1 Yo, bitjarra ŋayi Garray waŋananydja, “Marinydja yurru marrtji biyapul'nha wal'ŋu bathalana ŋurikinydja walalaŋgu ŋaḻapaḻmirriwu yolŋu'‐yulŋuwu ŋunhi walala yukurra ŋapa‐nherraṉmirri ŋarraku; walala yukurra malthun romgunydja ŋurikina ŋunhi yakana ŋarrakuŋu rom ŋunhi nherraṉara, yakana walala ḏukṯuk ŋarrakalaŋuwunydja romgu, yana walala yukurra ḏukṯukthirrinydja waŋgany‐manapanminyarawunydja wiripuŋwuna miṯtjiwu bäpurru'wu, ga ŋunhiyinydja bitjan walala yukurra bukulili ŋal'‐ŋalmaramana bala yätjnhana romnha. 2 Yakana walala waŋana ŋarranha dhä‐wirrka'yurruna bitjarranydja, ‘Garray, yolthu yurru ŋanapurrunha guŋga'yundja?’ bitjarranydja. Dhunupana yana walala marrtjinanydja * EgyptYetjiplilina, bala waŋana bitjarrana, ‘Way, guŋga'yurra ŋanapurrunha.’ Walalanydja märr‐nherraṉmirri yukurra ŋunha Yetjippuyŋuwalana buŋgawawala, guyaŋirri yukurra yanapi ŋayina yurru guŋga'yun gunganhamirriyama walalanhanydja. 3 Yurru bäyŋu warray. Ganydjarrmiriwnha ŋunha ŋayinydja; yakana ŋayi yurru guŋga'yun ga walŋakuma walalanha, yana walala yurru gorana yulŋunydja. 4-5 Liŋguna wiripu‐guḻkuny'tja nhumalaŋgu dhäwu'mirri marrtjinana Yetjiplilina, ŋäŋ'thun yurru guŋga'yunarawuna, yurru ŋuriŋiyi yolŋu'‐yulŋuyu Yetjippuyŋuyunydja yurru bäyŋuna nhumalanha guŋga'yundja; yakana walala yurru walŋakuma nhumalanha, yana nhuma yurru gorana, ga wiripuŋuyunydja yolŋu'‐yulŋuyu nhumalanha yurru warku'yunna. 6-7 Yo, walala ŋal'‐ŋalmaranhamina marrtjina walalaŋgalay yarraman'lilina malanyŋulili, wapmaraŋalanydja marrtjina ḻatju'mirri dhika mel‐wiḏi'mirri girriny'tja. Marrtjinanydja walala yukurrana be maḏakarritjkurru yana wäŋakurrunydja, ŋuliwitjarrana yana ŋunhi wakinŋu wäyin ga bäpi malanha ŋunhilimiyi wäŋaŋura, ga wekamanydja walala yurru ŋunhiyi malanha mundhurrnydja Yetjippuyŋuwuna ŋuriki buŋgawawu. Yurru Yetjiptja ganydjarrmiriw warray, nhäŋiniŋ'mirri warray.” Ga bitjarra ŋayi Garray waŋananydja.

8 Godthu ḻakaraŋala ŋarraku, ŋarra yurru dhuwalayi dhäruktja wukirri djorra'lilina, märr yurru bukmaknha yolŋu walala marŋgithirrinydja ŋunhi walalanydja mirithirrina gal'ŋu yätjmirri yolŋu'‐yulŋu. 9 Bitjanna liŋguna walala yukurra ŋapa‐wekamanydja Garraywu, ga bitjandhi liŋgu waŋa yukurra ḻakarama bothirrinydja. Ŋayinydja bini ŋunhi walalanha marŋgikunha muka ŋamathanha wal'ŋu, yurru yaka warray walalanydja mäkiri'‐witjurruna nhanŋu, yaka walala ḏukṯukthina ŋänharawu Godkalaŋunydja dhärukku. 10 Walala waŋa yukurra mukmarama Godku djawarrkmirrinha walalanha bitjan, “Way mukthurra, yaka ŋanapurrunha yukirriya ŋoy‐wulaŋa ga yätj‐ḻakaraŋa, yaka ḻakaraŋa ŋanapurrunhanydja nhä ŋamakurru' ga yätj. Biyaka ŋamathaŋa dhäruk waŋiya gurrum' wal'ŋu yana, märr ŋanapurrunydja yurru mäkiri'‐witjun muka nhumalaŋgu. 11 Gatjuy yarrkthurrana biyakana, yakana gulmaraŋa ŋanapurrunha. Ŋanapurrunydja yakana ḏukṯuk ŋanapurru yurru ŋäma ŋunhiyi be nhä ḏarrtjalknhanydja wal'ŋu Godnha,” bitjanna walala yukurra waŋanydja.

12 Yuwalk muka Godtja djeŋarra' ŋayi ḏarrtjalk wal'ŋu, ga bitjan ŋayi yukurra waŋanydja, “Nhumanydja yakana ŋuli mäkiri'‐witjun ŋarraku dhärukku. Nhe ŋuli guyaŋinyamirri yanapi nhe yurru nhina yukurra walŋa ŋuriŋiyi nhokalay be ganydjarryu ga ḻiya‐djambatjthinyarayu gaḏamandhunydja be. 13 Yo, nhumanydja dhuwala mirithirrina yana yätjnha gal'ŋu, balanyarana biyaku ŋuli ḻoḻu be‐wala dhiŋgi, yurru ḻiḻ'yunarana ŋunhiyi yulŋunydja, djetjimirrina, galki yurru ŋunhiyi burrul'yunna yulŋunydja. 14 Ŋayi ŋuli dhoḻunydja ŋunhi rupa djämawuy ḏaw'‐ḏaw'yunna, muṉguythirrina warrpam'nha, ga galki nhumanydja yurru bitjandhiyina buḻwaŋ'thunna.”

15 Yo, bitjan ŋayi Garray God yukurra waŋanydja, Yitjuralwunydja ŋunhi ḏarrtjalktja Waŋarr, “Go, roŋiyiyana lili walala ŋarrakalana, ga ŋarranydja yurru nhumalanha walŋakumana; märr‐nherraṉmiya ŋarrakala, märr nhumanydja yurru nhina wuṉḏaŋarrnha, gunganharawuyyu ŋarrakalana.” 16 Yurru nhumanydja waŋana yaka'yurruna warray, bitjarra warray, “Dhuwala ŋanapurruŋgunydja yarraman' malanha ḏälmirri mirithirri, ŋanapurru yurru gundupuma yana ŋulaŋuru miriŋuwalanydja,” bitjan. Ga yuwalk nhuma yurru gundupumanydja, liŋgu nhumalanha yurru ŋuruŋu miriŋuyunydja ŋupanna‐wala yana waṉḏinyamaramana. Nhumanydja guyaŋirri yukurra yanapi nhuma yurru walŋakunharamirri nhumalanhay nhuma, yurru bäyŋu warray. 17 Guḻku'na nhuma yurru gundupumanydja ŋunhi nhuma yurru nhäma waŋganynhanydja ŋula miriŋunha, ga ŋunhi nhuma yurru nhäma ŋula märr‐ḻurrkun'nha, bala nhumanydja yurru barrkuwatjthirrina gundupumana, bukmaknha nhuma yurru gundupumana, ga waŋganynha yukurra yurru ŋunhina liŋgu dhomala'na dhärranydja ŋunhiliyi bukuŋuranydja. 18 Yurru Garraynydja nhumalaŋgu galkunna yukurra roŋinyarawuna bilyunarawu nhanukalana, ga ŋunhi nhuma yurru bilyundja nhanukala, ŋayinydja yurru märrama nhumalanha mel‐wuyunaramirriyuna. Ŋayinydja ŋayaŋu‐dhunupa warray wal'ŋu, rom‐waŋgany warray, ga djämanydja ŋayi yurru dhunupa wal'ŋu yana, yuwalk yana ŋayi yurru guŋga'yun goŋmirriyama ŋunhinhanydja walalanha ŋunhi walala yurru märr‐nherraṉmirri nhanukala.