1-2 Ŋayi * 23:1–2 JoshuaDjatjuwanydja wirrkina djawuḻpa'yina worruŋuyinana, bala ŋayi gawaw'yurruna ga buku‐ḻuŋ'maraŋala ŋurru'‐ŋurruŋunhana ga ŋaḻapaḻmirrinhana ga bukmaknhana yolŋu'‐yulŋunha, bala yana ŋayi waŋana bitjarrana, “Worruŋuna ŋarra dhuwala, galki ŋarra yurru rakunydhirrina. 3 Liŋgu muka nhumapinydja marŋgina dhuwala, ga nhäŋalana nhuma liŋguna nhaltjarra ŋayi Garrayyu ŋilimurrunha guŋga'yurruna marrtjina, ga gäŋala marrtjina lili ḻatju'kuŋala dhika. Ŋayi gukuŋala ŋunha miriŋunha dhipuŋuru wäŋaŋuru, märr ŋilimurru yukurra yurru nhina dhiyala ŋamathamana, liŋgu ŋilimurruŋgunydja Garray God dhuwala warray ŋilimurruŋgala gali'ŋura. 4 Guyaŋiya walala ŋunhinydja, ŋunhi ŋarra guḻk‐guḻkthurruna dhuwala wäŋa malanha ganaŋ'maraŋala, ga weka'‐wikaŋala nhumalaŋgalana goŋlili, waṉa‐nherrara dhiyaku bäpurru'wu ga bäpurru'wu ga bäpurru'wu. Dhika bala wiripuŋuminydja wäŋaŋura malanyŋumi miriŋunydja marrtji nhina'‐nhina mukthun yana märr‐ḻurrku'‐ḻurrkun, 5 yurru waṉḏirri warray walala yurru yulŋunydja, ŋunhi nhuma yurru ŋupandja gukumanydja walalanha, dhawaṯmaramanydja yurru ŋuliŋuru nhumalaŋgala wäŋaŋurunydja malaŋuŋuru, liŋgu Garraynydja dhuwala nhumalaŋgala gali'ŋura. Dhuwalanydja wäŋa yukurra yurru djingaryun nhumalaŋguwaynha yana, bitjan liŋgu yana bitjarra ŋayipi Garrayyu dhäwu'‐nherrara nhumalaŋgu.

6 “Nhiniyanydja walala wuṉḏaŋarryiya, ga biyaka liŋgu malthurranydja nhanŋuway dhärukkunydja Godku. Djämanydja dhuḏakthurranydja biyaka yana liŋgu ŋunhi yukurra makarr dhäruk waŋa dhiyalami djorra'ŋura, ŋunhi ŋayipi † MosesMawtjitjthu wukirri. Yaka ŋanydjaḻa'yurra ŋuliŋuruyi dhärukŋuru ga romŋuru, 7 ga yaka ḻunduthiya ŋuruku wiripuŋuwunydja yolŋu'‐yulŋuwu, ŋunhi walala yukurra ŋuyulkthirri Godku ŋuli. Ŋunhiyinydja yätjmirrina yolŋu walala, ga walalaŋgu waŋarrnydja malanha yakana yuwalkŋu wal'ŋu. Yaka märr‐ŋal'yurra walalaŋgalaŋuwu waŋarrwu. 8 Ŋayathaŋa baṯ biyakanydja ŋanyapinyay Garraynha, ga dhambay‐manapanmiya waŋganygala yana waŋarrwala yuwalkŋuwala wal'ŋu yana. 9 Liŋguna ŋayi Garrayyunydja gukuŋalana waṉḏinyamaraŋalana yanana ŋunhinydja ḏälmirrinhanydja gal'ŋu miṯtjinha, walala gundupuŋalana nhumalaŋgalanydja bena‐wala, yakana yukurrana waŋgany dhärrana nhumalaŋgu gulmaranharawu; nhumanydja yana djuḻkmaraŋalana‐wala walalanha warrpam'thurrunana. 10 Waŋganydhunydja nhuma yurru gukuma waṉḏinyamaramana‐wala ŋula nhämunha'nhana miṯtjinha; mirithirrina guḻku'na yurru waṉḏirrinydja‐wala nhokala dhärukthu, liŋgu ŋayipinydja Garraynydja nhokala warray gali'ŋura, ga dhawu'‐nherraranydja ŋayi nhumalanha, ŋunhi ŋayipina yurru dhawar'maramanydja buma walalanha warrpam'thundja nhumalaŋgu.

11 “Biyaka gurrum'thurra yulŋunydja nhäŋa, märr yurru nhe märr‐ŋamathirrinydja wirrki gal'ŋu yana märryu‐ḏapmarama Garraynhanydja nhumalaŋguway Godnhanydja. 12 Ŋunhi nhuma yurru ŋanydjaḻa'yundja ga ŋapanydja‐wekanharamirri dhiyakunydja Godku, ga mam'thun yurru dhambay‐manapanmirri ŋurikalanydja walalaŋgala ŋunhi walala yaka marŋgi Godku, ga märrama yukurra yurru dhäykanha ŋuliŋuruyi miṯtjiŋuru, 13 bala ŋayi yurru Godthunydja yakana nhumalanha biyapul guŋga'yun ŋunhimalayi, yakana ŋayi yurru miriŋunhanydja nhumalaŋgu gukuma. Walalanydja yurru miriŋuyunydja ŋuriŋiyi nhumalanha gaṯmaramana walalaŋgalay yätjthuna dhikana yana romdhu, bala nhumalanha yurru ŋayaŋu‐yätjkumana dhika nhäyuna romdhu, yana liŋgu ga warrpam'thun nhumalanha yurru baḏuwaḏuyun, ga yakana nhuma yurru ŋula waŋgany yolŋu yukurra nhinanydja dhiyalayi ŋamakurru'ŋuranydja wäŋaŋura, ŋunhi ŋayi Godthu nhumalaŋgu wekaŋala.

14 “Yo, galkina dhuwala walunydja, ŋarra yurru rakunydhirrina. Nhumanydja ŋunhi marŋgi muka ŋunhi ŋayi Godthu gäŋala ŋilimurrunha ḻatju'kuŋala dhika wal'ŋu, goŋ‐nherraṉmina ŋayi ŋilimurruŋgu, ga wekaŋalanydja ŋayi marrtjina ḻatju' malanha dhika wal'ŋu yana ŋamakurru'mirri. Yo, ŋäthilinydja wal'ŋu ŋunhinydja Godthu dhawu'‐nherrara nhä malanha ḻatju'mirri dhika yana, ga liŋguna ŋunhi djämawuynha nhanukuŋu yulŋunydja warrpam'nha, yakana ŋayi ŋula meṉguŋalanydja waŋgany. 15 Ga bitjarrayi liŋgu ŋayi Godthu raypirri'yurrunanydja waŋana dhäruk ŋilimurruŋgu. Ŋuli nhuma yurru yakanydja ŋayathama yukurra ŋunhi raypirri'yunara dhäruk, yana bilyun yurru ŋanydjaḻa'yundja wiripuŋulilinydja ŋula waŋarrwu buku‐ŋal'yunarawu, ŋayinydja yurru marina marrtji bathalana nhumalaŋgu, bitjanna yana liŋgu yurru bitjarra ŋayi waŋana raypirri'yurruna ŋäthili gal'ŋu. 16 Yo, ŋuli nhe yurru dham'thunmaranharamirri yakanydja nhanukala Godkalanydja, yana nhe yurru märr‐ŋal'yun yukurra waŋarrwu wiripuŋuwunydja, ŋula nhäkunydja maḏayin'kunydja romgu malaŋuwu, ŋayinydja yurru Godtja ŋaramurryirrina nhumalaŋgu wirrkina yana. Yakana yana nhuma yurru nhina yukurra weyin dhiyalanydja ŋamakurru'ŋuranydja wäŋaŋura ŋunhi ŋayi Godthu wekaŋala nhumalaŋgu.”