1 Ai Kot, ai Kot, pwota ka likitieila?

Pwota ka fokun toau seniei fän om alilis,

pwal seni ai siöngau? ✡ Mat 27.46; Mark 15.34

2 Ai Kot, üa siö ngonuk lerän, nge kosap pälüeniei,

üa siö ngonuk lepwin,

nge üsap tongeni asösö.

3 Nge en ka pin. Ka mot won om lenien motun king,

en ewe chon Israel ra kölün mwareiti.

4 Äm kewe lewo ra anomu ar apilükülük womw.

Ra apilükülükuk, nge en ka angaserela.

5 Ra siö ngonuk, nge en ka amanaueer,

ra apilükülukuk, nge resap lichipüng.

6 Nge ngang eman moso, sap eman aramas,

üa küna esit me koput me ren aramas.

7 Meinisin mi künaei ra turunufaseei,

ra akopea awer o alifechefechi mökürer ngeniei. ✡ Mat 27.39; Mark 15.29; Luk 23.35

8 Ra apasa, “A anomu an apilükülük won ewe Samol mi Lapalap,

i epwe angasa,

i epwe amanaua, pun a pwapwa ren.” ✡ Mat 27.43

9 Nge en ewe mi atoeiwu seni lon letipen inei,

ka tümwünüöchüei, lupwen üa eman mönükol.

10 Seni leuputiuei üa apilükülükuk,

seni ewe fansoun inei a nöünieitiu en ai Kot.

11 Kosap toau seniei, pun osukosuk a arap ngeniei,

nge esap wor eman a alisiei.

12 Chomong chon oputaei ra pwelifeiliei usun epwi pwin ätemwänin kow,

ra nom ünüki usun ätemwänin kow

mi pöchökül seni Pasan.

13 Ra amassaw ngeniei usun eman laion mi mwacho a wörüwör

o atatakisi liapan.

14 Üa usun chök koluk mi niitiu,

lekeilen chüi meinisin ra ruwofesen,

lelukei a usun kiris,

a telila me leupwei.

15 Lon awei a pwasapwas usun pwül moromor,

nge chönawei a pacheetä fän fongochi.

Ka likitieila lon pwül moromor

usun eman mi mäla.

16 Eu mwichen aramasangau a pwelifeiliei,

ra rongeeila usun epwi pwiin kolak.

Ra posu pei me pechei.

17 Üa tongeni aleani chüi meinisin.

Chon oputaei ra änefotaei o takiriei.

18 Ra üttüt won üfei kewe

o ineti lefiler. ✡ Mat 27.35; Mark 15.24; Luk 23.34; Joh 19.24

19 Nge en, ai Samol mi Lapalap, kosap toau seniei!

En ai chon alilis, kopwe müttir feito o alisiei.

20 Kopwe angasaei seni afeiengauen ketilas,

kopwe angasa manauei seni ekei kolak mi pöchökül.

21 Kopwe amanauaei seni ekewe laion,

kopwe amanaua inisi seni mächän ekewe ätemwänin kow mi mwacho.

22 Üpwe apworausa ngeni pwii kewe mine ka föri,

üpwe mwareituk lein ewe mwichen aramas. ✡ Ipr 2.12

23 Ämi mi niuokusiti ewe Samol mi Lapalap, oupwe mwareiti i,

ämi mwirimwirin Jakop meinisin oupwe alinga i,

ämi chon Israel meinisin oupwe fokun meniniti i.

24 Pun Kot esap aliwini eman mi mwelele ika oput eman mi nom lon riaföü.

Esap amona mesan seni,

nge a pälüeni, lupwen a siö ngeni.

25 En popun ai mwareituk me lon ewe mwich mi lap.

Üpwe eäni ekewe asor me fän mesen chokewe mi niuokusituk,

ekewe asor üa pwon ngonuk.

26 Chokewe mi wöüngau repwe mongö o möt.

Chokewe mi feito ren ewe Samol mi Lapalap repwe mwareiti i.

Amwo repwe feiöch tori feilfeilachök.

27 Chon fanüfan meinisin repwe chechemeni ewe Samol mi Lapalap

o kuliti i.

Chon ekewe ainang seni ekewe mwü meinisin repwe fel ngeni.

28 Pun ewe Samol mi Lapalap i king,

i a nemeni ekewe mwü.

29 Ewer, ekewe chon lamalamtekia meinisin me won fanüfan repwe chapetiu mwan,

chokewe meinisin mi feil ngeni mäla repwe fotopwäsuk me mwan, pwal chokewe resap tongeni püsin amwöchü manauer.

30 Mwirimwirich repwe angang ngeni i.

Aramas repwe apworausa ngeni ewe täppin aramas epwe feito usun ewe Samol,

31 repwe asilefeili ngeni ekewe aramas resamwo uputiu,

“Ewe Samol mi Lapalap a amanaua nöün aramas.”