35
Godkunydja dhukarr ḏarrtjalk wal'ŋu dhika yol‐wapthunamiriw
35:1–10 (God’s way of holiness)
1 Yo, ŋunha ŋanhdharktja wäŋa yurru djulŋithirrina wal'ŋu,
ga wurrki yurru ŋuthan ḻatju'thirrina dhikana ŋunhiliyi gawarrka'ŋuranydja wäŋaŋura.
2 Ŋunhiyi räwak wäŋa yurru dhika mulkuruyirrina dhapirrkthirrina,
ga gawarrka' ŋunhiyi wäŋa yurru miyamanna yukurra galŋa‐djulŋithirrina goŋmirriyirrina wal'ŋu,
liŋgu mulmu ga dhika nhä borum yurru ŋuthanna dhika ḻatju'yirrina wal'ŋu borummirriyirrina.
Ga bukmakthu yolŋuyunydja yurru nhämana ŋunhiyi ḻatjuny'tja ŋanya ganydjarr Godkunydja ŋunhimalayi,
ŋunhi ŋayinydja ḻatju' wal'ŋu yana,
ga djämanydja ŋayi ŋuli mirithirri ŋamakurru' wal'ŋu.
3 Wiripunydja mak nhe ŋuli märr‐yawaryunna ŋuriŋi djämayu mirithinyarayu,
ga wiripunydja mak nhe ŋuli märr‐yawaryun liŋgu ŋuriŋi ŋunhi nhe ŋuli bukumirriyama märr‐weyinmirri,
ga märr‐weyin nhe yukurrana galkurruna.
Yurru mukthurra yana märr‐yuwalkthiya yulŋunydja ga wuṉḏaŋarrthiya,
ga yakana gulyurra gandarrŋura, ga märr‐yawaryurranydja.
4 Ḻakaraŋa ŋuripanydja yolŋuwa ŋunhi ŋayi ŋuli ŋayaŋu märr‐yalŋgi'thirri,
ḻakaraŋa nhanbala biyaka, “Way, dhärriya wuṉḏaŋarrthiya yana, ga yakana barrariyanydja.
Galki nhuŋu Godtja yurru bunana.
Ŋayi yurru dhä‐ḏir'yunna yana ŋunhi miriŋunhanydja nhuŋu,
yurru nhunanydja ŋayi yurru walŋakuma warray.”
5 Yo, bambayyunydja yurru yolŋuyu nhämana,
ga mäkiri'miriwyunydja yurru ŋämana.
6 Ga ŋayinydja yurru ŋunhi bundhurrnydja yolŋu wapthu'‐wapthunna yukurra giritjirrina,
ga ŋunhinydja dhärukmiriwnydja yolŋu yurru yukurra miyamanna ŋayaŋu‐djulŋithirrina goŋmirriyirrina,
Liŋgu ŋunhalayi ŋanhdharkŋuranydja gawarrka'ŋuranydja yurru gapu walmana yukurra dhawaṯthunna,
bala yurru ŋunhiyi gapunydja waṉḏirri mayaŋ'‐mayaŋdhirrina ŋuliwitjan baṉḏanygurrunydja räwakkurrunydja wäŋakurru.
7 Ga ŋunhi gorrmurnydja yurru munatha' ŋulwitjthirrina, liŋgu ŋuriŋi gapuyuna,
ga ŋanhdharktja ŋunhiyi wäŋa yurru ŋoy‐yal'yunna gapuyu ŋuriŋiyina.
Ŋunhi yukurrana wakinŋu wäyin nhinana, ŋunhiyinydja wäŋa yurru wiripuŋuyirrina mulkuruyirrina,
yuṯayirrina dhikana wal'ŋu gapu‐mäypamirriyirrina.
8 Ga dhukarrnydja yurru ŋorra marrtji ḻatju'na dhikana ŋanyana,
ga yäkunydja ŋunhiyi dhukarrnydja “Ḏarrtjalknha wal'ŋu Godku, yol‐wapthunamiriwnha.”
Yakana yurru yolŋu ŋayaŋu‐dhukun'mirrinydja yukurra marrtji ŋuliwitjandhiyi dhukarrkurru,
ga yakana yurru ŋunhi yolŋu ŋäṉarr‐djarrpiny'tja marrtji yukurra ŋuliwitjandhiyi.
9 Yakana yurru wakinŋuyu wäyindhu yolŋunha buma ŋunhilinydja dhukarrŋura,
ŋunhi walala yurru yolŋu walala yukurra marrtji ŋuliwitjandhiyi;
Walala yurru yolŋunydja walala marrtji walŋana yana ŋuliwitjandhinydja dhukarrkurru,
ŋunhi walalanha ŋayi Garrayyu walŋakuŋala dhawaṯmaraŋala beŋuru miriŋuwala goŋŋuru.
10 Yo, ŋunhiyinydja walala yolŋu'‐yulŋu yurru buna ŋunhiliyi * JerusalemDjurutjalamnha wäŋaŋura ŋayaŋu‐djulŋimirrina,
walala yurru yukurra marrtji manikaynydja miyaman djulŋithirrina wal'ŋu yana märr‐yiŋgathirrina.
Bitjanna liŋguna gupaḏalnha walala yurru nhinanydja yukurra ŋayaŋu‐djulŋithirrina,
yakana ŋayi yurru ŋula yol yolŋu galŋa‐yätjthirri ga warwuyundja biyapulnydja.