1 Iwe, lupwen a ränila, ekewe souasor mi lap meinisin me ekewe souakom ra pwüngüpwüngfengen usun ar repwe niela Jesus. 2 Ra föti ngeni sein o etekinala pwe repwe atolonga lepöün ewe kepina Pilatus.

3 Lupwen Jutas ewe chon afangamä a silei pwe ra atowu pwüngün pwe Jesus epwe mäla, a liamam o a aliwinala ekewe ilik föün moni silifer ren ekewe souasor mi lap me ekewe souakom. 4 A apasa ngeniir, “Ngang üa tipis ren ai afangamä eman mwän esap wor an tipis ngeni mäla.” Iwe, ra pölüeni, “Met wewen ngenikem, kopwe püsin ekiekik.” 5 Iwe, Jutas a moneelong ewe moni lon ewe imwenfel o feila. Mürin a feila o püsin forusi. 6 Nge ekewe souasor mi lap ra angei ekewe föün moni o apasa, “Ei moni liwinin cha, a ngau ngeni allükün ach lamalam pwe sipwe atolonga lon monien imwenfel.” 7 Mürin ar tipeeufengen usun, ra nöüni ewe moni le möni fanüen eman chon föri sepi seni pwül, pwe epwe eu lenien peias fän iten chon ekis. 8 Iei mine ewe fanü a iteni “Fanüen Cha” tori ikenai. ✡ Föf 1.18-19 9 Iei usun met ewe soufos Jeremaia a osuni a pwönüetä: “Ra angei ekewe ilik föün moni silifer, iei ükükün ewe moni ekewe chon Israel ra tipeeufengen won pwe repwe isetiu fän itan, 10 o ra nöünöü ei moni le möni ngeni fanüen eman chon föri sepi seni pwül, usun ewe Samol a allük ngeniei.” ✡ Sek 11.12-13

11 Iwe, lupwen Jesus a ütä me mwen ewe kepina Pilatus, Pilatus a aisini, “Ifa usun, en nöün chon Juta we king?” Jesus a pölüeni, “Ewer, usun om apasa.” 12 Nge lupwen ekewe souasor mi lap me ekewe souakom ra aturu Jesus, i a chök fanafanala. 13 Iei mine Pilatus a üreni Jesus, “Kosap rongorong ngeni ekei kapasen atutur meinisin ra aturuk won?” 14 Nge Jesus esap fokun pölüeni och me lein ar kewe kapas, sap fen mwo nge eu ar kapasen atutur. Iei mine ewe kepina a fokun weitifengeni.

15 Iteiten fansoun lupwen a tori ewe mongön Pasofer, ewe kepina a soun amusala eman chon fötek ekewe aramas ra tüngor. 16 Lon ena fansoun a wor eman chon fötek mi sil me ren aramas pokiten an föföringau, itan Parapas. 17 Iwe, lupwen än ekewe aramas chufengen, Pilatus a aisiniir, “Iö lein ekewe ruoman oua mochen ai üpwe amusa ngenikemi, Parapas ika Jesus mi iteni Kraist?” 18 Pilatus a fokun silei pwe ekewe nöüwisen chon Juta ra atolonga Jesus lepöün pokiten ar lolowo. 19 Iwe, lupwen Pilatus a mot won an lenien motun apwüng, pwülüan a tinala ren ei pworaus: “Kosap föri och ngeni ewe aramas mi pwüng, pun lon ai tan lepwinewe üa fokun riaföü fänäsengesin.” 20 Iwe, ekewe souasor mi lap me ekewe souakom ra pese ngeni ewe mwichen aramas pwe repwe tüngor ngeni Pilatus pwe epwe amusala Parapas, nge epwe niela Jesus. 21 Nge Pilatus a aisini ewe mwichen aramas, “Iö me lein ekewe ruoman oua mochen ai üpwe amusa ngenikemi?” Iwe, ra pölüeni, “Parapas.” 22 Pilatus a aisiniir, “Nge met üpwe föri ngeni Jesus, ewe a iteni Kraist?” Ir meinisin ra köpökütä, “Kopwe iräpengesi!” 23 Nge Pilatus a aisiniir, “Met sokun föför mi ngau a föri?” Mürin ra köpökütä fän leüömong, “Kopwe iräpengesi!” 24 Iwe, lupwen Pilatus a küna pwe esap wor lomoten an epwe sopwela le kapas ngeniir, a pwal mefi pwe eu fitikoko epwe popuetä, a angei koluk o talü pöün me mwen ewe mwichen aramas o apasa, “Esap nom woi tipisin än ei aramas epwe ninnila. Epwe püsin nonom womi.” ✡ Tut 21.6-9 25 Mürin ekewe aramas meinisin ra pölüeni, “Liwinin chaan epwe nonom wom me won nöüm kana!” 26 Iwe, mürin Pilatus a amusawu Parapas ngeniir, nge a wichi Jesus o atolonga lepöün ekewe sounfiu pwe repwe iräpengesi.

27 Mürin nöün Pilatus kewe sounfiu ra angei Jesus o etekinalong lon imwen ewe kepina, nge unusen ewe mwichen sounfiu ra pweliela ünükün. 28 Ra pwiliti seni üfan o aüföüfa ngeni echö üf mi parachol. 29 Mürin ra fittiifengeni palen iräfölüföl o ämwärämwäratä won möküren Jesus pwe mwärin, ra pwal uwalong efoch wok lon pöüifichin. Mürin ra fotopwäsuketiu mwan o turunufasei. Ra apasa, “Ewe kingen chon Juta epwe manauatam.” 30 Ra atufa, ra angei ewe wok seni o wichi ngeni möküran. 31 Lupwen ra wes me turunufasei, ra pwiliti seni ewe üf o aüföüfa ngeni püsin üfan. Mürin ra etekinala pwe repwe iräpengesi.

32 Iwe, lupwen ar towu seni ewe telinimw, ra churi eman mwän itan Simon seni Kirene. Ekewe sounfiu ra echimwa ngeni pwe epwe mwärei ngeni Jesus an we iräpenges. 33 Iwe, ra tori ewe leni itan Kolkota, wewen “Lenien Pösökün Mökür”. 34 Ikenan ra aünü ngeni Jesus wain mi nofitfengen me och mettoch mi maras. Nge mürin an neni, esap mochen ünümi. ✡ Kölf 69.21 35 Iwe, ra iräpengesi Jesus. Mürin ra üttüt won üfan kewe o ngeni eman me eman leir met üttian. ✡ Kölf 22.18 36 Mürin ra mottiu ikenan o mamasa Jesus. 37 Asen möküran ra apachatä ekoch mak mi pwärätä mine ra tip ngeni, “Iei i Jesus, ewe kingen chon Juta.” 38 Mürin ra pwal iräpengesi ruoman chon solä fiti Jesus, eman a nom lepelifichin, nge eman lepelimöngun. 39 Iwe, ekewe aramas mi pwere seni Jesus ra turunufasei, ra elifechifechi mökürer ✡ Kölf 22.7; 109.25 40 o apasa, “En ewe ka ekiekin ataetiu ewe imwenfel o aüsefälietä lon ükükün ülüngat rän, kopwe püsin amanauok! Are en Nöün Kot, kopwe tötiu seni ewe iräpenges!” ✡ Mat 26.61; Joh 2.19 41 Pwal ina chök usun ekewe souasor mi lap, ekewe Sensen Allük me ekewe souakom ra takirin ämängaua Jesus o üra, 42 “A amanaua ekoch, nge esap tongeni püsin amanaua! Sap i ewe kingen Israel? Are epwe tötiu seni ewe iräpenges iei, iwe, sipwe lükü i. 43 A lükü Kot o püsin aita ngeni pwe i Nöün Kot. Iwe, sipwe pii are Kot a mochen amanaua i lon ei otun!” ✡ Kölf 22.8 44 Pwal mwo nge ekewe chon solä mi eti Jesus le iräpenges ra turunufasei i ren ekewe chök ititin kapas.

45 Lupwen a tori leoloasen ewe rän, unusen ewe fanü a rochopwak lon ükükün ülüngat awa. 46 Ina epwe kulok ülüngat Jesus a kökkö fän leüömong, “Eli, Eli, lama sapaktani? wewen: Ai Kot, ai Kot, pwota ka likitieila?” ✡ Kölf 22.1 47 Iwe, ekoch aramas mi ü ikenan ra rongorong an kökkö o üra, “A köri Elias!” 48 Eman me leir a müttir säto ren, a angei eu farawa o otukalong lon ewe wain mi mwäl, a pachetä lesopun efoch iich o sotuni an epwe aünü ngeni Jesus. ✡ Kölf 69.21 49 Nge ekewe ekoch aramas ra üra, “Witi mwo ekis, sipwe pii ika Elias epwe feito o amanaua.” 50 Jesus a kökkösefäl fän leüömong, iwe, a mäla. 51 Lon ewe chök otun ewe chechen mangaku lon imwenfel a kam seni won tori fan, pwe a wor ruu kinikin. A fis chechen fanü, ekewe achau ra sangfesen ✡ Eks 26.31-33 52 o ekewe peias ra sukula o chomong chon pin mi mäla ra manausefäl. 53 Ra towu seni ekewe peias mürin än Jesus manausefäl seni mäla o feila lon ewe Telinimw mi Pin ia chomong aramas ra küneer me ie. 54 Iwe, lupwen ewe meilapen sounfiu me ekewe sounfiu mi mamasa Jesus ra küna ewe chechen fanü me meinisin mine a fis, ra fokun rükö o apasa, “Enlet, ätei wesewesen Nöün Kot!” 55 A pwal wor chomong fefin ikenan mi aköürü me ekis toau, ir chokewe mi tapwela mürin Jesus seni Kalilea pwe repwe tümwünü ngeni mine a eäni osupwang. 56 Me lein ekei fefin Maria Maktalene, Maria inen James me Josef, pwal pwülüen Sepeti. ✡ Luk 8.2-3

57 Iwe, lupwen a tori lekuniol, eman mwän mi pisekisek seni Arimatea itan Josef a war, ätei pwal eman nöün Jesus kewe chon kaiö. 58 A feila ren Pilatus o tüngor somän Jesus. Iwe, Pilatus a allük pwe repwe ngeni Josef somän Jesus. 59 Iei mine Josef a angei ewe somä, a finiti ngeni echö mangaku mi fö o pwechepwech, 60 o a isenalong lon püsin peiasan mi kärän chök wes me tu lon achau. Mürin a asokopanato eföü fau mi watte o pwölü ngeni mesen ewe peias, iwe, a feila. 61 Iwe, Maria Maktalene me pwal ewe eman Maria ra mot ikenan awenewenen ewe peias.

62 Iwe, sorotän ewe rän, iei ewe ränin sapat, ekewe souasor mi lap me ekewe Farisi ra churi Pilatus 63 o üreni, “Äm samol, äm aia chechemeni pwe enan chon chofona a apasa lupwen a chüen manau, ‘Üpwe manausefäl mürin ülüngat rän.’ ✡ Mat 16.21; 17.23; 20.19; Mark 8.31; 9.31; 10.33-34; Luk 9.22; 18.31-33 64 Iei mine kopwe allük pwe sounfiu repwe mamasafichi peiasan tori ewe aülüngatin rän, pwe nöün kewe chon kaiö resap tongeni feila ren ewe peias o soläni somän o üreni ekewe aramas, ‘A manausefäl seni mäla.’ Ei kapas chofona lesopolan epwe ngau seni ewe kapas chofona lepoputän.” 65 Pilatus a pölüeni, “Oupwe angei ekoch sounfiu, oupwe feila o mamasaöchü ewe peias ükükün ämi tufich ngeni.” 66 Iei mine ra feila o pwauni won ewe fau, ra pwal likitätiu ekewe sounfiu pwe repwe mamasa.