1 Wen da peopo come togedda fo Da One In Charge, nobody can come wit dem if dea olos stay hurt cuz somebody wen smash o cut um.

2 An whoeva born wen da faddah an muddah no stay marry, dea kids an grankids no can come one a da peopo a Da One In Charge, fo ten generation.

3  ✡ 23:3: Neh 13:1-2Nobody from Ammon o Moab o dea kids an grankids can come one a da peopo a Da One In Charge, even if dey wait ten generation. 4  ✡ 23:4: Census 22:1-6Cuz wen you guys stay come outa Egypt, da Ammon peopo neva come out fo meet you guys wit bread an watta. An da Moab guys wen pay Baalam, Beor boy from Petor inside Aram-Naharaim fo put kahuna on top you guys. 5  ✡ 23:5: Census 23:7–24:9But yoa God, Da One In Charge, get love an aloha fo you guys. Az why he no lissen Balaam. He take da bad ting Balaam like do an make um come good fo you guys.

6 No make one deal fo come frenz wit da Ammon o da Moab peopo fo do good tings fo dem, eva!

7 No make to da Edom peopo jalike dey pilau, cuz dey da Esau ohana, yoa braddahs. An same ting fo da Egypt peopo, cuz dey let you guys live in dea country no matta you no was from dea. 8 Da Edom an da Egypt peopo grankids can come togedda wit da peopo a Da One In Charge.

9 Wen you guys make camp fo go fight da peopo dat stay agains you, no go nea notting pilau. 10 If one guy no can go in front Da One In Charge cuz nite time someting come outa his body, he gotta go outside da camp an stay dea all day. 11 Wen da sun almos go down, he gotta wash in watta. Den wen da sun go down, he can go back inside da camp.

12 Make one place outside da camp an put sign fo one place wea you guys can go fo make shishi an doodoo. 13 Take someting fo you dig one puka, an wen you pau make doodoo inside da puka, cova um up afta wit dirt. 14 Cuz yoa God, Da One In Charge, stay walk aroun inside yoa camp fo take kea you guys, fo you guys win agains da peopo dat stay agains you. Yoa camp gotta stay spesho fo Da One In Charge. If he see you do shame kine stuff ova dea, he goin tell “Laytas” to you guys.

15 If one slave guy run away from anodda country an come by you, no give him back to his owna. 16 Let him live wit you guys inside wateva place he like inside one a yoa towns he like. No give him hard time.

17  ✡ 23:17: Pries 19:29Da guys an wahines from da Israel peopo no can fool aroun fo pay inside da temple fo one idol kine god, jalike da Canaan peopo do. Dey tink az goin make plenny stuff grow on top da land an make da animals get plenny bebe. 18 Da pay dat one guy o wahine get wen dey fool aroun fo pay inside one Canaan kine temple, az pilau. You guys betta not bring dat money inside da house a yoa God, Da One In Charge, fo pay fo one strong promise you make to him. Cuz all dat stay pilau, da way yoa God, Da One In Charge, see um.

19  ✡ 23:19: Outa 22:25; Pries 25:36-37; Rules2 15:7-11No make yoa braddah pay interes wen you let him borrow silva o food, o wateva odda ting peopo pay interes fo. 20 You can make peopo from anodda country pay interes, but not one braddah from Israel. Cuz you like yoa God, Da One In Charge, do good stuff fo you guys, wateva you do, inside da land he stay give you guys fo take ova.

21  ✡ 23:21: Census 30:1-16; Matt 5:33If you make one strong promise to yoa God, Da One In Charge, no be slow fo do um, cuz he goin make shua you do um. An if you no do um, you goin get da blame fo do one bad ting. 22 But if you neva make one promise, you no goin get da blame. 23 Wateva you tell, you gotta make shua fo do um, cuz you da one wen make one strong promise to yoa God, Da One In Charge, an nobody wen put presha fo you do dat.

24 If you go inside da grape farm dat anodda guy own, you can eat all da grapes you like, but you no can put um inside yoa basket. 25 If you go inside da field dat get wheat o barley dat anodda guy own, you can pick litto bit wheat o barley wit yoa hands, but you no can use one sickle fo harves da wheat o barley.