123
Give Chance!
Song fo sing wen you go up to da Temple Fo God
1 I look up fo pray to you.
You, da King. Yoa throne
Stay inside da sky.
2 All us guys make ready fo do
Wateva oua God,
Dass Da One In Charge a us,
Like us fo do,
An us stay waiting fo him do
Good tings fo us.
We stay ready, jalike da slave guys
Wait fo see wat dea boss like um fo do,
An jalike da slave wahines stay ready
Fo find out wat da wahine dey work fo
Like dem fo do.
3 Eh! You Da One In Charge!
Do good tings fo us!
Do good tings,
Cuz us guys wen had it awready
From da peopo dat make
Jalike us guys notting!
4 Us stay had it awready,
Cuz da peopo dat ack high makamaka
An no mo notting fo do,
Talk stink bout us an laugh.
An da proud peopo dat put
Plenny presha on us,
Dey stay make jalike us guys notting.