1 Iwe, ämi pwii kana, üa fokun echenikemi o positikemi. Ämi oua apwapwaei o üa sikäsinikemi. Iei mine, ämi pwii kana mi achengicheng, oupwe nüküchar lon manauemi lon ach Samol.

2 Ngang üa tüngormau ngenikemi Eutia me Sintike, ouse mochen oupwe tipeeufengen usun chök pwipwi lon ach Samol. 3 Iwe, pwal en chienei chon angang mi allükülük, üa tüngor ngonuk pwe kopwe alisi ekei fefin, pun ra fokun angang weires o etiei le arongafeili ewe Pworausen Manau, irfengen me Klement me pwal ekewe ekoch mi etiei lon ewe angang, ir chokewe meinisin mi mak iter lon än Kot we puken iten chon manau.

4 Oupwe pwapwa lon ach Samol fansoun meinisin, üpwe apasasefäli: Oupwe pwapwa! 5 Oupwe tipepwetete ngeni aramas meinisin. Ach Samol a arapoto. 6 Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou. 7 Iwe, än Kot kinamwe mi tekia seni ach tongeni weweiti epwe tümwünü lelukemi me ekiekimi lon Kraist Jesus.

8 Iwe, amüchülan ai kapas, ämi pwii kana, oupwe amwöchünükü lon ämi ekiek ekei mettoch mi mürina o amwarar: mettoch mi let me aüchea, mettoch mi pwüng me limöch, mettoch aramas ra efich me meniniti. 9 Oupwe apwönüetä mine oua kaiö o angei seniei, mine oua rong seni ai kewe kapas o küna seni ai kewe föför. Iwe, Kot ewe mi ngenikich kinamwe epwe nonom remi.

10 Iwe, a fokun watte ai pwapwa lon ach Samol, pwe mürin fansoun langatam oua tongeni pwärisefäli ämi alisiei. Esap wewen pwe oua ükütiu le alisiei, nge esap chök wor alen ämi oupwe pwäri ngeniei. 11 Üsap apasa ei pokiten a wor ai osupwang, pun üa asipaei ai üpwe menemenöch ren mine a wor rei. 12 Üa silei ai üpwe nonom lon wöüngau pwal ai üpwe nonom lon wöümong. Üa kaiö ewe monomon pwe üpwe kinamwe ekis meinisin me fansoun meinisin, ese lifilifil ika üa möt ika üa echik, ika piseki a somwosomwola ika üa mwelele. 13 Meinisin a ki ngeniei ren Kraist ewe mi atufichiei.

14 Nge a fokun öch pwe oua alisiei lon ai osupwang. 15 Iwe, ämi chon Filipi, oua fokun silei, pwe lupwen üa feila seni Masetonia, lon ewe fansoun üa popuetä le afalafala ewe Pworausen Manau, ämi na chök mwichefel a alisiei, ämi chök oua lifang ngeniei usun mine üa lifang ngenikemi. ✡ 2.Kor 11.9 16 Lupwen üa nom lon Tesalonika oua tinato rei ai alilis fän ekoch pwe üsap osupwang. ✡ Föf 17.1 17 Esap wewen pwe üa chök mochen angei lifang, nge üa mochen ai üpwe küna watten ämi föför mürina epwe kapach ngeni mine oua fen föri. 18 Iei toropwen ekewe mettoch meinisin oua ngeniei, ewer, a fen somwosomwola. Iei a wor rei mettoch meinisin, pun üa angei seni Epafrotitus ekewe lifang oua tinato rei. Ekei lifang ra usun chök eu asor ngeni Kot mi poöch, eu lifang Kot a etiwa o pwapwa ren. ✡ Eks 29.18 19 Nge ai Kot epwe ngenikemi meinisin mine oua osupwang ren lon wöün mi somwola lon Kraist Jesus. 20 Ach Kot, i Samach epwe küna ling tori feilfeilachök! Amen.

21 Ai kapong ngeni ekewe chon pin meinisin ir nöün Kraist Jesus. Pwiich kewe souläng mi nom rei ra pwal kapong ngenikemi. 22 Ekewe chon pin meinisin ra kapong ngenikemi, lapalan chokewe mi nom lon imwen Sisar. 23 Ümöümöchün ach Samol Jesus Kraist epwe nonom remi meinisin. Amen.