1 Ämi pwii kana, iei amüchülan ai kapas ngenikemi: Oupwe pwapwa lon ach Samol. Üsap weires ren ai üpwe aliwinisefäli mine üa fen makkei ngenikemi me mwan, nge oupwe fen feiöch ren are üpwe föri iei usun. 2 Oupwe afälikemi ren chokewe mi föri föför mi ngau, ra usun chök kolak. Ir ätekewe mi apöchöküla an epwe fis reirei won inisin aramas. 3 Sap ir, nge kich sia angei ewe enletin sirkomsais, pun sia fel ngeni Kot ren Ngünün, sia pwapwa lon manauach lon Kraist Jesus, nge sisap anomu ach apilükülük won met sia föri ngeni inisich. 4 Ewer, ngang üa tongeni anomu ai apilükülük won ena sokun lapalap. Are eman a ekieki pwe mi wor popun an epwe tongeni anomu an apilükülük won ei sokun lapalap, ngang won inisi a fen wor rei ekoch popun mi watte: 5 Ngang üa sirkomsais lon awaluen ränin mürin ai uputiu, ngang eman wesewesen re Israel seni chök ai uputiu, seni lon ewe ainangen Peniamin, ai kewe lewo meinisin ir re Ipru. Ngang eman Farisi lon ai apwönüetä än ekewe chon Juta kewe Allük, ✡ Föf 23.6; 26.5; Rom 11.1 6 üa pwal fokun tiliken lon ai ariaföüü ekewe chon lükü Jesus. Are eman aramas a ekieki pwe a tongeni küna pwüng ren an aleasochisi ekewe Allük, ngang üa apwönüretä meinisin. ✡ Föf 8.3; 22.4; 26.9-11 7 Nge ekei mettoch meinisin üa aita ngeni feiöch me lom, iei üa aita ngeniir feiengau pokiten Kraist. 8 Nge sap ikei chök. Ngang üa ekieki pwe mettoch meinisin ra fokun aücheangau fän iten ewe eu mi fokun aüchea seni meinisin, iei ai silei Kraist Jesus ai Samol. Pun fän itan üa pöütala meinisin, üa ekieki pwe meinisin ra usun chök pipi lon lenien koturula, pwe üpwe eäni Kraist 9 o wesewesen eufengen me i. Üsap chüen eäni püsin ai pwüng, ewe sokun pwüng üa angei ren ai aleasochisi ekewe Allük. Iei üa eäni ewe pwüng a toriei ren ai lükü Kraist, ewe pwüng mi feito seni Kot o a longolong won ai lükü Kraist. 10 Üa fokun mochen ai üpwe silei Kraist o mefi manamanen an manausefäl, üpwe pwal eti i lon an riaföü, pwe üpwe wewe ngeni i lon an mäla. 11 Pun üa apilükülükü pwe ngang üpwe eti ewe mwen manausefäl seni mäla ngeni manau.

12 Üsap apasa pwe üa fen apwönüetä ekei mettoch ika üa fen unusöchüla lon. Nge üa chök achocho ngeni ai üpwe angei ewe win, pun iei mine Kraist Jesus a turufiei ren. 13 Ämi pwii kana, ngang won inisi üsap ekieki pwe üa fen angei ewe win, nge eu mettoch üa föri: Üa manlükala mine a nom lükisöküri, nge üa achocho ngeni ai üpwe tori mine a nom mwei. 14 Iei mine üa säwenewen ngeni ewe sopolan ai üpwe angei ewe win, iei än Kot kö ren Kraist Jesus ngeni ewe manau esemüch.

15 Kich meinisin mi eäni mirit lon ach souläng sipwe ekiekipökü usun ekei mettoch. Nge are ekoch leimi a sokola ar ekiek, Kot epwe afatöchü ngenikemi. 16 Nge ousipwe chök fefetal ngeni mwach lon pwüngün ekewe allük sia fen aleasochisi tori iei.

17 Ämi pwii kana, oupwe chök sopwela le apirüei. Oupwe nenengeni chokewe mi föri sokun föför mi pwüng äm aia aiti ngenikemi. ✡ 1.Kor 4.16; 11.1 18 Ngang üa fen ürenikemi ei fän chomong me mwan, nge iei üpwe aliwinisefäli ngenikemi fän ai kechü: A wor chomong aramas mi manaueni eu sokun manau a pwärätä pwe ir ra oputa ewe iräpengesin Kraist. 19 Lesopolan manauer repwe nom lon hell, pun ar kot iei mochenian inisiir. Ra sikäsini mine repwe säw ren o ekieki chök mettochun lon ei fanüfan. 20 Nge kich sia chon wiliposun läng. Sia ösüküsükü eman Chon Amanau ach Samol Jesus Kraist pwe epwe feito seni läng, 21 i ätewe epwe awili inisich inisin tekison pwe epwe wewe ngeni inisin we mi ling ren an we manaman a tongeni anomu mettoch meinisin fän nemenian.