11
I Stay Trus Da One In Charge
One David kine song fo da main music guy
1 I stay trus Da One In Charge fo no let me get hurt.
So, wassamatta you guys stay tell,
“Run away from yoa house to da mountains,
Jalike you one bird dat fly!
2 Cuz you know wat? Da bad guys, dey make ready dea bow fo shoot,
Dey put dea arrow on top da bow string
An hide in one dark place fo shoot
Whoeva get one good heart fo do da right ting.
3 An us guys dat like do da right ting,
We no can do notting,
Cuz da law come poho awready!
Jalike da bad guys wen bus up
Da foundation undaneat oua house!”
Dass how you guys talk.
4 But Da One In Charge, he stay inside da Temple dat stay spesho fo him.
From da sky, Da One In Charge stay in charge a eryting.
He watch wat erybody do.
He check out all da peopo on top da earth.
5 Da One In Charge, he look good on da peopo dat do wass right,
An on da peopo dat do real bad kine stuff too.
Deep inside, he hate da peopo
Dat like bus up odda peopo.
6 He goin make fire fall down
On top dose bad kine peopo, jalike was rain.
He goin punish dem wit burning sulfur an hot wind.
7 Cuz Da One In Charge, he erytime do wass right,
An he get love an aloha fo da peopo dat do wass right.
Dass why da peopo dat stay do da right ting,
Dey goin get da right fo live wit him.