1 Tipachem a aüetä imwan o aütäi füfoch üran. 2 A niela nöün man o nofiti ünüman wain ngeni nofitin mongö, a pwal fotuki an chepel. 3 A tinala nöün kewe chon angang fefin pwe repwe kökkö me won ewe leni tekia seni meinisin me lon ewe telinimw, 4 “Ämi mi wewemang, oupwe feito ikei.” Nge a apasa ngeni ewe mi tiparoch, 5 “Kopwe etto o mongö seni enei mongö, kopwe ün seni ewe wain üa nofiti. 6 Kopwe likiti ekewe chon wewemang pwe kopwe manau, kopwe pwal fefeitä lon om sile.”

7 Eman mi aiti ngeni eman chon turunufas mine a pwüng epwe püsin säw, nge eman mi apwüngü eman aramasangau epwe püsin feiengau. 8 Kosap apwüngü eman chon turunufas, pun epwe oputok. Nge kopwe apwüngü eman mwän mi tipachem, pun epwe echenuk. 9 Kopwe öüröüra eman chon tipachem, pun epwe lapala an tipachem. Kopwe aiti ngeni eman chon pwüng mine a mürina, pun epwe fefeitä lon an sile. 10 Ach niuokusiti ewe Samol mi Lapalap iei popun tipachem, nge ach silei Ewe mi Pin iei popun ach weweöch. ✡ Hiop 28.28; Kölf 111.10; SalF 1.7 11 Pun tipachem epwe achomongala ränin manauom, pwe ierin manauom repwe wattela. 12 Are ka tipachem, en kopwe püsin feiöch ren. Nge are ka eman chon turunufas, kopwe püsin feiengau ren.

13 Tiparoch a usun chök eman fefin a akürang, a lüangau o säwemang. 14 A mot ünükün asamen imwan, ika won eu leni mi tekia seni meinisin me lon ewe telinimw. 15 A kökköla mürin chokewe mi feila seni, chokewe mi chök ekiekin föri ar angang, 16 “Iö kana mi wewemang repwe feito ikei.” A pwal apasa ngeni ewe mi tiparoch, 17 “Koluk eman a soläni a fokun arar, nge pilawa eman a eni le monomon a fokun annö.” 18 Nge ekewe aramas resap silei pwe chokewe mi tolong lon imwen neminewe repwe mäla, nge chokewe mi wasöla ren ra fen nom epin ewe lenien sotup.