesuus. Utz tiira tiiꞌex setibꞌilaj majte ex niman tetz u Jesuus.
17 Nunqꞌila sikꞌle u Tioxh, ayaꞌ u techalla iTat u kuBꞌaal Jesucristo. Nunjaj te aas saꞌxhtaqꞌ etxumbꞌal tiꞌ qꞌu kam kꞌatza. Sikꞌuch tereꞌn kam sete. Ech saꞌxhtereꞌnetootzaji kam bꞌanel tu u Tioxh.
18 Nunjaj te majte aas tiira sataqꞌ eluꞌl vatzsaj sete kam chit vaꞌl nikuchꞌia tiꞌ tuchꞌ txuqꞌtxunchil. Setootzaji jankꞌal chit vitechalil qꞌu mam bꞌaꞌnil saetzanoꞌ tiꞌ kꞌatza, oꞌ niman tetz. 19 Utz setootzaji majte jankꞌal chit u lochbꞌal qetz nitaqꞌ u Tioxh oꞌ niman tetz. Tan tiira techal utz, keꞌch koj iyaꞌebꞌal. 20 Ikꞌuchka vimam txumbꞌal aas qꞌaav titzꞌpixsat u Jesuus xoꞌl qꞌu kamnaj. Utz ikꞌuchka majte aas toksa u Cristo sikꞌatza tisebꞌal tu Amlika. 21 Ech toksa mam qꞌesala viꞌ kajay qꞌu kam: qꞌu yakꞌil, qꞌu ijleꞌm, qꞌu qꞌesalail utz, qꞌu bꞌaalil. Kajay qꞌu kam toksa tikuenta. Kꞌuxh qꞌuꞌl atil tu u tiempo cheel utz, kꞌuxh qꞌu kam qꞌuꞌl sachee taabꞌaꞌbꞌen. 22 Kajay qꞌu kam toksaka u Tioxh jaqꞌ u tijleꞌm u Cristo. Utz toksa qꞌesala viꞌ qꞌu niman tetz kajayil. 23 Tan aatz qꞌu niman tetz echaꞌ vichiꞌl u Jesuus, aꞌ vinimal. Aꞌ vitzꞌajel u Cristo qꞌu niman tetz. Kꞌuxh aꞌ vitzꞌajel utz, u Cristo vaꞌl nitzꞌajsan. Aꞌ nitzojpixsan qꞌu kam tiꞌ kajayil. Tan aꞌ u qꞌesala tiꞌ qꞌu kam kajayil.
*1:5 Aꞌ tok u yol tziꞌ, taqꞌax bꞌen kꞌaol meꞌala maꞌl tal nitxaꞌ aas yitꞌ kꞌaol meꞌala koj. Aꞌ vaꞌl niꞌan qꞌu nan qꞌuꞌl yitꞌix chee titzꞌin. Nijaj maꞌj tal titzꞌin utz, taꞌn tek nibꞌens tetz. Nibꞌen ibꞌii tiꞌ utz, tiira titzꞌin tekuꞌen, kꞌuxh yitꞌ titzꞌin koj tiꞌ vikajal. Ech vaꞌl niꞌan u Tioxh tu qꞌu niman tetz taꞌn tek nibꞌen ikꞌaol imeꞌal tiqꞌaqꞌal vaꞌl iꞌan u Jesuus. Choktaj Qꞌu Niman Tetz U Jesuus Tu Galaacia 4.5; Qꞌu Niman Tetz U Jesuus Tu Roma 8.14-17.