124
God Take Kea His Peopo
Song fo sing wen you go up to da Temple Fo God, one David kine song
1 Eh, you Israel peopo! Tell me
Wat you tink wen happen—
But dis neva happen—
If Da One In Charge neva stay
Oua side befo time, aah?!
2 Dey tell,
“Eh, If Da One In Charge
Neva stay oua side,
Dat time odda peopo wen attack us,
3 An come real mad wit us,
Den, jalike dey wen eat us alive.
But dat neva happen.
4 Jalike if da big watta
Wen carry us guys away,
An jalike if da flash flood
Wen get rid a us,
5 Jalike if da flood knock us guys down
An wipe us out.
But dat neva happen.”
6 Az why us guys like tell
Da One In Charge,
“You, you wen do
Good tings fo us guys,
Cuz you neva let dem guys kill us.
Jalike dey wild animals
Dat like bite us an kill us!”
7 Us guys stay alive still yet,
Jalike one bird dat get outa one trap!
Jalike da bird catcha guys
Put up da trap,
But now, da trap broke
An we outa dea!
8 Da One In Charge, us know
Wat kine god him, an he help us.
He da One wen make
da sky an da world!