12
Da One In Charge
Get Us Guys Outa Trouble!
Get Us Guys Outa Trouble!
One David kine Song Fo God. Fo da main music guy sing um wit da eight-string harp.
1 Eh! You Da One In Charge! Try help me!
Cuz no mo nobody I can trus.
I no can find nobody dat stay tight wit me!
2 Da peopo talk real nice kine
Fo bulai peopo,
Dey tell one ting,
But dey no mean dat.
3 I like fo Da One In Charge
Wipe out all da peopo
Dat talk real nice kine
Fo bulai peopo.
An da peopo dat talk big.
4 Dey tell, “Cuz us guys talk wit plenny powa,
Dass how we goin win!
Cuz we talk nice kine,
No mo nobody can tell us guys wat fo do!”
5 But Da One In Charge, dis wat he tell:
“Get peopo dat like wipe out
Da peopo dat no mo notting
An need plenny stuff.
An get peopo dat need somebody
Fo take kea dem, an dey moaning.
Cuz a dat, I goin do someting!
I goin do wateva I gotta do
Fo get dem outa trouble,
Cuz fo shua, dass wat dey like me fo do!”
6 An you know, wen Da One In Charge make one promise,
Eryting he tell, stay right on,
Jalike da kine silva dey melt seven time
Fo take out all da junks.
7 Eh! You Da One In Charge! You goin take kea da peopo dat no mo notting,
So dat da bad peopo dat get nowdays no can hurt um, eva.
8 Cuz you know, weneva da peopo make tantaran,
An ack jalike all da pilau kine stuff good fo do,
Den da no good kine guys
No shame go all ova da place.