1 Ga ŋuliŋurunydja dhurrwaraŋuru Garray waŋana * JoshuaDjatjuwawala bitjarra, 2 “Nhuma ganaŋ'maraŋa yurru wäŋa malanha dhiyali bäyma ga ŋunhili bala, ga wäŋanydja ŋunhiyi malanha marrtji yurru djinga'‐djingaryun gäna wal'ŋu, ganaŋ'maranhara ŋurrwu yolŋuwu walalaŋgu. 3-4 Ŋuli yurru ŋula yolŋu burakirri ga rakunydhirri yurru ŋula yolkuŋu djämawuy, yurru yaka mel‐yunupawuynydja, ga ŋunhiyi baṉdja‐moṉuŋunydja yolŋu yurru waṉḏirri ŋunhimalayi wäŋalili, märr ŋayi yurru ŋunhalayi nhina yukurra ŋurrwu'ŋura walŋana. Yakana yurru ŋula yolthu ŋanya balwak‐ruŋiyinmarama, ga buku‐ruŋinyamaramanydja buma ŋunhili wäŋaŋura. Yo, ŋunhi ŋayi yurru bunanydja ŋunhiliyi, ŋunhiyi yolŋu ŋunhi ŋayi yaka mel‐yunupa bumara yolŋunha, ŋayi yurru ḻakarama ŋathili ŋaḻapaḻmirriwu nhaltjarra ŋayi ŋunhi, bala walalanydja yurru dhurrwarana nhanŋu ḻapmarama, bala ŋilitjanna ŋanya, ŋayinydja yurru ŋunhiyinydja yolŋu gärrina, bala nhinana walalaŋgala ŋunhili walŋana.

5 “Ga ŋunhi yurru ŋula yol yolŋu marrtji ga bitjan waŋa, ‘Go wekaŋa ŋarrakala dhuwali ḏarramunha ya', ŋanapurru ŋanya bumana rakunygumana, bili ŋayi yawungu ŋanapurruŋgu gurruṯu'mirrinha buma,’ bitjan yurru, bala walalanydja yurru yakana ŋanya gathan nhanukala ŋurikala yolŋuwala marimirriwalanydja, bili yaka ŋunhi mel‐yunupawuy nhanukuŋunydja, yaka ŋayi ŋunhi bumara ŋaramurryinyarayunydja ŋurruyu. Bala ŋayi yolŋunydja ŋunhiyi yurru nhina yukurra ŋunhiliyina walŋana yana, ŋamathamana, 6 ga yana liŋgu ga ŋuriki dhä‐wirrka'yunarawuna waluwu. Nhinanydja ŋayi yukurra yurru ŋunhilinydja wäŋaŋura weyinnha, yurruna ŋayi yurru roŋiyirri balayi nhanukiyingala wäŋalili.” Bitjarra ŋayi Garrayyu ḻakaraŋalanydja Djatjuwawala.