1 Oupwe rongorong! Tipachem a kökkö,

mirit a leüömongetä.

2 A ütä won ewe leni tekia lükün ewe al,

a ütä ia ekewe al ra chufengen me ie.

3 A leüömong le kökkö me lükün asamalapen tittin ewe telinimw lon ewe lenien tolong, ✡ SalF 1.20-21

4 “Üa kökkö ngeni ämi mwän,

üa leüömongetä ngeni aramas meinisin won fanüfan.

5 Ämi chon miritimang, oupwe kaiö mirit,

ämi chon tiparoch, oupwe kaiö tipachem.

6 Oupwe aüseling, pun üpwe fos won mettoch mi aüchea,

üpwe aiti ngenikemi mine a pwüng.

7 Üpwe apasa mine a let,

pun üa fokun oput kapas chofana.

8 Ai kewe kapas meinisin ra pwüng,

esap wor rikirik ika pwor lor.

9 Ai kapas ra wenechar me ren chokewe mi wewe ren,

ra pwal pwüng me ren chokewe mi silelap.

10 Oupwe angei ai kewe kapasen öüröür, nge ousap angei silifer,

oupwe pwal aücheani silelap, lap seni kolt mi mürina.

11 Pun ngang tipachem üa mürina seni fau aüchea,

nge meinisin mine oua efich esap nönnö ngeniei.

12 Ngang tipachem, mi wor rei mirit,

üa silelap le eäni kapasen öüröür mi pwüng.

13 Eman mi niuokusiti ewe Samol mi Lapalap a oput mine a ngau.

Üa oput lamalamtekia me sikesik,

pwal föför mi ngau me kapasen atuputup.

14 Üa eäni ewe tufichin öüröür me alefila met mi pwüng,

a wor ai sile, a pwal wor ai pöchökül.

15 Üa alisi ekewe king lon ar nemenem,

üa pwal alisi ekewe sounemenem pwe ra föri allük fän pwüng.

16 Üa alisi ekewe samol lon ar nemenem,

pwal ekewe aramas tekia lon ar nemeni fanüfan.

17 Üa echeni chokewe mi echeniei,

nge chokewe mi achocho le küttaei repwe künaei.

18 Pisekisek me iteüöch ra nom rei,

pwal wöü mi chök nonomola me feiöch.

19 Uai a mürina seni kolt, fokun seni kolt mi mürina,

mine oua angei seniei a mürina seni silifer mi fokun mürina.

20 Üa fetal won ewe al mi pwüng,

üa pwerela won ewe lenien fetal mi wenechar,

21 üa atoto wöü won chokewe mi echeniei

o aurala ar lenien iseis.

22 Iwe, lepoputän an angang ewe Samol mi Lapalap a föriei,

a akom le föriei me lomlom mwen mettoch meinisin. ✡ Pwär 3.14

23 A anomuei seni me lomlom,

üa akom mwen fanüfan esamwo wor.

24 Üa uputiu lupwen esamwo wor matau,

lupwen esamwo wor ekewe puächen koluk mi puächemong.

25 Üa uputiu mwen ekewe chukutekia

me ekewe chutekison resamwo nom lon lenier,

26 mwen än Kot föri fanüfan me ekewe tanipin won,

ika mwen an föri pwül moromor.

27 Üa fen nom, lupwen Kot a anomu ekewe läng lon lenier,

lupwen a föri lefilen matau me aropen ilen,

28 lupwen a anomu ekewe kuchun fän läng,

lupwen a anüküchara ekewe puächen koluk lon ekewe lenien alolol,

29 lupwen a föri kiännin matau,

pwe ekewe sät resap tolong won fanü.

Üa fen nom, lupwen a föri longolongun fanüfan.

30 Üa nom ren Kot usun eman sousile angang,

ngang popun an pwapwa iteiten rän.

Üa meseik me fän mesan fansoun meinisin,

31 üa meseikeiti unusen an we fanüfan,

üa pwapwa ren ekewe aramasen fanüfan.

32 Nge iei ämi nei kana, oupwe aüselingaei:

Oupwe apwönüetä mine üa ürenikemi, pwe oupwe feiöch.

33 Oupwe aüselinga ai kewe kapasen öüröür pwe oupwe tipachem,

nge ousap aücheangaueer.

34 A feiöch ewe aramas mi aüselingaei,

ätewe mi mamasa ai kewe asamalap iteiten rän

o witiwit ünükün ai kewe asam.

35 Pun ätewe mi künaei a küna manau,

nge ewe Samol mi Lapalap epwe pwapwa ren.

36 Nge ätewe esap künaei a püsin afeiengaua inisin.

Meinisin mi oputaei ra efich mäla.”